గంభీర్ హయాంలో ఎవడీ ప్లేస్‌కు గ్యారెంటీ లేదు సీనా!

టీమిండియా హెడ్ కోచ్ గౌతమ్ గంభీర్ నిర్ణయాలు ఏ మాత్రం అంతు పట్టడం లేదు. అతని పర్యవేక్షణలో జట్టులో ఏ ఆటగాడి ప్లేస్‌కు గ్యారెంటీ లేదనే విషయం స్పష్టమవుతోంది. టీమిండియా టెస్ట్ కెప్టెన్‌గా ఉండగానే రోహిత్ శర్మతో పాటు విరాట్ కోహ్లీలను సుదీర్ఘ ఫార్మాట్‌కు దూరం పెట్టిన విరాట్ కోహ్లీ.. ఐసీసీ టీ20 ప్రపంచకప్ 2026 గెలిచిన సూర్యకుమార్ యాదవ్‌‌పై కూడా వేటు వేసాడు.

తాజాగా 15 ఏళ్ల వైభవ్ సూర్యవంశీ కోసం సీనియర్ వికెట్ కీపర్ సంజూ శాంసన్‌ను జట్టు నుంచి తప్పించాడు. రెండో టీ20లోనే సంజూను తప్పించి వైభవ్‌ను ఆడించిన గంభీర్.. జింబాబ్ పర్యటనకు ఎంపిక చేసిన జట్టులో సంజూ పేరే లేకుండా చేశాడు. గంభీర్ నిర్ణయాలు సోషల్ మీడియా వేదికగా తీవ్ర చర్చనీయాంశమయ్యాయి.

గంభీర్ కోచింగ్ శైలి కూడా ఎవరికి అంతు చిక్కడం లేదు. టీమిండియాలో ఎంతటి పెద్ద ఆటగాడైనా సరే.. నిలకడగా రాణించకపోతే జట్టులో చోటు గ్యారెంటీ లేదనే సంకేతాన్ని గంభీర్ బలంగా పంపుతున్నాడు. 2025-26 బోర్డర్-గవాస్కర్ టెస్ట్ సిరీస్‌ సమయంలో నాటి కెప్టెన్ రోహిత్ శర్మపైనే గంభీర్ వేటు వేశారనే వార్తలు వచ్చాయి. రోహిత్ శర్మలాంటి దిగ్గజాన్నే తుది జట్టు నుంచి తప్పించగలిగిన గంభీర్‌కు.. సంజూ శాంసన్‌ను పక్కన పెట్టడం పెద్ద విషయం కాదనే చర్చ ప్రస్తుతం బీసీసీఐ వర్గాల్లో నడుస్తోంది.

టీ20 ప్రపంచకప్‌ విజయానంతరం సూర్యకుమార్ యాదవ్ కెప్టెన్సీ కోల్పోవడం దగ్గరి నుంచే గంభీర్ కఠిన నిర్ణయాలు స్పష్టంగా కనిపిస్తున్నాయి. ప్రపంచకప్‌లో అర్ధ శతకాలతో చెలరేగిన సంజూ శాంసన్‌, ఆ తర్వాత కేవలం మూడు మ్యాచ్‌ల్లో విఫలమైనందుకే పక్కన పెట్టడం ఆశ్చర్యపరిచింది. కేవలం శాంసన్ విషయంలోనే కాకుండా, సెలక్టర్లు తిరిగి జట్టులోకి తీసుకోవాలని భావించిన శుభ్‌మన్ గిల్‌ను సైతం టీ20 జట్టుకు దూరంగా ఉంచడంలో గంభీర్ పాత్ర ఉందని తెలుస్తోంది. అలాగే సీనియర్ పేసర్ మహమ్మద్ షమీ పునరాగమనాన్ని కూడా గంభీర్ అడ్డుకుంటున్నట్లు ప్రచారం జరుగుతోంది.

ఈ పరిణామాలన్నీ చూస్తుంటే భారత జట్టు ఎంపికలో గౌతమ్ గంభీర్ మాటే అంతిమ నిర్ణయమనే విషయం స్పష్టమవుతోంది. సీనియర్లు, జూనియర్లు అనే తేడా లేకుండా కేవలం ప్రస్తుత ప్రదర్శన ఆధారంగానే గంభీర్ కఠిన నిర్ణయాలు తీసుకుంటున్నట్లు అర్థమవుతోంది. అయితే గంభీర్ వ్యూహాలు.. రాబోయే రోజుల్లో భారత జట్టుకు ఎలాంటి ఫలితాలను ఇస్తాయో చూడాలి. మరోవైపు జింబాబ్వే పర్యటన నుంచి సంజూ శాంసన్‌కు విశ్రాంతి ఇచ్చారని, సెప్టెంబర్‌లో జరిగే ఆసియా గేమ్స్‌లో సంజూ బరిలోకి దిగుతాడని క్రికెట్ విశ్లేషకులు అభిప్రాయపడుతున్నారు.