Sourav Ganguly Birthday: ఆ రెండూ మీకు దక్కాలి దాదా.. వెల్లువెత్తిన విషెస్!

ఆరోగ్యంగా.. ఆనందంగా..

దాదా సహచర ఆటగాళ్లు వీరేంద్ర సెహ్వాగ్‌, వీవీఎస్‌ లక్ష్మణ్‌, మహ్మద్ కైఫ్‌తో పాటు దిగ్గజాలు, ఈ తరం క్రికెటర్లు సైతం గంగూలీకి జన్మదిన శుభాకాంక్షలు తెలియజేస్తున్నారు.'అంకితభావం, దార్శనికతలో దాదాతో కొంతమందే సరిపోలుతారు. ఎప్పటిలాగే మీరు ఆరోగ్యంగా, ఆనందంగా ఉండాలి దాదా. పుట్టినరోజు శుభాకాంక్షలు దాదా 'అని వీరేంద్ర సెహ్వాగ్‌ ట్వీట్ చేయగా.. 'పుట్టినరోజు శుభాకాంక్షలు గంగూలీ. జీవితంలోనే అతిపెద్ద ఆనందం, ఆశీర్వాదాలు నీకు దక్కాలి. ఈ ఏడాదంతా బాగుండాలి'అని వీవీఎస్‌ లక్ష్మణ్‌ ట్వీట్ చేశాడు.

ఆఫ్‌సైడ్ ఆడుకునే రాకుమారుడికి..

'ఆఫ్‌సైడ్‌ ఫీల్డర్ల మధ్య బంతిని తరలించే రాకుమారుడికి.. పుట్టినరోజు శుభాకాంక్షలు'అని చెన్నై సూపర్‌కింగ్స్‌ ట్వీట్ చేయగా.. 'అతనిలోని దూకుడు, అభిరుచికి మరెవ్వరూ సరిపోరు. భారత క్రికెట్‌ను మార్చేసిన, ఎన్నో రకాలుగా జట్టులో ప్రేరణ నింపిన దాదాకు జన్మదిన శుభాకాంక్షలు'అని పంజాబ్‌ కింగ్స్‌ విష్ చేసింది. ఇక'నా కెప్టెన్‌ గంగూలీకి జన్మదిన శుభాకాంక్షలు. ఎప్పటిలాగే ప్రేమిస్తుంటాను దాదా'అని టీమిండియా వెటరన్ స్పిన్నర్ హర్భజన్‌ సింగ్‌ ట్వీట్ చేశాడు.

పుట్టకతోనే నాయకుడు

'మైదానంలో దాదా మనల్ని నడిపిస్తుంటే మనం చాలా ఉన్నతంగా కనిపిస్తాం. విఫలమైనప్పుడు భుజం తట్టి. రాణించినప్పుడు వెన్నుతట్టే కెప్టెన్‌కు జన్మదిన శుభాకాంక్షలు. దాదా పుట్టుకతోనే నాయకుడు.'అని మహ్మద్‌ కైఫ్‌ ట్వీట్ చేయగా..'జన్మదిన శుభాకాంక్షలు దాదా. టీమిండియా తరఫున మీ సారథ్యంలో అరంగేట్రాన్ని నేనెప్పటికీ మరిచిపోలేను. మీ అండదండలకు ధన్యవాదాలు'అని దినేశ్‌కార్తీక్‌ పేర్కొన్నాడు.'దాదాకు పుట్టినరోజు శుభాకాంక్షలు. భారత క్రికెట్‌ మీకెప్పటికీ రుణపడి ఉంటుంది. అన్నింట్లోనూ అత్యుత్తమ ఫలితాలను రాబట్టిన మీకు కృతజ్ఞతలు. క్రికెట్‌ పట్ల మీ అభిరుచి, అంకితభావం రాబోయే తరాలకు ఆదర్శంగా నిలుస్తాయి'అని వెటరన్ క్రికెటర్ సురేశ్‌ రైనా ట్వీట్ చేశాడు.