అమితాబ్.. జోరూట్ ఎవరో తెలిసిందా? ఐదేళ్ల ట్వీట్‌‌ను తిరగదోడిన ఫ్లింటాఫ్!

రూట్‌ను అందుకుంటాడు..

2016 టీ20 ప్రపంచకప్ సెమీస్‌లో మొహాలీ వేదికగా ఆస్ట్రేలియాతో జరిగిన మ్యాచ్‌లో విరాట్‌ కోహ్లీ (51 బంతుల్లో 81 నాటౌట్‌) ధనాధన్‌ బ్యాటింగ్‌ సందర్భంగా ఇంగ్లండ్‌ మాజీ క్రికెటర్‌ ఆండ్రూ ఫ్లింటాఫ్‌.. బిగ్‌ 'బి' అమితాబ్‌ బచ్చన్‌ మధ్య ట్విటర్‌ వార్‌ జరిగింది. 'ఇలాగే ఆడితే రూట్‌ను విరాట్‌ ఏదో ఒక రోజుకి అందుకొంటాడు' అని అప్పట్లో ఫ్లింటాఫ్‌ ట్వీట్‌ చేశాడు.

బిగ్‌బీకి గౌరవంతో..

అయితే కోహ్లీ ఘనతలను ఫ్లింటాఫ్ తక్కువ చేసి చూపించే ప్రయత్నం చేసాడని భావించిన అమితాబ్.. 'ఎవరా రూట్‌? వేళ్లతో సహా పీకేస్తాం' అని కౌంటర్‌ ఇచ్చాడు. ఇక అవకాశం కోసం కాచుక్కూర్చున్న ఫ్లింటాఫ్‌..రూట్‌ తాజా ప్రదర్శనతో ఇదే అదనుగా రంగంలోకి దిగాడు. అమితాబ్‌ నాటి రిప్లైను ఉదహరిస్తూ.. 'పెద్దాయనకు గౌరవంతో' అంటూ పాత ట్వీట్‌ను తిరగదోడాడు. రూట్ ఎవరో తెలిసిందా? అని బిగ్‌బీని ఫ్లింటాఫ్ పరోక్షంగా ప్రశ్నించాడు.

బిగ్‌బీ ఫ్యాన్స్ ఫైర్..

ఇక ఫ్లింటాఫ్‌పై బిగ్‌బీ ఫ్యాన్స్ మండిపడుతున్నారు. ఒక్క డబుల్ సెంచరీకే ఫ్లింటాఫ్ ఎగిరి ఎగిరి పడుతున్నాడని సెటైరిక్‌గా బదులిస్తున్నారు. ఎన్ని జన్మలెత్తిన బిగ్‌బీ సాధించిన ఘనతలను, అభిమానులను సొంతం చేసుకోలేవని ఫ్లింటాఫ్ చురకలంటిస్తున్నారు. మరికొంత మంది మాత్రం.. ఫ్లింటాఫ్‌కు మద్దతుగా నిలుస్తున్నారు. ఆటలో ఇలాంటి సహజమేనని, చూసి చూడనట్లు వదిలేయాలని పేర్కొంటున్నారు.

ఒకే ఒక్కడు..

డబుల్ సెంచరీతో జోరూట్ పలు రికార్డులను తన ఖాతాలో వేసుకున్నాడు. భారత గడ్డపై డబుల్ సెంచరీ చేసిన రెండో విదేశీ బ్యాట్స్‌మన్‌‌‌గా నిలిచాడు. 2014లో బ్రెండన్‌ మెకల్లమ్‌ హైదరాబాద్‌లో రూట్ కన్నా ముందు డబుల్ సెంచరీ సాధించాడు. 100వ టెస్ట్‌లో డబుల్ సెంచరీ చేసిన తొలి క్రికెటర్‌గా కూడా ఈ ఇంగ్లండ్ బ్యాట్స్‌మన్ గుర్తింపుపొందాడు.

రూట్‌ కెరీర్‌లో ఇది ఐదో డబుల్‌ సెంచరీ. ఇంగ్లండ్‌ బ్యాట్స్‌మెన్‌లో కుక్‌ (5)తో సమంగా నిలవగా, అత్యధికంగా వాలీ హామండ్‌ 7 డబుల్‌ సెంచరీలు సాధించాడు. ఇంగ్లండ్‌ తరఫున కుక్‌ (12,472), గూచ్‌ (8,900) తర్వాత అత్యధిక పరుగులు చేసిన బ్యాట్స్‌మన్‌ జాబితాలో ఇప్పుడు రూట్‌ (8,467) మూడో స్థానానికి చేరాడు.