అతని కోసమే వైభవ్ సూర్యవంశీకి అవకాశం ఇవ్వలేదు: టీమిండియా కోచ్

టీమిండియా ఓపెనర్ సంజూ శాంసన్ కోసమే వైభవ్ సూర్యవంశీకి అవకాశం ఇవ్వలేదని అసిస్టెంట్ కోచ్ ర్యాన్ టెన్ డస్కాటే తెలిపాడు. వైభవ్ సూర్యవంశీ ప్రతిభ విషయంలో తమకు ఎలాంటి సందేహం లేదని, ఆటగాళ్లకు భరోసా ఇవ్వాలనే ఉద్దేశంతోనే ఆడించలేదని వివరణ ఇచ్చాడు. వైభవ్ సూర్యవంశీ ఆటను ప్రత్యక్షంగా చూసేందుకు తామంతా ఆసక్తిగా ఎదురు చూస్తున్నామని తెలిపాడు.

ఐర్లాండ్‌తో రెండు టీ20ల సిరీస్‌లో టీమిండియా 0-2తో క్లీన్ స్వీప్ అయిన సంగతి తెలిసిందే. ఈ సిరీస్‌కు వైభవ్ సూర్యవంశీ ఎంపికైనా రెండు మ్యాచ్‌ల్లో తుది జట్టులోకి తీసుకోలేదు. దాంతో అతను వాటర్ బాయ్‌గా డ్రింక్స్ మోసాడు. సూపర్ ఫామ్‌లో ఉన్న వైభవ్ సూర్యవంశీని ఆడించకపోవడంతోనే టీమిండియా చిత్తుగా ఓడిందని ఫ్యాన్స్ ఆగ్రహం వ్యక్తం చేస్తున్నారు. ఈ రెండు మ్యాచ్‌ల్లో టీమిండియా బ్యాటింగ్‌లోనే విఫలమవడంతో ఈ విమర్శలు మరింత ఎక్కువయ్యాయి.

ఆ సింగిల్ వల్లే భారత్ ఓడింది: దినేశ్ కార్తీక్

సంజూ కోసమే..

ఆదివారం జరిగిన రెండో టీ20లో భారత్ ఒక్క పరుగు తేడాతో ఓటమిపాలైంది. ఈ రెండు మ్యాచ్‌ల్లోనూ సంజూ శాంసన్‌తో పాటు ఇషాన్ కిషన్ దారుణంగా విఫలమయ్యాడు. ఈ మ్యాచ్ అనంతరం మీడియా సమావేశంలో పాల్గొన్న డస్కాటేను వైభవ్ సూర్యవంశీని ఆడించకపోవడంపై ప్రశ్నించగా.. సంజూ శాంసన్ కోసమే ఇలా చేశామని బదులిచ్చాడు.

'వైభవ్ సూర్యవంశీ అంతర్జాతీయ క్రికెట్ ఆడేందుకు సిద్దంగా ఉన్నాడు. అందులో ఎలాంటి సందేహం లేదు. అదే సమయంలో సంజూ శాంసన్ వంటి ప్రపంచకప్ హీరో కూడా జట్టులోనే ఉన్నాడు. ఐపీఎల్‌లో ఈ ఇద్దరూ మెరుగైన ప్రదర్శన కనబర్చారు. ఆటగాళ్లకు భరోసా ఇవ్వడంతో పాటు జట్టులో వారికి తగినంత సమయం కల్పిస్తామనే సందేశాన్ని ఇవ్వడం చాలా ముఖ్యం.

ఈ క్రమంలోనే వైభవ్‌ను ఆడించలేకపోయాం. మేం కూడా వైభవ్ సూర్యవంశీ ఆటను ప్రత్యక్షంగా చూసేందుకు ఆసక్తిగా ఎదురు చూస్తున్నాం. ఇతర అరంగేట్ర ఆటగాళ్లకు ఎలాంటి విధానం ఉంటుందో.. వైభవ్ విషయంలోనూ అదే వర్తిస్తుంది. అతని ఆటతీరుపై మాకు ఎలాంటి సందేహాలు లేవు'అని ర్యాన్ టెన్ డస్కాటే చెప్పుకొచ్చాడు.

ఇంత టాలెంటెడ్‌ను కోచ్‌గా పెట్టుకోలేం: గంభీర్‌పై ఐస్‌లాండ్ క్రికెట్ సెటైర్స్!

పిచ్‌ను అర్థం చేసుకోలేక..

ఈ సిరీస్ పరాజయంపై డస్కాటే విచారం వ్యక్తం చేశాడు. ఈ పరాజయాన్ని నమ్మలేకపోతున్నామని చెప్పాడు. 'ఇప్పటికీ ఈ సిరీస్ ఓటమిని మేం నమ్మలేకపోతున్నాం. ప్రపంచకప్ గెలిచిన జట్టుకు ఇలాంటి పరాజయం ఎదురవుతుందని ఎవరూ ఊహించి ఉండరు. బేసిక్స్‌ను బాగా పాటించిన జట్టులో చేతిలో ఓటమిపాలయ్యాం. ఇంకాస్త తెలివిగా ఆడిల్సిన అవసరం ఉందని గ్రహించాం.

భిన్నమైన పరిస్థితులకు త్వరగా అలవాటు పడాలి. ఈ విషయంలో మేం వెనుకబడిపోయాం. అదే మా ఓటమికి ప్రధాన కారణమైంది. ఇప్పటి వరకు స్వేచ్ఛగా సిక్స్‌లు కొట్టేందుకు, దూకుడుగా ఆడేందుకు బాగా అలవాటు పడిపోయాం. కానీ ఐర్లాండ్ పరిస్థితులు భిన్నం. ఆ సమస్యను సరిగ్గా గుర్తించలేకపోయాం. ఇంగ్లండ్‌లోనూ ఇలాంటి పరిస్థితులే ఉండొచ్చు. కానీ పిచ్‌లు కాస్త వేగంగా ఉండే అవకాశం ఉంది. అక్కడ గెలవాలంటే మా ఆట తీరే కాకుండా పరిస్థితులకు అనుగుణంగా ఆడాల్సిందే.'అని డస్కాటే చెప్పుకొచ్చాడు.