టెస్టు క్రికెటర్​గా ఏ సవాల్‌నైనా ఎదుర్కోగలగాలి: బెన్‌ స్టోక్స్

అహ్మదాబాద్: టెస్ట్ క్రికెటర్‌ అనప్పుడు మైదానంలో ఎదురయ్యే ప్రతీ సవాల్‌ను ఎదుర్కోవాల్సిందేనని ఇంగ్లండ్ ఆల్‌రౌండర్ బెన్ స్టోక్స్ తెలిపాడు. చెన్నై వేదికగా జరిగిన సెకండ్ టెస్ట్ చెపాక్​ పిచ్​పై మాజీ క్రికెటర్లు విమర్శలు గుప్పించిన విషయం తెలిసిందే. భారత్‌ తమకు అనుకూలంగా ఉండే టర్న్ వికెట్‌ను సిద్దం చేసుకుందన్నారు. అయితే ఈ వ్యాఖ్యలపై తాజాగా స్పందించిన ఇంగ్లండ్​ ఆల్​రౌండర్​ బెన్​స్టోక్స్​.. టెస్టు ఆటగాళ్లు అన్ని పరిస్థితులను ఎదుర్కొవడంలో నైపుణ్యం కలిగి ఉండాలని అభిప్రాయపడ్డాడు. మరోవైపు మూడో టెస్టులో అగ్రశ్రేణి క్రికెటర్లను ఎదుర్కొనేందుకు తమ జట్టు సిద్ధంగా ఉందని చెప్పాడు.

'టెస్టు బ్యాట్స్​మన్​గా ఎలాంటి పరిస్థితులనైనా ఎదుర్కొనగలిగేలా ఉండాలి. విదేశీ బ్యాట్స్​మన్​గా భారత మైదానాల్లో నిలదొక్కుకోవడం కష్టతరమైనదే. అదే విధంగా మిగిలిన క్రికెటర్లకు ఇంగ్లాండ్​ మైదానాలు కఠినంగా అనిపించొచ్చు. అలాంటి ప్రతికూలతలన్నీ ఆటలో భాగమే. అందుకే మేము వాటిని ఆస్వాదిస్తాం'అని బెన్​ స్టోక్స్ చెప్పుకొచ్చాడు.

నాలుగు టెస్టుల సిరీస్​లో ఇంగ్లండ్​, భారత్​ జట్లు చెరో విజయం సాధించి సిరీస్​ను సమం చేశాయి. ఇందులో గెలిచిన టీమిండియా ప్రపంచటెస్టు ఛాంపియన్​షిప్​ ఆడే అవకాశాన్ని దక్కించుకుకోవాలని సన్నాహాలు చేస్తోంది. లార్డ్స్​ వేదికగా జరగనున్న టెస్టు ఛాంపియన్​షిప్​ ఫైనల్​కు న్యూజిలాండ్​ జట్టు ఇప్పటికే ​చేరుకుంది. కివీస్​తో తలపడాలంటే టీమిండియా ఈ సిరీస్​లో నెగ్గాలి. ఇంగ్లండ్​ జట్టు ఫైనల్​కు చేరుకోవాలంటే మిగిలిన రెండు టెస్టుల్లోనూ గెలవాల్సిఉంది. ఒకవేళ ఈ సిరీస్​ డ్రాగా ముగిస్తే.. వీరి తర్వాత ఉన్న ఆస్ట్రేలియా ఫైనల్​కు చేరుతుంది.