రోడ్డు ప్రమాదంలో వెస్టిండీస్ మాజీ పేసర్ మృతి

బ్రిడ్జ్ టౌన్: వెస్టిండీస్​ మాజీ పేసర్​ ​​ఎజ్రా మోస్లీ రోడ్డు ప్రమాదంలో మృతి చెందారు. సైకిల్​పై వెళ్తున్న ఈ 63 ఏళ్ల మాజీ బౌలర్​ను గుర్తు తెలియని ఓ ఎస్​యూవీ వాహనం ఢీకొట్టింది. ఈ ఘటన బ్రిడ్జ్‌టౌన్‌ రోడ్ జంక్షన్‌ సమీపంలో శనివారం ఉదయం చోటు చేసుకుందిని అక్కడి స్థానిక మీడియా పేర్కొంది.

వెస్టిండీస్ తరఫున రెండు టెస్ట్‌లు, 9 వన్డే‌లు ఆడిన మోస్లీ.. 2016 టీ20 ప్రపంచకప్​ గెలుపొందిన మహిళల జట్టుకు అసిస్టెంట్ కోచ్​గా పనిచేశారు. టెస్ట్‌ల్లో 6, వన్డేల్లో ఏడు వికెట్లు తీశాడు. ఎజ్రా మోస్లీ మృతి పట్ల వెస్టిండీస్ క్రికెట్ బోర్డు దిగ్భ్రాంతిని వ్యక్తం చేసింది.

"ఘోర రోడ్డు ప్రమాదంలో ఎజ్రా మోస్లీ మరణించాడనే వార్త మమ్మల్ని షాక్​కు గురిచేసింది. విండీస్​ క్రికెట్​ బోర్డు విషాదంలో మునిగిపోయింది" అని వెస్టిండీస్​​ క్రికెట్​ బోర్డు డైరెక్టర్​ జిమ్మీ ఆడమ్స్ ఓ ప్రకటనను విడుదల చేశాడు.​ ​జూనియర్ స్థాయి క్రికెట్ జట్లకు కూడా మోస్లీ కోచ్‌గా సేవలందించారు. ఆయన మరణంపై వెస్టిండీస్ మాజీ, ప్రస్తుత ఆటగాళ్లు సోషల్ మీడియా వేదికగా స్పందిస్తూ నివాళులర్పిస్తున్నారు.