IND vs AFG: టెస్ట్ క్రికెట్ చరిత్రలోనే తొలిసారి..!

By Uppala Shivaprasad

Published: Monday, June 8, 2026, 16:02 [IST]

టెస్ట్ క్రికెట్‌లో టీమిండియా చరిత్ర సృష్టించింది. 94 ఏళ్ల భారత క్రికెట్ చరిత్రలోనే కని వినీ ఎరుగని విజయాన్ని కైవసం చేసుకుంది. ముల్లాన్‌పూర్ వేదికగా అఫ్గానిస్థాన్‌తో సోమవారం ముగిసిన ఏకైక టెస్ట్‌లో పూర్తి ఆధిపత్యం చెలాయించిన భారత్ ఇన్నింగ్స్ 300 పరుగుల భారీ తేడాతో గెలుపొందింది.

తొలుత బ్యాటింగ్‌లో భారీ స్కోర్ చేసిన టీమిండియా.. ఆ తర్వాత తమకు అలవాటైన రీతిలో స్పిన్‌తో ప్రత్యర్థికి ఉచ్చు బిగించింది. టెస్ట్‌ల్లో భారత్‌కు ఇదే అతిపెద్ద ఇన్నింగ్స్ విజయం. 2018లో వెస్టిండీస్‌తో రాజ్‌కోట్ వేదికగా జరిగిన టెస్ట్ మ్యాచ్‌లో టీమిండియా ఇన్నింగ్స్ 272 రన్స్‌తో గెలుపొందింది. ఇప్పటి వరకు ఇదే అతిపెద్ద విజయంగా ఉండగా.. తాజా ఫలితం దాన్ని అధిగమించింది.

భారత్ గడ్డపై ఇది రెండో అతిపెద్ద టెస్ట్ విజయం. 1958లో ఈడెన్ గార్డెన్స్ వేదికగా జరిగిన మ్యాచ్‌లో భారత్‌పై వెస్టిండీస్ ఇన్నింగ్స్ 336 పరుగుల తేడాతో గెలుపొందింది. ఈ రికార్డ్ ఇప్పటికి చెక్కు చెదరకుండా ఉంది.

తాజా ఫలితంతో టెస్ట్‌ల్లో అతిపెద్ద విజయం సాధించిన రెండో ఆసియా టీమ్‌గా భారత్ నిలిచింది. ఈ జాబితాలో భారత్ కంటే పాకిస్థాన్ ముందుంది. 2002లో లాహోర్‌లో న్యూజిలాండ్‌పై పాకిస్తాన్ ఇన్నింగ్స్ & 324 పరుగుల తేడాతో గెలుపొందింది.