IPL 2025: చిట్టి చిట్టి రోబో..! (వీడియో)

చిట్టి రోబో తెలుసుగా.. సూపర్ స్టార్ రజనీకాంత్ రోబో సినిమాలో అనేక పనులను చకచకా చేసి అందర్నీ ఆకట్టుకుంది. ఇప్పుడు అచ్చం అలాంటి రోబో డాగ్‌నే ఐపీఎల్ బ్రాడ్‌కాస్ట్‌ టీమ్ అభిమానులకు పరిచయం చేసింది. మ్యాచ్ కవరేజ్‌ను మరింత ఆహ్లాదకరంగా మార్చేందుకు ఈ చిట్టి రోబో డాగ్‌ను ప్రవేశ పెట్టింది. ఆదివారం ముంబై ఇండియన్స్ వర్సెస్ ఢిల్లీ క్యాపిటల్స్ మ్యాచ్‌కు ముందు ఈ చిట్టి రోబోను న్యూజిలాండ్ మాజీ క్రికెటర్, కామెంటేటర్ డానీ మోరీసన్ ఐపీఎల్ ప్రేక్షకులకు పరిచయం చేశాడు.

బ్రాడ్‌కాస్ట్ కెమెరాలకు అనుసంధానంగా ఉన్న ఈ రోబోటిక్ డాగ్.. డానీ మోరీసన్‌ మాటలకు స్పందించడం విశేషం. తనదైన కామెడీతో మోరీసన్ ఈ రోబోటిక్ డాగ్‌ను ప్రేక్షకులకు పరిచయం చేశాడు. ఈ రోబోటిక్ డాగ్‌కు పేరు పెట్టాలని కూడా అభిమానులను మోరీసన్ కోరాడు. ఈ వీడియోను ఐపీఎల్ నిర్వాహకులు సోషల్ మీడియా వేదికగా పంచుకున్నారు.

Photo Credit: screen grab for IPL X Video

ఈ రోబోటిక్ డాగ్‌తో ముంబై ఇండియన్స్ కెప్టెన్ హార్దిక్ పాండ్యా, రీస్ టోప్లీ, ఢిల్లీ క్యాపిటల్స్ కెప్టెన్ అక్షర్ పటేల్, మిచెల్ మార్ష్‌లు సరదాగా గడిపారు. రోబోటిక్ డాగ్ పని తీరును పరీక్షించారు. రోబోటిక్ డాగ్‌తో మోరీసన్ సరదాగా పరుగు పందెం పెట్టుకున్నాడు. ఈ పోటీలో రోబోటిక్ డాగ్ గెలవడం విశేషం. ముంబై ఇండియన్స్, ఢిల్లీ క్యాపిటల్స్ మ్యాచ్‌కు టాస్ కాయిన్ కూడా ఈ రోబోటిక్ డాగ్ తీసుకురావడం గమనార్హం.