India vs England 2nd ODI Weather Report: వర్ష సూచన ఉందా? లార్డ్స్ వెదర్ రిపోర్ట్ ఏంటంటే?

India vs England 2nd ODI Weather Report: Will Rain Spoil The ODI Match At Lords

లార్డ్స్: పేస్‌, స్వింగ్‌తో చెలరేగిపోతున్న బౌలర్లు.. ప్రమాదకర ప్రత్యర్థి బౌలింగ్‌ను లెక్కచేయని బ్యాటర్లు.. ఇలా ఆల్‌రౌండ్‌ ప్రదర్శన జోరుతో పాటు ఆత్మవిశ్వాసంతో కనిపిస్తున్న టీమిండియా ఇంగ్లండ్ గడ్డపై మరో సిరీస్‌ విజయంపై కన్నేసింది. ఇప్పటికే ఇంగ్లండ్‌తో టీ20 సిరీస్‌ నెగ్గిన భారత్‌.. ఇప్పుడు వన్డే సిరీస్‌నూ చేజిక్కించుకునేందుకు సిద్ధమైంది. లార్డ్స్‌లో బట్లర్‌ సేనతో నేడు జరిగే రెండో వన్డేలో రోహిత్ సేన తలపడనుంది. తొలి వన్డే విజయ ఉత్సాహంలో ఉన్న భారత్ అదే జోరు కొనసాగించి మరో మ్యాచ్ మిగిలుండగానే సిరీస్ కైవసం చేసుకోవాలనే పట్టుదలతో ఉంది. మరోవైపు టీ20 సిరీస్‌తో పాటు తొలి వన్డే ఘోర పరాజయంతో కసి మీద ఉన్న ఇంగ్లండ్ ప్రతీకారం తీర్చుకోవాలనుకుంటుంది. ఈ క్రమంలోనే ఈ మ్యాచ్ కూడా అభిమానులకు కావాల్సిన మజాను అందించనుంది.

వర్ష గండం ఉందా?

అయితే ఇంగ్లండ్‌లో వాతావరణం ఎప్పుడూ ఎలా ఉంటుందో చెప్పలేం. రిషెడ్యూల్ టెస్ట్‌కు వరుసగా మూడు రోజులు అంతరాయం కలిగించిన వరుణుడు ఆ తర్వాత ఇబ్బంది పెట్టలేదు. మూడు మ్యాచ్‌ల టీ20 సిరీస్‌తో పాటు తొలి వన్డే సైతం సజావుగా సాగింది. అలానే రెండో వన్డేకు కూడా వర్ష సూచన లేదని లార్డ్స్ వాతావరణ శాఖ పేర్కొంది. లార్డ్స్ మైదానం వేదికగా తొలి మ్యాచ్ జరగనుండగా.. అక్కడ ఉష్ణోగ్రతలు సాధారణంగానే నమోదుకానున్నాయి. గరిష్టంగా 24 డిగ్రీలు.. కనిష్టంగా 16 డిగ్రిల సెల్సియస్ ఉష్ణోగ్రతలు నమోదు కానున్నాయి. ఆకాశాన్ని మబ్బులు కమ్మేసే అవకాశం ఉన్నా.. వర్షం వచ్చే సూచన అయితే లేదు. ఉదయం 12 గంటల వరకు ఎండ రానుండగా.. ఆ తర్వాత పాక్షికంగా మబ్బులు కమ్మేయనున్నాయి.

పిచ్‌ ఎలా ఉంది?

లార్డ్స్‌ పిచ్‌ సంప్రదాయంగా అయితే బ్యాటింగ్‌కు అనుకూలం. కానీ గత కొన్నేళ్లుగా ఇక్కడ బౌలర్లు ఆధిపత్యం చలాయిస్తున్నారు. ఇక్కడి పరిస్థితులు పేసర్లకు సహకరిస్తాయనే అంచనాలున్నాయి. ఈ మైదానంలో వన్డే తొలి ఇన్నింగ్స్‌ సగటు స్కోరు 238గా ఉంది. ఇప్పటివరకూ ఇక్కడ జరిగిన 70 మ్యాచ్‌ల్లో 33 సార్లు మొదట బ్యాటింగ్‌ చేసిన జట్లు, 32 సార్లు ఛేదన జట్లు గెలిచాయి. టాస్ గెలిచి జట్టు ముందుగా ఫీల్డింగ్‌కు మొగ్గు చూపే అవకాశం ఉంది.

ముఖా ముఖి పోరు..

ఇప్పటివరకూ లార్డ్స్‌లో భారత్‌ ఆడిన వన్డేలు. నాలుగింట్లో గెలిచి, మూడు మ్యాచ్‌ల్లో ఓడింది. ఓ మ్యాచ్‌ టైగా ముగిసింది. ఓవరాల్‌గా వన్డే క్రికెట్లో ఇంగ్లండ్‌తో ముఖాముఖిలో భారత్‌దే కాస్త పైచేయి. ఇప్పటివరకు రెండు జట్లు 104 మ్యాచ్‌ల్లో తలపడగా భారత్‌ 56 విజయాలు సాధించింది. ఇంగ్లండ్ 43 మ్యాచ్‌ల్లో నెగ్గింది. రెండు టైగా ముగిశాయి. మూడు మ్యాచ్‌ల్లో ఫలితం రాలేదు.

కోహ్లీ దూరం..

గజ్జలో గాయానికి గురైన విరాట్‌ కోహ్లీకి ఇంకా కోలుకోలేదు. అతను రెండో వన్డేకు కూడా దూరమయ్యే అవకాశాలు కనిపిస్తున్నాయి. అతడి గాయం తీవ్రత ఎంతో ఇంకా తెలియలేదు. 'రెండో వన్డేకు కూడా విరాట్‌ కోహ్లీ దూరం కానున్నాడు. అతని గజ్జలో గాయం ఇంకా నయం కాలేదు. ' అని ఓ బీసీసీఐ అధికారి చెప్పాడు. ఇటీవల వరుస వైఫల్యాలతో కోహ్లీ విమర్శలు ఎదుర్కొంటున్న సంగతి తెలిసిందే. కపిల్‌ దేవ్‌, సెహ్వాగ్‌ వంటి మాజీ ఆటగాళ్లు టీ20 జట్టులో అతడి స్థానాన్ని ప్రశ్నించారు. కోహ్లీ స్థానంలో తొలి మ్యాచ్‌లో చోటు దక్కించుకున్న శ్రేయస్ అయ్యర్ రెండో మ్యాచ్‌లోనూ కొనసాగనున్నాడు.