నాకు బౌలింగ్ చేసే బ్యాటర్లు కావాలి: హార్దిక్ పాండ్యా

బౌలింగ్ ఆప్షన్స్ కావాలి..

బీసీసీఐ నుంచి కెప్టెన్సీపై హార్దిక్ పాండ్యాకు కూడా స్పష్టమైన ఆదేశాలు అందినట్లున్నాయి. న్యూజిలాండ్ సిరీస్‌తోనే ప్రపంచకప్ సన్నాహకాలు మొదలయ్యాయని హార్దిక్ సిరీస్ ప్రారంభానికి ముందే చెప్పాడు. ఇక న్యూజిలాండ్‌తో విజయానంతరం మాట్లాడుతూ జట్టులో వీలైనన్ని బౌలింగ్ ఆప్షన్స్ ఉండాలని, బౌలింగ్ చేయగల బ్యాటర్లు కావాలని చెప్పాడు. ఆల్‌రౌండర్లను తీసుకునే యోచనలో ఉన్నట్లు స్పష్టం చేశాడు. ఇక అసాధారణ బ్యాటింగ్‌తో జట్టు విజయంలో కీలక పాత్ర పోషించిన సూర్యకుమార్ యాదవ్‌పై ప్రశంసల జల్లు కురిపించాడు.

బౌలింగ్ చేసే బ్యాటర్లు..

'ఈ మ్యాచ్‌లో ప్రతీ ఒక్కరు అద్భుతంగా రాణించారు. ముఖ్యంగా సూర్యకుమార్ యాదవ్ అసాధారణ ఇన్నింగ్స్ ఆడాడు. మేం 170-175 పరుగులు చేయాలనుకున్నాం. సూర్య సూపర్ బ్యాటింగ్ కారణంగా 20 పరుగులు అదనంగా చేశాం. బౌలర్లు కూడా అద్భుతంగా రాణించారు. దూకుడుగా బౌలింగ్ చేశాడు. ప్రతీ బంతికి వికెట్ తీయకున్నా.. దూకుడుగా బౌలింగ్ చేయడం ముఖ్యం. పరిస్థితులు బౌలర్లకు ప్రతికూలంగానే ఉన్నాయి. బంతి తడిగా మారింది. అయినా బౌలర్లు అద్భుతంగా బౌలింగ్ చేశారు. నేను చాలా బౌలింగ్ చేశాను. ఇక జట్టులో మరిన్నీ బౌలింగ్ ఆప్షన్స్ కావాలనుకుంటున్నా.

అందరికి అవకాశం ఇవ్వలేం కదా..

ప్రతీసారి బౌలర్లే రాణించాలంటే కుదురదు. కాబట్టి బౌలింగ్ చేయగల బ్యాటర్లు జట్టులో ఉండాలనుకుంటున్నా. ప్రోషెనల్ ఆల్‌రౌండర్ల కోసం వేచి చూస్తున్నా. ఇక జట్టులో మంచి వాతావరణం ఉంది. ఒకరి సక్సెస్‌ను మరొకరు ఆస్వాదిస్తున్నారు. ఇది చాలా ముఖ్యం. చివరి టీ20లో మార్పుల గురించి నాకు తెలియదు. ప్రతీ ఒక్కరికి అవకాశం ఇవ్వాలని ఉన్నా.. ఒక్కటే మ్యాచ్ మిగిలి ఉంది. కాబట్టి అందరికి అవకాశం ఇవ్వడం కుదరదు.

సూర్య సూపరో సూపర్..

ఈ మ్యాచ్‌లో ముందుగా బ్యాటింగ్ చేసిన భారత్ నిర్ణీత 20 ఓవర్లలో 6 వికెట్లకు 191 పరుగులు చేసింది. సూర్యకుమార్ యాదవ్(51 బంతుల్లో 11 ఫోర్లు, 7 సిక్స్‌లతో 111 నాటౌట్) అజేయ సెంచరీతో చెలరేగగా.. ఇషాన్ కిషన్(31 బంతుల్లో 5 ఫోర్లు, సిక్స్‌తో 36) పర్వాలేదనిపించాడు. న్యూజిలాండ్ బౌలర్లలో టీమ్ సౌథీ(3/34) హ్యాట్రిక్ వికెట్ సాధించగా.. లూకీ ఫెర్గూసన్ రెండు వికెట్లు పడగొట్టాడు.

అనంతరం న్యూజిలాండ్ 18.5 ఓవర్లలో 126 పరుగులకే కుప్పకూలింది. కేన్ విలియమ్సన్(52 బంతుల్లో 4 ఫోర్లు, 2 సిక్స్‌లతో 61) హాఫ్ సెంచరీతో రాణించగా.. మిగతా బ్యాటర్లు దారుణంగా విఫలమయ్యారు. భారత బౌలర్లలో దీపక్ హుడా (4/10) నాలుగు వికెట్లతో సత్తా చాటగా.. యుజ్వేంద్ర చాహల్, మహమ్మద్ సిరాజ్ రెండు వికెట్లు తీసారు. భువనేశ్వర్ కుమార్‌కు ఓ వికెట్ దక్కింది.