ఒకే ఓవర్‌లో 30 రన్స్ ఇచ్చి.. నా గర్ల్‌ఫ్రెండ్ ముందు వెక్కివెక్కి ఏడ్చా: ఇషాంత్

ఏదో ద్రోహం చేసాననే..

‘2013లో నా జీవితం మలుపు తిరిగింది. అదే ఏడాది మొహాలి వేదికగా ఆస్ట్రేలియాతో జరిగిన ఓ వన్డేలో జేమ్స్ ఫాల్కనర్.. నేను వేసిన ఒకే ఓవర్లో 30 పరుగులు పిండుకున్నాడు. ఓటమి అంచుకు చేరుకున్న ఆసీస్‌కు అద్భుత విజయాన్నందించాడు. ఆ సమయంలో నా దేశానికి నేను ద్రోహం చేసానని ఫీలింగ్ నన్ను వెంటాడింది. ఎవరితో మాట్లాడకుండా రెండు, మూడు వారాలు వెక్కివెక్కి ఏడ్చాను.

నా గర్ల్‌ఫ్రెండ్ ముందు బోరుమన్నా..

నీ కన్నా ధైర్యమైన వ్యక్తిని ఎక్కడా చూడలేదని మా అమ్మ నాతో అనేది. కానీ నేను మాత్రం నా గర్ల్ ఫ్రెండ్‌కు ఫోన్ చేసి చిన్నపిల్లాడిలా ఏడ్చాను. ఈ మూడు వారాలు నిద్రలేని రాత్రులు గడిపాను. తిండి తినడం ఆపేసా. సరిగ్గా నిద్ర కూడా పట్టేది కాదు. టీవీ ఆన్ చేస్తే అభిమానుల విమర్శలు వినిపిస్తాయని, అవి మరింత బాధను కలిగిస్తాయని అది కూడా చేయలేదు.

ఇప్పుడు నవ్వొస్తది..

ఇప్పుడు ఆ కఠిన పరిస్థితులు తలుచుకుంటే నవ్వొస్తది. ఆ గడ్డు కాలం నుంచి గట్టెక్కడం అదృష్టంగానే భావిస్తా. మన అభిరుచి మనకు అర్థం కావాలంటే ఇలాంటి సంఘటనలు జరగాలి. ఫాల్క్‌నర్ ఘటన తర్వాత నా జీవితంలో కొన్ని మార్పులు చేసుకున్నాను. ప్రతీ విషయాన్ని సీరియస్‌గా పరిగణించడం ప్రారంభించాను. అంతకు ముందు నేను చెత్తగా ఆడితే ఎవరో ఒకరు చెబుతారులే అనుకునేవాడిని. కానీ 2013 తర్వాత ఎవరు వచ్చి చెప్పినా వినవద్దనుకున్నా. నేను తప్పుచేస్తే బాధ్యత తీసుకోవాలనుకున్నా. ఇలాచేస్తేనే జట్టుకు విజయాన్నందించే ప్రదర్శన కనబర్చగలం'అని ఇషాంత్ అభిప్రాయపడ్డాడు.

ఇషాంత్ వల్ల గెలిచే మ్యాచ్..

ఇక సొంతగడ్డపై ఆస్ట్రేలియాతో జరిగిన 7 వన్డేల సిరీస్‌లో భాగంగా మొహాలి వేదికగా జరిగిన మూడో మ్యాచ్‌లో ఫాల్కనర్ చేతిలో ఇషాంత్ బలయ్యాడు. 18 బంతుల్లో 44 పరుగులు చేయాల్సిన క్రమంలో అప్పటి భారత కెప్టెన్ మహేంద్ర సింగ్ ధోనీ.. ఇషాంత్‌కు బంతినివ్వగా అతను నాలుగు సిక్స్‌లతో 30 పరుగులు సమర్పించుకున్నాడు. దీంతో మ్యాచ్ ఆస్ట్రేలివైపు తిరిగి 4 వికెట్లతో గెలుపొందింది.ఈ విజయంతో సిరీస్‌లో 2-1తో ఆధిక్యంలో నిలిచింది. ఇక ఆ మ్యాచ్‌లో కేవలం 29 బంతుల్లోనే 64 పరుగులు చేసి అద్భుత విజయాన్నందించిన ఫాల్కనర్‌కు మ్యాన్ ఆఫ్ ది మ్యాచ్ లభించింది. ఈ మ్యాచ్ అనంతరం ఇషాంత్‌ను జట్టు నుంచి తప్పించారు. దీంతో అతని ఆత్మవిశ్వాసం సన్నగిల్లడంతో పాటు కొంత డిప్రెషన్‌కు గురయ్యాడు. కాకపోతే ఆ సిరీస్‌ను భారత్ 3-2తో కైవసం చేసుకుంది. నాలుగో వన్డేలో ఫలితం తేలకపోగా.. ఐదో వన్డే రద్దయింది. ఇక 6, 7 వన్డేల్లో గెలిచిన భారత్ సిరీస్ గెలుచుకుంది.

పిల్లలను ఎప్పుడు కంటారని అడగ్గా.. అనుష్క ఏం చెప్పిందో తెలుసా?