పాపం సూరీడు.. కైల్ మేయర్స్ స్టన్నింగ్ త్రో‌కు బలి! (వీడియో)

గయానా: టీమిండియా స్టార్ బ్యాటర్, మిస్టర్ 360 సూర్యకుమార్ యాదవ్ తన పేలవ ఫామ్‌ను కొనసాగిస్తున్నాడు. వెస్టిండీస్ జరుగుతున్న రెండో టీ20లోనూ సూర్యకుమార్ యాదవ్(1) విఫలమయ్యాడు. 3 బంతులు మాత్రమే ఎదుర్కొన్న సూర్యకుమార్ దురదృష్టవశాత్తు రనౌట్‌గా వెనుదిరిగాడు. వెస్టిండీస్ ఫీల్డర్ కైల్ మేయర్స్ స్టన్నింగ్స్‌ త్రోకు సూర్య బలయ్యాడు.

ప్రస్తుతం ఈ రనౌట్‌కు సంబంధించిన వీడియో నెట్టింట వైరల్‌గా మారింది. భారత ఇన్నింగ్స్ నాలుగో ఓవర్‌లో ఈ ఘటన చోటు చేసుకుంది. ఒబెడ్ మెక్‌కాయ్ వేసిన ఈ ఓవర్ మూడో బంతిని ఇషాన్ కిషన్ మిడ్‌వికెట్ దిశగా ఆడి క్విక్ సింగిల్ తీసే ప్రయత్నం చేశాడు. అక్కడే ఫీల్డింగ్ చేస్తున్న కైల్ మేయర్స్ బంతిని అంతే వేగంగా అందుకొని బ్యాటింగ్‌ వైపు నేరుగా వికెట్లకు కొట్టాడు.

IND vs WI: Kyle Mayers Nails A Stunning Direct Hit to Dismiss Suryakumar Yadav goes viral — Image Credit: Twitter

కైల్ మేయర్స్ మెరుపు త్రోకు సూర్యకుమార్ యాదవ్ డైవ్ కొట్టినా ఫలితం లేకపోయింది. దాంతో సూర్య రనౌట్‌గా వెనుదిరిగాడు. ఫీల్డర్‌ను చూసుకోకుండా పరుగుకు ప్రయత్నించడమే సూర్య కొంపముంచింది. ఈ రనౌట్ నేపథ్యంలో సూర్యపై అభిమానులు సానుభూతిని వ్యక్తం చేస్తున్నారు. 'పాపం సూరీడు.. రనౌట్‌కు బలయ్యాడు'అని కామెంట్ చేస్తున్నారు.

మరికొందరు మాత్రం కైల్ మేయర్స్ సూపర్ ఫీల్డింగ్‌ను కొనియాడుతున్నారు. ప్రతీ మ్యాచ్‌లో కైల్ మేయర్స్.. ఫీల్డింగ్‌లో తన మార్క్ చూపిస్తున్నాడని ప్రశంసిస్తున్నారు. ఈ మ్యాచ్‌లో టాస్ గెలిచి బ్యాటింగ్‌కు దిగిన టీమిండియాకు ఆరంభంలోనే గట్టి షాక్ తగిలింది. ఓపెనర్ శుభ్‌మన్ గిల్(7) మరోసారి విఫలమయ్యాడు. ఆ వెంటనే సూర్య రనౌటవ్వడంతో భారత్ 18 పరుగులకే 2 వికెట్లు కోల్పోయింది.

ఈ పరిస్థితుల్లో క్రీజులోకి వచ్చిన తిలక్ వర్మ, ఇషాన్ కిషన్(27) జట్టును ఆదుకున్నారు. 42 పరుగుల భాగస్వామ్యంతో క్రీజులో పాతుకుపోయిన ఈ జోడీని రొమారియో షెఫర్డ్ విడదీసాడు. ఇషాన్‌ కిషన్‌ను క్లీన్ బౌల్డ్ చేశాడు. ఆ వెంటనే సంజూ శాంసన్ కూడా కీపర్ క్యాచ్‌గా వెనుదిరగడంతో భారత్ 76 పరుగులకే నాలుగు వికెట్లు కోల్పోయింది. క్రీజులోకి వచ్చిన కెప్టెన్ హార్దిక్ పాండ్యాతో కలిసి తిలక్ వర్మ ఇన్నింగ్స్‌ను ముందుకు నడిపిస్తున్నాడు.