ఇంగ్లండ్‌తో సిరీస్ తర్వాతే టీ20 ప్రపంచకప్‌ జట్టుపై నిర్ణయం: టీమిండియా బ్యాటింగ్ కోచ్

అహ్మదాబాద్: ఇంగ్లండ్​తో జరిగే 5 మ్యాచ్‌ల సిరీస్ తర్వాతే టీ20 ప్రపంచకప్ జట్టు​పై ఓ అంచనాకు వస్తామని టీమిండియా బ్యాటింగ్ కోచ్ విక్రమ్ రాథోడ్ తెలిపాడు. ప్రపంచకప్‌కు ముందు జరిగే ఈ సిరీస్ ఆటగాళ్లకు మంచి ప్రాక్టీస్‌గా ఉపయోగపడుతుందన్నాడు. ఇక ఇంగ్లండ్‌తో మార్చి 12(శుక్రవారం) నుంచి టీ20 సిరీస్ ప్రారంభం కానుంది. 5 మ్యాచ్‌లు అహ్మదాబాద్‌లోని నరేంద్ర మోదీ స్టేడియంలోనే జరగనున్నాయి. ఈ సిరీస్ నేపథ్యంలో తాజాగా మీడియాతో మాట్లాడిన రాథోడ్.. ఈ ఏడాది భారత్ వేదికగా జరగనున్న టీ20 ప్రపంచకప్ సన్నహకాల గురించి ఆసక్తికర విషయాలు పంచుకున్నాడు.

'టీ20 వరల్డ్​కప్​ భారత్​లో జరుగనుంది. అయితే బ్యాటింగ్ విభాగం పటిష్ఠంగా ఉండాలని నేను కోరుకుంటున్నా. ఇంగ్లండ్​తో జరగబోయే సిరీస్​లో ఆడే ఆటగాళ్లే దాదాపు ప్రపంచ కప్​లోనూ ఉంటారని అనుకుంటున్నాం. ఈ సిరీస్​ తర్వాత ఆ విషయంపై స్పష్టత వస్తుంది. ఎవరైనా ఫామ్ కోల్పోయినా, గాయాల పాలైనా తిరిగి గాడిన పడటానికి ఇదే అనువైన సమయం. ప్రపంచ కప్​నకు ముందు జరిగే ఈ సిరీస్ మంచి ప్రాక్టీస్​గా ఉపయోగపడుతుంది.'అని విక్రమ్​ రాదోడ్ చెప్పుకొచ్చాడు.

ఇంగ్లండ్ తరహాలోనే భారత్​ కూడా దూకుడుగా ఆడనుందా? అనే ప్రశ్నకు బదులిస్తూ​. 'గేమ్​ను గెలవడమనేది అవసరం. పరిస్థితుల బట్టి స్ట్రైక్​రేట్ ఆధారపడుతుంది. మొదట బ్యాటింగ్​ చేసేటప్పుడు స్కోర్ ఎక్కువ చేసే అవకాశముంటుంది. లక్ష్య ఛేదనలో అది భిన్నంగా ఉండొచ్చు.. 10 ఓవర్లలోనూ ఆటను ముగించొచ్చు. లేదా 20 ఓవర్లు పట్టొచ్చు. మొత్తానికి ఆటను గెలవాలనే దృక్పథం అవసరం." అని విక్రమ్​ రాథోడ్ స్పష్టం చేశాడు. ఇప్పటికే నాలుగు మ్యాచ్​ల టెస్టు సిరీస్​ను భారత్ ​ 3-1తో గెలిచి ఉత్సాహంగా ఉండగా.. ఇంగ్లండ్ పరువు కోసం పాకులాడుతోంది.