IND vs NZ: అందుకే వరుణ్ చక్రవర్తీని తీసుకున్నాం: రోహిత్ శర్మ

ఐసీసీ ఛాంపియన్స్ ట్రోఫీ 2025లో భాగంగా టీమిండియాతో జరుగుతున్న ఆఖరి లీగ్ మ్యాచ్‌లో న్యూజిలాండ్ టాస్ గెలిచి బౌలింగ్ ఎంచుకుంది. పిచ్ కండిషన్స్ నేపథ్యంలోనే ఈ నిర్ణయం తీసుకున్నానని న్యూజిలాండ్ కెప్టెన్ మిచెల్ సాంట్నర్ అన్నాడు. 'మేం ముందుగా బౌలింగ్ చేస్తాం. పిచ్ చూడటానికి బాగుంది. ఆరంభంలోనే భారత్‌పై ఒత్తిడి పెట్టాలనుకుంటున్నాం. ఆ తర్వాత పిచ్ స్కిడ్ అవుతుందని భావిస్తున్నాం. ఈ మ్యాచ్ ఎలాగైనా గెలవాలనుకుంటున్నాం. మేం లాహోర్‌లో సెమీస్ ఆడుతామనే విషయం తెలుసు. కానీ మా బాధ్యతను మేం నిర్వర్తించాలి. డెవాన్ కాన్వే ఈ మ్యాచ్‌కు దూరం కాగా.. డారిల్ మిచెల్ జట్టులోకి వచ్చాడు.'అని మిచెల్ సాంట్నర్ తెలిపాడు.

మరోవైపు టీమిండియా వరుసగా 13వ వన్డేలోనూ టాస్ ఓడిపోయింది. టాస్ గెలిచినా తాము బ్యాటింగే ఎంచుకునేవాళ్లమని టీమిండియా కెప్టెన్ రోహిత్ శర్మ స్పష్టం చేశాడు. 'మేం ఈ మ్యాచ్‌లో ముందుగానే బ్యాటింగ్ చేయాలనుకున్నాం. టాస్ ఓడినా మేం కోరుకున్నదే జరిగింది. గత రెండు మ్యాచ్‌ల్లో చేజింగ్ చేసిన మేం ఈ మ్యాచ్‌లో మమ్మల్ని మేం పరీక్షించుకోవాలనుకుంటున్నాం. గత రెండు మ్యాచ్‌ల తరహాలోనే మా అప్రోచ్ ఉంటుంది. తుది జట్టులో ఒకే ఒక్క మార్పు చేశాం.

Photo Credit: BCCI

హర్షిత్ రాణాకు రెస్ట్ ఇచ్చి వరుణ్ చక్రవర్తీని జట్టులోకి తీసుకున్నాం. గత రెండు మ్యాచ్‌ల్లో మేం 19 వికెట్లు పడగొట్టాం. మా స్పిన్నర్లు అద్భుతంగా కట్టడి చేశారు. ఆ తర్వాత పేసర్లు వికెట్లు సాధించారు. బౌలింగ్‌లో సమష్టిగా రాణించడంతోనే విజయాలు దక్కాయి. ఈ క్రమంలోనే స్పిన్ బలాన్ని పెంచేందుకు వరుణ్ చక్రవర్తీని జట్టులోకి తీసుకున్నాం.'అని రోహిత్ శర్మ చెప్పుకొచ్చాడు. వరుణ్ చక్రవర్తీ రాకతో టీమిండియా ఈ మ్యాచ్‌లో నలుగురు స్పిన్నర్లతో ఆడుతోంది.

తుది జట్లు:

భారత్: రోహిత్ శర్మ, శుభ్‌మన్ గిల్, విరాట్ కోహ్లీ, శ్రేయస్ అయ్యర్, కేఎల్ రాహుల్, అక్షర్ పటేల్, హార్దిక్ పాండ్యా, రవీంద్ర జడేజా, కుల్దీప్ యాదవ్, మహమ్మద్ షమీ, వరుణ్ చక్రవర్తీ

న్యూజిలాండ్: విల్ యంగ్, రచిన్ రవీంద్ర, కేన్ విలియమ్సన్, డారిల్ మిచెల్, టామ్ లాథమ్(కీపర్), గ్లేన్ ఫిలిప్స్, మైకేల్ బ్రేస్‌వెల్, మిచెల్ సాంట్నర్(కెప్టెన్), కైల్ జెమీసన్, మ్యాట్ హెన్రీ, విల్ రూర్కీ.