శుభ్‌మన్ గిల్ భారత క్రికెట్‌ను ఏలుతాడు: హర్భజన్ సింగ్

భవిష్యత్తు సారథి..

ఈ నేపథ్యంలోనే టైమ్స్ ఆఫ్ ఇండియాతో మాట్లాడిన హర్భజన్.. గిల్‌ను తన ప్రశంసలతో ఆకాశానికెత్తాడు. 'శుభ్‌మన్ గిల్‌ అద్భుతమైన ఫామ్‌లో ఉన్నాడు. అతని బ్యాటింగ్ టెక్నిక్, షాట్ సెలెక్షన్ అద్భుతంగా ఉన్నాయి. గిల్‌ బ్యాటింగ్‌ శైలీ భారత జట్టులో రోహిత్‌ శర్మ, విరాట్‌ కోహ్లి, రాహుల్‌ వంటి కీలక ఆటగాళ్లను తలపిస్తోంది. నాకైతే అతను భావి భారత కెప్టెన్‌ అవుతాడని అనిపిస్తోంది. అతనికి కెప్టెన్‌గా అనుభవం లేనప్పటకీ రాబోయే రోజుల్లో అతను నేర్చుకోనే అవకాశం ఉంది'అని హర్భజన్ సింగ్ చెప్పుకొచ్చాడు.

సచిన్‌ రికార్డు బద్దలు!

జింబాబ్వేతో మూడో వన్డేలో 130 పరుగులు సాధించిన గిల్‌ ఓ అరుదైన రికార్డును తన ఖాతాలో వేసుకున్నాడు. జింబాబ్వే గడ్డపై అత్యధిక వ్యక్తిగత స్కోర్‌ సాధించిన భారత ఆటగాడిగా గిల్‌ నిలిచాడు. అంతకుమందు ఈ రికార్డు టీమిండియా దిగ్గజం సచిన్ టెండూల్కర్ పేరిట ఉండేది. 1998లో బులవాయో వేదికగా జింబాబ్వేతో జరిగిన వన్డేలో 127 పరుగులు సాధించి సచిన్‌ అజేయంగా నిలిచాడు.

తాజా మ్యాచ్‌లో సచిన్‌ 24 ఏళ్ల రికార్డును గిల్‌ అధిగమించాడు. విదేశీ గడ్డపై సెంచరీ చేసిన మూడో పిన్న వయస్కుడిగా నిలిచిన శుభ్‌మన్.. రోహిత్ శర్మ(23 ఏళ్ల 218 రోజులు) రికార్డును అధిగమించాడు. ఈ జాబితాలో గిల్(22 ఏళ్ల 348 రోజులు) కంటే యువ రాజ్(22 ఏళ్ల 41 రోజులు), విరాట్ కోహ్లీ(22 ఏళ్ల 315 రోజులు) ముందు స్థానంలో ఉన్నారు.

రెండు అవార్డులు గిల్‌కే..

ఇక మూడో వన్డేతో పాటు ఓవరాల్‌ సిరీస్‌లో అదరగొట్టిన గిల్‌కు మ్యాన్‌ ఆఫ్‌ది మ్యాచ్‌తో పాటు సిరీస్‌ అవార్డులు వరించాయి. ఈ సిరీస్‌లో మూడు మ్యాచ్‌లు ఆడిన గిల్‌ 245 పరుగులు సాధించాడు. అతని ఇన్నింగ్స్‌లో ఒక సెంచరీ, అర్ధశతకం ఉన్నాయి. కాగా ఇప్పటి వరకు భారత్‌ తరపున 9 వన్డేలు ఆడిన గిల్‌ 499 పరుగులు చేశాడు. మూడో వన్డేలో అతను పట్టి స్టన్నింగ్ క్యాచ్‌తోనే భారత్ విజయం సాధించింది.