కోహ్లీలా దూకుడుగా ఉండటం మాకు సెట్ కాదు: బెన్‌ స్టోక్స్

కోహ్లీ రన్స్ చేయవద్దు..

'మమ్మల్ని మెరుగైన జట్టుగా మార్చేందుకు అత్యుత్తమైన దారినే మేం ఎంచుకుంటాం. ప్రతి జట్టు తమకు అనువైన దారిలోనే నడుస్తుంది. భారత్‌, ఇంగ్లండ్‌కు వేర్వేరు పద్ధతులు ఉన్నాయి' అని స్టోక్స్‌ అన్నాడు. కోహ్లీ ప్రశాంతంగా ఉంటే బాగుంటుందా, దూకుడుగా ఉంటే బాగుంటుందా అని అడగ్గా 'వ్యక్తిగతంగా చెప్పాలంటే అతడు పరుగులు చేయకపోతే బాగుంటుంది. ఎందుకంటే అది మా జట్టుకు మంచిది' అని వెల్లడించాడు.

ఆడితే ర్యాంకులు వస్తాయ్..

వన్డే సిరీస్‌ ఓడితే ఇంగ్లండ్‌ నంబర్‌వన్‌ ర్యాంకు పోయే ప్రమాదముందని ప్రశ్నించగా ''నంబర్‌ 1గా ఉండే అర్హత మా జట్టుకు ఉంది. మేం ఆడిన తీరే మమ్మల్ని ఆ స్థానానికి తీసుకువెళ్లింది. అయితే, ర్యాంకులే ప్రధానం కాదు, ఆటపై దృష్టి సారిస్తే ర్యాంకులు వాటంతటవే మారతాయి. కాబట్టి మా ఫోకస్‌ అంతా మ్యాచ్‌ గెలుపు పైనే ఉంటుంది. అగ్రస్థానంలో ఉండటం ఎవరికైనా ఆనందమే. అయితే అదే మమ్మల్ని నడిపించడం లేదు. ఆట పట్ల మా వైఖరి, మేమెలా ఆడుతున్నామన్నదే మమ్మల్ని ముందుకు నడిపిస్తోంది. అదే మమ్మల్ని విజయవంతం చేసింది. నంబర్‌ వన్‌గా మార్చింది'అని స్టోక్స్ చెప్పుకొచ్చాడు.

నాలానే ఆడమన్న్ాడు..

జో రూట్‌ లేకపోవడంతో మూడో స్థానంలో ఆడుతున్నానని ఇందుకోసం తన ఆటతీరును మార్చుకోలేదని స్టోక్స్‌ పేర్కొన్నాడు. ఆ స్థానంలో ఎలా ఆడాలని ప్రశ్నించగా 'నీలా నువ్వు ఆడు' అని రూట్ తనకు సమాధానం ఇచ్చాడని వెల్లడించాడు. ఫినిషర్‌గా సాధారణంగా 60 బంతులు ఆడితే మూడో స్థానంలో వంద వరకు ఎదుర్కోవాల్సి రావొచ్చన్నాడు. రాజస్థాన్‌ రాయల్స్‌కు ఓపెనింగ్‌ చేసినప్పటికీ ఇంగ్లండ్‌లో ప్రతి స్థానానికి అర్హులైన వారు ఉన్నారని తెలిపాడు. లియామ్‌ లివింగ్‌స్టన్‌కు అవకాశం దొరికితే నిర్భయంగా చెలరేగగలడని తెలిపాడు.