IND vs ENG 2nd T20I: వైభవ్ సూర్యవంశీ అరంగేట్రం.. సంజూపై వేటు!

ఇంగ్లండ్‌తో ఐదు టీ20ల సిరీస్‌‌లో భాగంగా జరుగుతున్న రెండో టీ20లో టీమిండియా టాస్ గెలిచి బ్యాటింగ్ ఎంచుకుంది. పిచ్ కండిషన్స్ నేపథ్యంలోనే ఈ నిర్ణయం తీసుకున్నానని టీమిండియా టీ20 కెప్టెన్ శ్రేయస్ అయ్యర్ తెలిపాడు. తుది జట్టులో ఒక మార్పు చేశామని చెప్పిన అయ్యర్.. సంజూ శాంసన్ స్థానంలో వైభవ్ సూర్యవంశీ అరంగేట్రం చేస్తున్నాడని తెలిపాడు.

ప్రపంచకప్‌లో వయాగ్రా వాడనున్న ఇంగ్లండ్ ప్లేయర్లు

వైభవ్ పూర్తిగా అర్హుడు..

'మేం ఈ మ్యాచ్‌లో కూడా ముందుగా బ్యాటింగ్ చేస్తాం. మా జట్టులో ఒక మార్పు ఉంది. సంజూ స్థానంలో వైభవ్ సూర్యవంశీ జట్టులోకి వచ్చాడు. గత కొద్ది రోజులు వైభవ్ అద్భుతంగా బ్యాటింగ్ చేస్తున్నాడు. ఈ నిర్ణయం తీసుకోవడం కష్టంగా ఏం అనిపించలేదు. అతను ఈ జట్టులో ఉండేందుకు పూర్తిగా అర్హుడు. అతను ఎలాంటి ఒత్తిడినైనా పట్టించుకోడు. చాలా నిశ్చలమైన స్వభావం కలవాడు. అప్‌కమింగ్ మ్యాచ్‌ల్లో ఏం జరగబోతుందో అతనికి బాగా తెలుసు.

అతను నెట్స్‌లో బ్యాటింగ్ చేసే విధానం, బౌలర్లను ఎదుర్కొనే తీరు.. అతను ఎలాంటి ఆటగాడో తెలియజేస్తోంది. జట్టులో ప్రస్తుతం తీవ్రమైన పోటీ ఉంది. మ్యాచ్ మ్యాచ్‌కు పరిస్థితి మారుతోంది. భారత్ అందిస్తున్న ప్రతిభను చూడటం ఎంతో సంతోషాన్నిస్తుంది. ఈ పోటీ ఆటగాళ్లుగా మమ్మల్ని ఎల్లప్పుడూ అప్రమత్తంగా ఉంచుతుంది. ఒత్తిడి అనేది ఒక గౌరవంగా నేను భావిస్తాను.'అని శ్రేయస్ అయ్యర్ చెప్పుకొచ్చాడు.

తిలక్ చేతుల మీదుగా..

టాస్‌కు ముందు వైస్ కెప్టెన్ తిలక్ వర్మ చేతుల మీదుగా వైభవ్ సూర్యవంశీ అరంగేట్ర క్యాప్ అందుకున్నాడు. 15 ఏళ్ల వయసులోనే అంతర్జాతీయ క్రికెట్‌లోకి అరంగేట్రం చేసిన తొలి భారత ఆటగాడిగా వైభవ్ నిలిచాడు. ఈ క్రమంలో సచిన్ టెండూల్కర్ రికార్డ్‌ను అధిగమించాడు. అంతేకాకుండా అంతర్జాతీయ టీ20ల్లో అరంగేట్రం చేసిన అతి పిన్న వయస్కుడిగా సరికొత్త చరిత్ర సృష్టించాడు.

మరోవైపు ఇంగ్లండ్ కెప్టెన్ టాస్ గెలిస్తే బ్యాటింగ్ ఎంచుకునేవాళ్లమని తెలిపాడు. 'మేం కూడా ముందుగా బ్యాటింగ్ చేయాలనుకున్నాం. గత మ్యాచ్ చాలా అద్భుతంగా సాగింది. దురదృష్టవశాత్తూ మేం 300 పరుగులను ఛేజ్ చేస్తే తప్ప ఆ అనుభూతిని మళ్లీ పొందలేం.

టీమ్ కాంబినేషన్ పట్ల సంతోషంగా ఉన్నాను. జోఫ్రా ఆర్చర్ జట్టులోకి తిరిగి రావడం మా బలాన్ని పెంచింది. జోష్ టంగ్ కూడా రీఎంట్రీ ఇచ్చేందుకు శ్రమిస్తున్నాడు. ఈ ఇద్దరూ చాలా నైపుణ్యం గల బౌలర్లు. ముఖ్యంగా వారి దగ్గర అద్భుతమైన స్లోయర్, ఖచ్చితమైన యార్కర్లు వేసే సామర్థ్యం ఉంది. వైభవ్ సూర్యవంశీ కోసం మేం కొద్దిగా హోమ్ వర్క్ చేశాం.'అని హ్యారీ బ్రూక్ చెప్పుకొచ్చాడు.

IND Vs ENG: వైభవ్ కోసం సంజూ‌నే ఎందుకు టార్గెట్ చేస్తున్నారు: సబా కరీం

తుది జట్లు:

భారత్ : వైభవ్ సూర్యవంశీ, అభిషేక్ శర్మ, ఇషాన్ కిషన్ (వికెట్ కీపర్), శ్రేయస్ అయ్యర్ (కెప్టెన్), తిలక్ వర్మ, శివం దూబే, హర్షిత్ రాణా, అక్షర్ పటేల్, రవి బిష్ణోయ్, అర్ష్‌దీప్ సింగ్, వరుణ్ చక్రవర్తి.

ఇంగ్లండ్: ఫిలిప్ సాల్ట్, జోస్ బట్లర్ (వికెట్ కీపర్), హ్యారీ బ్రూక్ (కెప్టెన్), జాకబ్ బెథెల్, టామ్ బాంటన్, సామ్ కరన్, విల్ జాక్స్, లియామ్ డాసన్, ఆదిల్ రషీద్, జోఫ్రా ఆర్చర్, జోష్ టంగ్.