ENG vs AUS: లివింగ్ స్టోన్ విధ్వంసం.. ఓడిపోయే మ్యాచ్‌లో గెలిచిన ఇంగ్లండ్!

సొంతగడ్డపై ఆస్ట్రేలియాతో జరుగుతున్న మూడు టీ20ల సిరీస్‌లో ఇంగ్లండ్ ఎట్టకేలకు విజయాన్ని అందుకుంది. తొలి టీ20 ఓటమి నుంచి తేరుకొని తప్పక గెలవాల్సిన మ్యాచ్‌లో విజయం సాధించింది. కార్డిఫ్ వేదికగా శుక్రవారం రాత్రి జరిగిన రెండో టీ20లో లియామ్ లివింగ్‌స్టోన్(47 బంతుల్లో 6 ఫోర్లు, 5 సిక్స్‌లతో 87) విధ్వంసంతో ఇంగ్లండ్ 3 వికెట్ల తేడాతో ఆస్ట్రేలియాను ఓడించింది.

ఈ విజయంతో మూడు టీ20ల సిరీస్‌లో 1-1తో సమంగా నిలిచింది. ఈ మ్యాచ్‌లో ముందుగా బ్యాటింగ్ చేసిన ఆస్ట్రేలియా నిర్ణీత 20 ఓవర్లలో 6 వికెట్లకు 193 పరుగులు చేసింది. జేక్ ఫ్రేసర్-మెక్‌గర్క్(31 బంతుల్లో 4 ఫోర్లు, 2 సిక్స్‌లతో 50) హాఫ్ సెంచరీతో రాణించగా.. ట్రావిస్ హెడ్(14 బంతుల్లో 4 ఫోర్లు, 2 సిక్స్‌లతో 31), జోష్ ఇంగ్లీస్(26 బంతుల్లో 5 ఫోర్లు, సిక్స్‌తో 42) మెరుపులు మెరిపించారు.

ఇంగ్లండ్ బౌలర్లలో బ్రైడన్ కార్స్(2/26), లియామ్ లివింగ్ స్టోన్(2/16) రెండేసి వికెట్లు తీయగా.. సామ్ కరణ్, ఆదిల్ రషీద్ తలో వికెట్ పడగొట్టారు. అనంతరం బ్యాటింగ్‌కు దిగిన ఇంగ్లండ్ 19 ఓవర్లలో 7 వికెట్లకు 194 పరుగులు చేసింది. లివింగ్ స్టోన్‌తో పాటు జాకోబ్ బెతెల్(24 బంతుల్లో 4 ఫోర్లు, 3 సిక్స్‌లతో 44), ఫిల్‌ సాల్ట్(23 బంతుల్లో 2 ఫోర్లు, 3 సిక్స్‌లతో 39) రాణించారు.

ఆస్ట్రేలియా బౌలర్లలో మాథ్యూ షార్ట్(5/22) ఐదు వికెట్లతో సత్తా చాటినా లాభం లేకపోయింది. సీన్ అబాట్(2/32) రెండు వికెట్లు పడగొట్టాడు. బౌలింగ్‌లో రెండు వికెట్లతో పాటు బ్యాటింగ్‌లో సత్తా చాటిన లివింగ్ స్టోన్‌కు మ్యాన్ ఆఫ్ ది మ్యాచ్ అవార్డ్ దక్కింది. ఇరు జట్ల మధ్య నిర్ణాయత్మక మూడో టీ20 ఆదివారం రాత్రి జరగనుంది.