World Test Championship: ఆసీస్ తరహాలో ఇంగ్లండ్‌ను చిత్తు చేస్తే భారత్‌‌కు ఫైనల్ బెర్త్!

ఇంగ్లండ్‌ను చిత్తు చేస్తే..

ఆస్ట్రేలియా గబ్బా కోటలను బద్దలుకొట్టి చారిత్రక విజయాన్నందుకున్న టీమిండియా చాంపియన్‌షిప్​లో అగ్రస్థానానికి చేరుకుంది. ప్రస్తుతం 71.67 విజయాల శాతంతో పాటు 430 పాయింట్లను ఖాతాలో వేసుకొని మొదటి ర్యాంకులో కొనసాగుతోంది. మరో 75 పాయింట్లు సాధించి టీమిండియా 505 పాయింట్లకు చేరుకుంటే సౌతాఫ్రికా- ఆస్ట్రేలియా సిరీస్‌తో సంబంధం లేకుండా నేరుగా ఫైనల్​కు అర్హత సాధిస్తుంది. ఆ పాయింట్లు సాధించాలంటే టీమిండియా స్వదేశంలో ఇంగ్లండ్‌తో జరిగే నాలుగు టెస్ట్‌ల సిరీస్‌లో (టెస్ట్ చాంపియన్ షిప్‌లో భారత్ చివరి సిరీస్) విజయం సాధించాలి. గెలవడమే కాదు ఇంగ్లండ్​ను 4-0, 3-0, 3-1 లేదా 2-0తో ఓడించాలి.

సౌతాఫ్రికాను ఓడిస్తేనే..

సొంతగడ్డపై భారత్​ చేతిలో సిరీస్ కోల్పోయిన ఆస్ట్రేలియా.. సౌతాఫ్రికా సిరీస్​కు ముందు ఒత్తిడిలో పడింది. ప్రస్తుతం ఆసీస్ 69.16 విజయాల శాతంతో 332 పాయింట్లు సాధించి మూడో స్థానంలో ఉంది. ఒకవేళ సౌతాఫ్రికాతో టెస్టు సిరీస్​ రద్దయి, టీమిండియాపై ఇంగ్లండ్ ఓడితే ఆస్ట్రేలియా మూడో స్థానంతో సరిపెట్టుకుని ఫైనల్స్ నుంచి నిష్క్రమిస్తుంది. ఆస్ట్రేలియా ఫైనల్​కు అర్హత సాధించాలంటే మాత్రం సౌతాఫ్రికాను 3-0 లేదా 2-0 తేడాతో ఓడించాలి.

భారత్‌ను ఓడిస్తేనే..

ప్రస్తుతం ఇంగ్లాండ్ 65.2 విజయాల శాతంతో 352 పాయింట్లతో నాలుగో స్థానంలో కొనసాగుతోంది. ఈ జట్టు ఫైనల్స్​కు అర్హత సాధించాలంటే శ్రీలంకతో జరిగే చివరి టెస్టును గెలిచి.. తర్వాత భారత్‌తో సిరీస్​ను కైవసం చేసుకోవాల్సి ఉంటుంది. కానీ స్వదేశంలో భారత్​కు మంచి రికార్డుంది. గత ఎనిమిదేళ్లలో భారత్ సొంత గడ్డపై ఒకే ఒక టెస్టు ఓడిపోయింది.

అలా జరిగితేనే..

ఇప్పటికే ఐదు సిరీస్​లు పూర్తి చేసుకున్న న్యూజిలాండ్ ప్రస్తుతం 70 విజయాల శాతం, 420 పాయింట్లతో రెండో స్థానంలో కొనసాగుతోంది. ఇప్పటివరకు 11 మ్యాచ్​లు ఆడిన కివీస్​ ఏడు గెలిచి నాలుగింటిలో ఓడింది. ఒకవేళ ఆస్ట్రేలియా.. సౌతాఫ్రికాపై గెలిచి, టీమిండియా.. ఇంగ్లండ్​ను ఓడిస్తే కివీస్ ఫైనల్స్ నుంచి వైదొలుగుతుంది.

వరుసగా ఐదు, ఆరు, ఏడు స్థానాల్లో ఉన్న సౌతాఫ్రికా, పాకిస్థాన్, శ్రీలంక టెస్ట్ ఛాంపియన్ షిప్ ఫైనల్స్ రేసు నుంచి ఇప్పటికే నిష్క్రమించాయి.