DC vs KKR: చెలరేగిన కుల్దీప్, ముస్తాఫిజుర్.. ఆదుకున్న రాణా.. ఢిల్లీ ముందు ఈజీ టార్గెట్!

శుభారంభం లేదు..

టాస్ ఓడి బ్యాటింగ్‌కు దిగిన కేకేఆర్‌కు ఆరంభంలోనే గట్టి షాక్ తగిలింది. ఈ సీజన్‌లో ఫస్ట్ మ్యాచ్‌ ఆడుతున్న చేతన్ సకారియా తన తొలి ఓవర్‌లోనే ఆరోన్ ఫించ్(3)ను క్లీన్ బౌల్డ్ చేశాడు. ఆ వెంటనే వెంకటేశ్ అయ్యర్‌(6)ను అక్షర్ పటేల్ క్యాచ్ ఔట్ చేశాడు. దాంతో కేకేఆర్ పవర్ ప్లేలో 2 వికెట్లు కోల్పోయి 29 పరుగులు మాత్రమే చేసింది. పవర్ ప్లే అనంతరం కుల్దీప్ యాదవ్ ఒకే ఓవర్‌లో రెండు వికెట్లు తీసి కేకేఆర్ దెబ్బతీసాడు. ఈ మ్యాచ్‌లో ఐపీఎల్‌లోకి అరంగేట్రం చేసిన బాబా ఇంద్రజీత్(6) బంగారం లాంటి అవకాశాన్ని అందిపుచ్చుకోలేకపోయాడు.

దెబ్బతీసిన కుల్దీప్..

ఆ మరుసటి బంతికే సునీల్ నరైన్(0) ఎల్బీగా వెనుదిరిగాడు. దాంతో 35 పరుగులకే 4 కీలక వికెట్లు కోల్పోయి కోల్‌కతా పీకల్లోతు కష్టాలో పడింది. ఈ పరిస్థితుల్లో క్రీజులోకి వచ్చి నితీశ్ రాణాతో కెప్టెన్ శ్రేయస్ అయ్యర్ ఆచితూచి ఆడుతూ ఇన్నింగ్స్ చక్కదిద్దే ప్రయత్నం చేశాడు. అయితే హాఫ్ సెంచరీకి చేరువైన శ్రేయస్ అయ్యర్‌ను రిషభ్ పంత్ స్టన్నింగ్ క్యాచ్‌తో కుల్దీప్ యాదవ్ పెవిలియన్ చేర్చాడు. దాంతో 5వ వికెట్‌కు నమోదైన 48 పరుగుల భాగస్వామ్యానికి తెరపడింది. అదే ఓవర్‌లో డేంజరస్ ఆండ్రీ రస్సెల్‌ను కుల్దీప్ స్టంపౌట్ చేశాడు.

ఆదుకున్న నితీశ్ రాణా..

ఈ పరిస్థితుల్లో క్రీజులోకి వచ్చిన రింకూ సింగ్‌తో కలిసి నితీశ్ రాణా పోరాడాడు. శార్దూల్ ఠాకూర్ వేసిన 19వ ఓవర్ భారీ సిక్సర్ బాదిన నితీశ్ రాణా 30 బంతుల్లో హాఫ్ సెంచరీ పూర్తి చేసుకున్నాడు. ముస్తాఫిజుర్ వేసిన చివరి ఓవర్‌లో భారీ షాట్‌కు ప్రయత్నించిన రింక్యూ సింగ్(23) క్యాచ్ ఔట్‌గా వెనుదిరిగాడు. ఆ వెంటనే నితీష్ రాణా సైతం భారీ షాట్‌కు ప్రయత్నించగా.. సకారియా స్టన్నింగ్ క్యాచ్‌తో వెనుదిరిగాడు. ఆ మరుసటి బంతికే టీమ్ సౌథీ క్లీన్ బౌల్డ్ అయ్యాడు. దాంతో చివరి ఓవర్‌లో రెండు పరుగులు మాత్రమే వచ్చాయి.