ఆసీస్ గడ్డపై భంగపడిన చోటే సత్తా చాటిన పూజారా

నెమ్మదిగా ఆడుతున్నాడనే కారణం చూపుతూ

నాలుగేళ్ల క్రితం ఇలానే సిడ్నీ వేదికగా ఆఖరి టెస్టు మ్యాచ్ జరిగింది. ఆ సమయంలో నెమ్మదిగా ఆడుతున్నాడనే కారణం చూపుతూ పూజారాను టీమిండియా మేనేజ్‌మెంట్ వేటుకు గురిచేసింది. అప్పట్లో నాలుగో టెస్టుకి ముందు జరిగిన 3 టెస్టుల్లోనూ 33.2 సగటుతో పుజారా 201 పరుగులే చేశాడు. దీంతో.. అతడ్ని ఆఖరి టెస్టుకి పక్కన పెట్టింది. కానీ.. తాజాగా ఆస్ట్రేలియా పర్యటనలో టీమిండియా పాలిట ఆపద్బాంధవుడిలా నిలిచాడు.

కాస్తలో డబుల్ సెంచరీ మిస్ చేసుకున్నా..

ఇప్పటికే అడిలైడ్, మెల్‌బౌ‌ర్న్ టెస్టుల్లో సెంచరీలు సాధించి భారత విజయంలో క్రియాశీలక పాత్ర పోషించిన పుజారా.. సిడ్నీలోనూ అదే తరహా ప్రదర్శన చూపించాడు. గురువారం తొలి ఇన్నింగ్స్ ఆరంభంలో విరాట్ కోహ్లీ (23), అజింక్య రహానె (18), లోకేశ్ రాహుల్ (9) పేలవంగా విఫలమైయ్యారు. ఈ నేపథ్యంలో అనితర సాధ్యమైన ఇన్నింగ్స్‌తో చెలరేగాడు పూజారా. అయితే.. కాస్తలో డబుల్ సెంచరీ మిస్ చేసుకున్నా.. అతని కెరీర్‌లో మాత్రం ఇదో బెస్ట్ ఇన్నింగ్స్‌‌గా నిలిచిపోతుందనడంలో సందేహం లేదు.

క్రమంగా దూకుడు పెంచిన పూజారా

గురువారం ఆరంభమైన ఈ టెస్టు మ్యాచ్‌లో ఇన్నింగ్స్‌ రెండో ఓవర్‌లోనే కేఎల్ రాహుల్ ఔటవడంతో క్రీజులోకి వచ్చిన చతేశ్వర్ పుజారా.. గురువారం 3 సెషన్లు, శుక్రవారం ఒకటిన్నర సెషన్ సహనంతో బ్యాటింగ్ చేశాడు. ఓ ఎండ్‌లో వికెట్లు పడుతున్నా.. మొక్కవోని దీక్షతో బ్యాటింగ్ చేసిన ఈ మిడిలార్డర్ బ్యాట్స్‌మెన్.. తొలి 59 బంతుల్లో చేసిన పరుగులు 16 మాత్రమే. అయితే.. అప్పటికే నిలదొక్కుకున్న పూజారా క్రమంగా దూకుడు పెంచాడు.

ద్రవిడ్‌ను దాటి దశాబ్దాల నాటి రికార్డు బద్దలుకొట్టిన పూజారా

3 డబుల్ సెంచరీలు, 18 సెంచరీలు, 20 హాఫ్ సెంచరీలు

ఈ క్రమంలోనే 134 బంతుల్లో హాఫ్ సెంచరీని పూర్తి చేసుకున్న పుజారా.. మరో 65 బంతుల్లో సెంచరీని, 282 బంతుల్లో 150 పరుగుల మైలురాయిని అందుకుని డబుల్ సెంచరీకి చేరువైయ్యాడు. కానీ.. వ్యక్తిగత స్కోరు 193 వద్ద స్పిన్నర్ నాథన్ లయన్ బౌలింగ్‌లో క్రీజు వెలుపలికి వచ్చి భారీ షాట్ ఆడబోయి అతనికే క్యాచ్ ఇచ్చి ఔటయ్యాడు. పుజారా టెస్టు కెరీర్‌లో ఇప్పటికే 3 డబుల్ సెంచరీలు, 18 సెంచరీలు, 20 హాఫ్ సెంచరీలు కూడా ఉన్నాయి.