Harbhajan Singh: అఫ్గానిస్థాన్‌ను లైట్ తీసుకుంటే అంతే! టీమిండియాకు భజ్జీ వార్నింగ్!

లైట్ తీసుకుంటే అంతే..

'అఫ్గానిస్థాన్​ను తేలికగా తీసుకోవద్దు. ఆ జట్టు చాలా అనుభవం కలిగింది. అద్భుత బ్యాటర్లు, ముజిబుర్ రెహ్మన్, రషీద్ ఖాన్ లాంటి అత్యుత్తమ స్పిన్నర్లు ఆ టీమ్​లో ఉన్నారు. టీ20ల్లో ఎవరు గెలుస్తారో ఊహించడం కష్టం. తొలి 6 ఓవర్లలో ఎవరు ఆధిపత్యం చెలాయిస్తారో వారికే మ్యాచ్ గెలిచే అవకాశం ఎక్కువగా ఉంటుంది. ఆ తర్వాత మ్యాచ్​లో పుంజుకునే అవకాశం చాలా తక్కువగా ఉంటుంది. కాబట్టి జాగ్రత్తగా ఆడాల్సి ఉంటుంది'అని హర్భజన్ సింగ్ చెప్పుకొచ్చాడు. అఫ్గానిస్థాన్​పై భారత్ మెరుగైన రికార్డు ఉంది కదా అన్న ప్రశ్నకు భజ్జీ తనదైన శైలిలో బదులిచ్చాడు.

గత రికార్డులు దండుగ..

'ఓ క్రికెటర్​గా నేను గత రికార్డుల గురించి పట్టించుకోను. ఒకసారి జరిగింది మళ్లీ జరుగుతుందని చెప్పలేం. అసలు అలాంటి గణాంకాలు నా దృష్టిలో శుద్ధ దండుగ. గతంలో జరిగింది అచ్చంగా అలాగే జరుగుతుందని అనుకోకూడదు. ఉదాహరణకు పాకిస్థాన్​ను 12 సార్లు ఓడించాం. మరి 13వ సారి అలాగే గెలవాలి కదా. గతాన్ని మనం మార్చలేం. ప్రస్తుతం మన ఆట తీరు ఎలా ఉందన్న అంశాల మీదనే గెలుపోటములు ఆధారపడి ఉంటాయి. మన చేతిలో ఓడినప్పుడు అఫ్గన్‌ అప్పుడప్పుడే ఎదుగుతున్న జట్టు. కానీ ఇప్పుడు ఆ జట్టు బలంగా తయారైంది. పెద్ద జట్లను ఓడించే సామర్థ్యం ఈ జట్టుకు ఉంది" అని వెల్లడించాడు.

అఫ్గాన్‌తోనైనా..

టోర్నీలో టీమిండియా వైఫల్యం చూస్తుంటే అఫ్గాన్‌తోనైనా గెలుస్తుందా? అనే సందేహం కలుగుతోంది. అఫ్గానిస్థాన్‌పై టి20 ప్రపంచకప్‌లో రెండు సార్లు తలపడిన భారత్‌ రెండుసార్లూ గెలుపొందింది. అయితే గత కొన్నేళ్లుగా ఈ ఫార్మాట్‌లో ఆ జట్టు ఎంతో మెరుగు పడింది. ఒక ఓవర్‌ ఫలితాన్ని మార్చేసే అవకాశం ఉన్న టీ20ల్లో అఫ్గాన్‌ ఎన్నో సార్లు సంచలనాలకు చేరువగా వచ్చింది. ఈ టోర్నీలో కూడా ఆసిఫ్‌ అలీ అనూహ్యంగా చెలరేగి ఉండకపోతే పాక్‌పై కూడా అఫ్గాన్‌ గెలిచేదేమో! కాబట్టి టీమ్‌ను తక్కువగా అంచనా వేయడానికి లేదు. ఒకవైపు వికెట్లు పడినా, మరోవైపు ఆత్మరక్షణలో పడకుండా ధాటిగా ఆడుతూ చకచకా పరుగులు సాధించగల బ్యాట్స్‌మెన్‌ జట్టులో ఉన్నారు.