ఫాలో-ఆన్ వ్యూహం బెడిసి కొట్టిందా? గెలిచే మ్యాచ్‌ను భారత్ చేజార్చుకుందా?

శ్రీలంకతో రెండో టెస్ట్‌లో టీమిండియాకు అనూహ్య ఫలితం ఎదురైంది. విజయం ఖాయమనుకున్న మ్యాచ్‌‌ డ్రాగా ముగిసింది. సోనాల్ దినుషా(264 బంతుల్లో 8 ఫోర్లు, 2 సిక్స్‌లతో 133 నాటౌట్) అజేయ శతకంతో టీమిండియా విజయవకాశాలను దెబ్బతీసాడు. మరోవైపు ఓటమి తప్పదనుకున్న మ్యాచ్‌లో సోనాల్ దినుషా, టెయిలెండర్ల అద్వితీయమైన బ్యాటింగ్ ప్రదర్శనతో శ్రీలంక డ్రాతో గట్టెక్కింది. దాంతో ఈ రెండు టెస్ట్‌ల సిరీస్‌ను భారత్ 1-0తో కైవసం చేసుకుంది.

229/6 ఓవర్‌నైట్ స్కోర్‌తో ఆఖరి రోజు ఆటను ప్రారంభించిన శ్రీలంక రెండో ఇన్నింగ్స్‌ను 154 ఓవర్లలో 429/9 స్కోర్ వద్ద డ్రా చేసింది. రెండో ఇన్నింగ్స్ ఆడేందుకు తగిన ఓవర్లు లేకపోవడంతో.. శుభ్‌మన్ గిల్ షేక్ హ్యాండ్ ఇచ్చి డ్రాకు అంగీకరించాడు.

సోనాల్ దినుషా అజేయ శతకంతో పాటు పసింధు సూర్యబండార(173 బంతుల్లో 10 ఫోర్లు, సిక్స్‌తో 92), కామిందు మెండీస్(92 బంతుల్లో 2 ఫోర్లు, 3 సిక్స్‌లతో 55), కేశర నువాంత(150 బంతుల్లో 4 ఫోర్లతో 46) విలువైన పరుగులు చేశారు. భారత బౌలర్లలో మానవ్ సుతార్(3/121), రవీంద్ర జడేజా(3/94) మూడేసి వికెట్లు తీయగా.. ప్రసిధ్ కృష్ణ, మహమ్మద్ సిరాజ్, సారాన్ష్ జైన్ తలో వికెట్ తీసారు.

శ్రీలంకను ఫాలో ఆన్ ఆడించి టీమిండియా తప్పు చేసిందా? అనే చర్చ జరుగుతోంది. శ్రీలంక ముందు భారీ లక్ష్యం పెట్టి బ్యాటింగ్ చేయించి ఉంటే.. ఒత్తిడిలో వారు ఔటయ్యేవారని, కానీ ఫాలో-ఆన్ ఆడించడంతో ఎలాంటి ఒత్తిడి లేకుండా బ్యాటింగ్ చేశారని క్రికెట్ విశ్లేషకులు అభిప్రాయపడుతున్నారు.

సాధారణంగా టెస్ట్‌ల్లో ఆఖరి రోజు పిచ్ స్పిన్‌కు అనుకూలించాలని, కానీ ఈ పరిస్థితిని ముందే పసిగట్టిన శ్రీలంక.. తమకు అనుకూలమైన వికెట్‌ను సిద్దం చేసుకుందని వాపోయారు. ఈ విషయాన్ని గ్రహించడంలో భారత మేనేజ్‌మెంట్ విఫలమైందని మండిపడుతున్నారు.

సంక్షిప్త స్కోర్లు..

భారత్ తొలి ఇన్నింగ్స్ 503/9 డిక్లేర్డ్ (దేవదత్ పడిక్కల్ 117, ధ్రువ్ జురెల్ 115 నాటౌట్)

శ్రీలంక తొలి ఇన్నింగ్స్ 290 ఆలౌట్(పసిందు సూర్యబండార 80, సోనాల్ దినుషా 103)

శ్రీలంక రెండో ఇన్నింగ్స్ 429/9డిక్లేర్డ్(పసిందు సూర్యబండార 92, కామిందు మెండీస్ 55, సోనాల్ దినుషా 133 నాటౌట్)