Babar Azam: వరల్డ్ రికార్డు వృథా అయ్యేరా.. ఆజామూ!

పాకిస్థాన్ మాజీ కెప్టెన్ బాబర్ ఆజామ్ వరల్డ్ రికార్డ్ సాధించాడు. ప్రొఫెషనల్ టీ20 క్రికెట్‌లో అత్యంత వేగంగా 10 వేల పరుగుల మైలు రాయి అందుకున్న ఆటగాడిగా బాబర్ ఆజామ్ చరిత్రకెక్కాడు. 271 ఇన్నింగ్స్‌ల్లోనే అతను ఈ ఫీట్ సాధించాడు. ఈ క్రమంలో యూనివర్స్ బాస్ క్రిస్ గేల్, విరాట్ కోహ్లీ, డేవిడ్ వార్నర్‌ల రికార్డును బ్రేక్ చేశాడు.

285 ఇన్నింగ్స్‌ల్లో గేల్ ఈ ఫీట్ సాధించగా.. కోహ్లీ(299), డేవిడ్ వార్నర్(303) ఇన్నింగ్స్‌ల్లో 10వేల పరుగుల మైలురాయిని అందుకున్నారు. పాకిస్థాన్ సూపర్ లీగ్‌(PSL) 2024 సీజన్‌లో పెషావర్ జాల్మీ జట్టుకు సారథ్యం వహిస్తున్న బాబర్ ఆజామ్.. కరాచీ కింగ్స్‌తో బుధవారం జరిగిన మ్యాచ్‌లో ఈ ఫీట్ సాధించాడు.

ఈ మ్యాచ్‌లో బాబర్ ఆజామ్(51 బంతుల్లో 7 ఫోర్లు, సిక్స్‌తో 72) హాఫ్ సెంచరీతో రాణించాడు. తద్వారా టీ20ల్లో 10 వేల పరుగుల మైలురాయి అందుకున్నాడు. అయితే ఈ మ్యాచ్‌లో తన షెషావర్ టీమ్ 7 వికెట్ల తేడాతో చిత్తయ్యింది. దాంతో అతని వరల్డ్ రికార్డుకు విలువ లేకుండా పోయింది.

ఈ మ్యాచ్‌లో ముందుగా బ్యాటింగ్ చేసిన పేషావర్ 19.5 ఓవర్లలో 154 పరుగులకు ఆలౌటైంది. బాబర్ ఆజామ్‌తో పాటు రోవ్‌మెన్ పోవెల్(39) రాణించగా.. మిగతా బ్యాటర్లు దారుణంగా విఫలమయ్యారు.

అనంతరం లక్ష్యచేధనకు దిగిన కరాచీ కింగ్స్.. కీరన్ పోలార్డ్(21 బంతుల్లో 4 ఫోర్లు, 4 సిక్స్‌లతో 49 నాటౌట్) విధ్వంసకర ఇన్నింగ్స్‌తో 16.5 ఓవర్లలోనే 3 వికెట్లకు 157 పరుగులు చేసి సునాయస విజయాన్ని అందుకుంది. పొలార్డ్ సునామీ ఇన్నింగ్స్‌లో బాబర్ ఆజామ్ వరల్డ్ రికార్డు కొట్టుకుపోయింది. ఈ క్రమంలోనే బాబర్ ఆజమ్‌పై నెటిజన్లు సోషల్ మీడియా వేదికగా జోకులు పేల్చుతున్నారు. 'వరల్డ్ రికార్డు వృథా అయ్యేరా.. ఆజామూ'అని కామెంట్ చేస్తున్నారు.