IPL 2022: అప్పుడు కోహ్లీ.. ఇప్పుడు బట్లర్.. ఇద్దరిదీ ఒకే బాధ!

న్యూఢిల్లీ: ఐపీఎల్ 2022 సీజన్ ఫైనల్ చేరిన రాజస్థాన్ రాయల్స్.. ఆరెంజ్, పర్పుల్ క్యాప్ దక్కినప్పటికీ టైటిల్ మాత్రం కలగానే మిగిలిపోయింది. బ్యాటింగ్​లో జోస్​ బట్లర్​, బౌలింగ్​లో యుజ్వేంద్ర చాహల్​ అదరగొట్టినా.. కప్​ మాత్రం చేజారింది. అయితే ఇప్పుడు జోస్ బట్లర్​కు ఎదురైన ఓ చేదు అనుభవమే ఆరేళ్ల కింద రాయల్ చాలెంజర్స్ బెంగళూరు(కెప్టెన్) విరాట్ కోహ్లీకీ ఎదురైంది. ప్రస్తుతం ఈ వ్యవహారం సోషల్ మీడియాలో హాట్ టాపిక్ అయింది. ఆయా సీజన్లలో ఈ ఇద్దరు ఆడిన తీరు, తమ టీమ్స్​ను ఫైనల్​కు తీసుకెళ్లిన విధానాన్ని అభిమానులు గుర్తు చేసుకుంటున్నారు.

2016 సీజన్‌లో విరాట్ కోహ్లీ ఏకంగా 973 పరుగులు చేసి.. ఒక సీజన్​లో అత్యధిక రన్స్​ చేసిన రికార్డును నమోదు చేశాడు. ఆ ఏడాది నాలుగు సెంచరీలు బాదిన విరాట్.. ఆడిన ప్రతిమ్యాచ్​లోనూ చెలరేగిపోయి జట్టును ఫైనల్స్​కు చేర్చాడు. ఇక తుదిపోరులో హాఫ్​ సెంచరీ కొట్టినా సన్​రైజర్స్​ చేతిలో ఓటమి తప్పలేదు. తాజా సీజన్‌లో జోస్ బట్లర్​ది ఇదే పరిస్థితి. ఈ సీజన్​లో అతనే టాప్​ స్కోరర్​. కోహ్లీ రికార్డును అందుకోలేదు కానీ.. 863 పరుగులతో ఆరెంజ్​ క్యాప్​ను దక్కించుకున్నాడు. కోహ్లీ లాగే నాలుగు శతకాలు బాదాడు. ఫైనల్లోనూ తన జట్టును గెలిపించుకోవడం కోసం గట్టిగానే ప్రయత్నించాడు. అయినా జట్టుకు ఓటమి తప్పలేదు.

ఇక ఆ సీజన్​లో ఆర్సీబీ పాయింట్ల పట్టికలో రెండో స్థానంలో నిలవగా.. ఈ సీజన్​లో రాజస్థాన్​ రెండో ప్లేస్​లోనే నిలిచింది. ఇక అప్పుడు, ఇప్పుడూ టాప్​లో గుజరాత్​ టీమే ఉండటం విశేషం. మరో విశేషమేమిటంటే.. అప్పుడు కోహ్లీ, ఇప్పుడు బట్లర్​.. మే 29నే ఫైనల్​ ఆడారు. ఇలా ఆ సీజన్​.. ఈ సీజన్​లో అనేక పోలీకలు కలిసాయి. దాంతో అభిమానులు కోహ్లీ,బట్లర్‌ది ఒకే బాధని కామెంట్ చేస్తున్నారు.