IND vs SA: సౌతాఫ్రికాతో మూడో టెస్ట్.. టీమిండియాను కలవరపెడుతున్న చెత్త రికార్డు!

1992-93లో ఫస్ట్ టెస్ట్..

ఇప్పటివరకు కేప్​టౌన్ మైదానంలో భారత్ ఐదు టెస్టు మ్యాచ్​లు ఆడగా.. ఇందులో రెండు డ్రాగా ముగియగా.. మూడు మ్యాచ్​ల్లో ఓటమిపాలైంది. 1992-93లో కేప్‌టౌన్ వేదికగా ఇరు జట్ల మధ్య తొలి మ్యాచ్ జరగ్గా.. డ్రాగా ముగిసింది. ఆ పర్యటనలో నాలుగో టెస్ట్ ఈ మైదానం వేదికగా జరగా.. ఈ సిరీస్‌ను సౌతాఫ్రికా 1-0తో కైవసం చేసుకుంది.

1997లో జరిగిన మూడు టెస్టు మ్యాచ్​ల సిరీస్​లో రెండో టెస్టు కేప్​టౌన్ వేదికగా జరిగింది. అప్పటికే మొదటి టెస్టును 328 పరుగుల తేడాతో గెలుచుకుని జోరుమీదున్న సఫారీసేన.. రెండో టెస్టులోనూ ఘనవిజయం సాధించింది. 282 పరుగుల భారీ తేడాతో గెలుపొందింది. అయితే ఈ మ్యాచ్​లో సచిన్, అజారుద్దీన్ నెలకొల్పిన 222 పరుగుల భాగస్వామ్యం అందరినీ ఆకట్టుకుంది. టెండూల్కర్​ 169 పరుగులతో సత్తాచాటగా, అజారుద్దీన్ 115 పరుగులు సాధించాడు.

తొలి విజయం సాధించిన..

2006-07 పర్యటన‌లో తొలి మ్యాచ్ గెలిచిన టీమిండియా.. సౌతాఫ్రికా గడ్డపై తొలిసారి ఓ టెస్టు మ్యాచ్​ విజయం సాధించింది. కానీ ఆ తర్వాత బలంగా పుంజుకున్న సౌతాఫ్రికా.. డర్బన్ వేదికగా జరిగిన రెండో టెస్టులో విజయంతో సిరీస్​ను సమం చేసింది. ఇక చివరిదైన మూడో టెస్టు కేప్​టౌన్ వేదికగా జరగగా.. ఈ మ్యాచ్​లో సౌతాఫ్రికా 5 వికెట్ల తేడాతో గెలుపొంది సిరీస్ కైవసం చేసుకుంది. ఈ టెస్టులో సెంచరీ బాదిన వసీం జాఫర్​.. సౌతాఫ్రికా గడ్డపై శతకం చేసిన తొలి భారత ఓపెనర్​గా రికార్డు సృష్టించాడు.

2011 - డ్రా

2011 పర్యటనలో సౌతాఫ్రికా గడ్డపై తొలిసారి టెస్టు సిరీస్​ గెలిచే అవకాశాన్ని టీమిండియా తృటిలో చేజార్చుకుంది. మూడు టెస్టుల సిరీస్​లో డర్బన్ వేదికగా జరిగిన మ్యాచ్​ను గెలిచిన ధోనీసేన.. కేప్​టౌన్​లో జరిగిన మూడో టెస్టులో విజయం దిశగా దూసుకెళ్లింది. కానీ రెండో ఇన్నింగ్స్​లో వీరోచిత శతకంతో సౌతాఫ్రికా స్టార్ ఆల్​రౌండర్ జాక్వెస్ కలిస్ మ్యాచ్​ను డ్రాగా ముగించాడు. ఇదే టెస్టులో సెంచరీ (146) బాదిన సచిన్​కు ఈ ఫార్మాట్​లో ఇదే చివరి శతకం కావడం విశేషం.

2018 పర్యటనలోనూ..

2018 పర్యటనలో తొలి టెస్టును కేప్​టౌన్ వేదికగా ఆడిన టీమిండియా... బ్యాటింగ్ వైఫల్యంతో విజయం ముంగిట బోల్తాపడింది. స్టార్ పేసర్ జస్‌ప్రీత్ బుమ్రా ఈ మ్యాచ్ ద్వారానే టెస్టు అరంగేట్రం చేశాడు. ఈ టెస్టులో తొలి ఇన్నింగ్స్​లో సౌతాఫ్రికాను 286 పరుగులకే కట్టడి చేసిన భారత్​.. తన మొదటి ఇన్నింగ్స్​లో 97 పరుగులకే 7 వికెట్లు కోల్పోయి కష్టాల్లో పడింది. కానీ ఆల్​రౌండర్ హార్దిక్ పాండ్యా 95 బంతుల్లో 93 పరుగులతో భారత్​ను గట్టెక్కించాడు. తర్వాత రెండో ఇన్నింగ్స్​లో సౌతాఫ్రికా 130 పరుగులకే ఆలౌట్ చేసిన టీమిండియా.. ఈ మ్యాచ్​లో విజయం సాధించే అవకాశాన్ని చేజిక్కించుకుంది. కానీ భారత బ్యాటర్లు విఫలమవడం వల్ల 135 పరుగులకే ఆలౌటై 72 పరుగుల తేడాతో ఓటమిపాలైంది.