'పితృత్వ సెలవులు అడగలేదు.. టీమిండియా కోసం ఆడటానికే కట్టుబడి ఉన్నా'

గ‌వాస్క‌ర్ క్లారిటీ:

1975-76 స‌మ‌యంలో కీల‌క‌మైన వెస్టిండీస్ టూర్ కోసం భారత క్రికెట్ జట్టు సిద్ధ‌మ‌వుతోంది. ఆ స‌మ‌యంలో బిడ్డ‌కు జ‌న్మ‌నివ్వ‌డానికి సిద్ధంగా ఉన్న త‌న భార్య ద‌గ్గ‌ర‌కు వెళ్ల‌డానికి సునీల్ గ‌వాస్క‌ర్ అనుమ‌తి అడిగాడ‌ని, అయినా బీసీసీఐ బోర్డు మాత్రం అందుకు అనుమ‌తించ‌లేద‌ని వార్త‌లు వ‌చ్చాయి. అయితే ఈ వార్తలపై గ‌వాస్క‌ర్ తాజాగా క్లారిటీ ఇచ్చాడు. సోషల్ మీడియాలో వస్తున్న వార్త‌లో కొంత నిజం ఉంది కానీ తాను పితృత్వ సెల‌వు అడ‌గ‌టం మాత్రం నిజం కాద‌ని స‌న్నీ స్పష్టం చేశాడు.

పితృత్వ సెల‌వులు అడగలేదు:

తాజాగా ఓ జాతీయ మీడియాతో సునీల్ గ‌వాస్క‌ర్ మాట్లాడుతూ... 'ఈ వార్త‌లో కొంత నిజం ఉంది కానీ నేను పితృత్వ సెల‌వులు అడ‌గ‌టం మాత్రం నిజం కాదు. నేను న్యూజిలాండ్‌, వెస్టిండీస్ పర్యటనల కోసం బ‌య‌లుదేరిన‌ప్పుడు నా భార్య ఏ స‌మ‌యంలో అయినా బిడ్డ‌కు జన్మ‌నివ్వ‌నుంద‌న్న విష‌యం నాకు తెలుసు. అయినా నేను టీమ్‌కు ఆడ‌టానికే ప్రాధాన్యం ఇచ్చాను. ఈ విషయంలో నాకు నా భార్య కూడా మద్దతుగా నిలిచింది' అని చెప్పాడు.

అందుకు ఒప్పుకోలేదు:

'న్యూజిలాండ్‌తో మూడో టెస్ట్‌లో నేను గాయ‌ప‌డ్డాడు. నాలుగు వారాల విశ్రాంతి అవ‌స‌రం అని డాక్ట‌ర్లు చెప్పారు. వెస్టిండీస్ టూర్‌కు మ‌ధ్య‌లో మూడు వారాల స‌మ‌యం ఉండ‌టంతో ఆ లోపు ఇండియాకు వెళ్లి, తొలి టెస్ట్‌కు ముందే నేరుగా విండీస్‌లో టీమ్‌తో చేర‌తా అని బోర్డును అడిగా' స‌న్నీ చెప్పాడు. అయితే అప్ప‌టి టీమ్ మేనేజ‌ర్ పాలీ ఉమ్రిగ‌ర్ అందుకు ఒప్పుకోలేద‌ని, దీంతో తాను గాయం నుంచి పూర్తిగా కోలుకోక‌పోయినా తొలి టెస్ట్‌లో ఆడినట్లు గ‌వాస్క‌ర్ తెలిపాడు. గవాస్కర్ టెస్టుల్లో తనదైన ముద్ర వేసిన విషయం తెలిసిందే. 34 సెంచరీలతో 10122 రన్స్ చేశాడు.

కోహ్లీ లేకున్నా పర్వాలేదు:

ఇటీవల సునీల్ గవాస్కర్ మాట్లాడుతూ... 'మనం ఓసారి గణాంకాలను పరిశీలిస్తే.. విరాట్‌ కోహ్లీ ఆడని ప్రతీ మ్యాచ్‌లో భారత్‌ విజయం సాధించింది. ధర్మశాలలో ఆస్ట్రేలియాపై, అఫ్గానిస్థాన్‌ మీద ఒక టెస్టు. నిదహాస్‌ ట్రోఫీ, 2018 ఆసియా కప్‌ ఇలా ఎప్పుడు చూసినా.. కోహ్లీ లేని మ్యాచ్‌ల్లో భరత్ గెలుపొందింది. కోహ్లీ లేనప్పుడు ఇతర ఆటగాళ్లు బాగా ఆడడానికి ప్రయత్నిస్తారు. అతడు లేని లోటును భర్తీ చేయాలని అర్థం చేసుకుంటారు. అందుకే టీమిండియా రాణిస్తోంది' అని చెప్పుకొచ్చాడు.

'విరాట్ కోహ్లీ లేకుండా గెలిస్తే.. టీమిండియాకు ఏడాదంతా సంబరాలే'