DC vs KKR: థ్రిల్లింగ్ మ్యాచ్‌లో ఢిల్లీదే విజయం!

DC vs KKR: Delhi Capitals survive Tripathi, Morgan threat, win by 18 runs

షార్జా: థ్రిల్లింగ్ సినిమాను తలపించిన మ్యాచ్‌లో ఢిల్లీ క్యాపిటల్స్ ఆల్‌రౌండ్‌షో‌కు కోల్‌కతా నైట్‌రైడర్స్ దాసోహమైంది.! ఆ జట్టు బ్యాటింగ్‌ విశ్వరూపానికి ప్రత్యక్ష సాక్ష్యమైంది.! తర్వాత కట్టుదిట్టమైన బౌలింగ్ ముందు చేతులెత్తేసింది.! దాంతో శనివారం జరిగిన రెండో ఐపీఎల్ మ్యాచ్‌లో ఢిల్లీ క్యాపిటల్స్ 18 పరుగుల తేడాతో కేకేఆర్‌పై విజయం సాధించింది. ఆఖర్లో ఇయాన్ మోర్గాన్(18 బంతుల్లో 1 ఫోర్, 5 సిక్సర్లతో 44), రాహుల్ త్రిపాఠి(16 బంతుల్లో 3 ఫోర్లు, 3 సిక్స్‌లతో 36) విధ్వంసకర బ్యాటింగ్‌తో భయపెట్టినా.. నోర్జ్ బౌలింగ్‌‌ ముందు ఫలితం లేకుండా పోయింది.

టాస్ ఓడి బ్యాటింగ్‌కు దిగిన ఢిల్లీ క్యాపిటల్స్ నిర్ణీత 20 ఓవర్లలో 4 వికెట్లకు 228 రన్స్ చేసింది. కెప్టెన్ శ్రేయస్ అయ్యర్(38 బంతుల్లో 7 ఫోర్లు, 6 సిక్స్‌లతో 88 నాటౌట్) అజేయ హాఫ్ సెంచరీకి తోడు పృథ్వీ షా(41 బంతుల్లో 4 ఫోర్లు, 4 సిక్స్‌లతో 66), రిషభ్ పంత్(17 బంతుల్లో 5 ఫోర్లు, 1 సిక్సర్‌తో 38) మెరుపులు మెరిపించారు.

ప్రత్యర్థి బౌలర్లలో అండ్రూ రస్సెల్ రెండు వికెట్లు తీయగా.. వరుణ్ చక్రవర్తి, నాగర్ కోటికి తలో వికెట్ దక్కింది. అనంతరం కేకేఆర్ 20 ఓవర్లలో 8 వికెట్లకు 210 పరుగులకే పరిమితమైంది. ఢిల్లీ బౌలర్లలో అన్రిచ్ నోర్జ్(3/33) ప్రత్యర్థి పతనాన్ని శాసించగా.. హార్దిక్ పటేల్ రెండు, స్టోయినిస్, రబడా, అమిత్ మిశ్రా తలో వికెట్ తీశారు.

శుభారంభం దక్కలేదు..

229 పరుగుల భారీ లక్ష్యంతో బరిలోకి దిగిన కోల్‌కతా నైట్‌రైడర్స్‌కు శుభారంభం దక్కలేదు. అన్రిచ్ నోర్జ్ బౌలింగ్‌లో ఓపెనర్ సునీల్ నరైన్(3) క్లీన్ బౌల్డ్ అయ్యాడు. అనంతరం శుభ్‌మన్ గిల్(28)తో కలిసి నితీష్ రాణా ఇన్నింగ్స్‌ను ముందుకు నడిపించాడు. ఈ జోడీ ఓవర్‌కు రెండు బౌండరీలతో ధాటిగా ఆడటంతో కోల్‌కతా పవర్ ప్లే ముగిసే సరికి వికెట్ నష్టానికి 59 పరుగులు చేసింది.

స్పిన్నర్ల కట్టుదిట్టమైన బౌలింగ్‌తో తడబడిన ఈ జోడీ పూర్తిగా డిఫెన్స్‌కు పరిమితమైంది. ఈ క్రమంలో అమిత్ మిశ్రా బౌలింగ్‌లో గిల్ కీపర్ క్యాచ్‌గా వెనుదిరిగడంతో రెండో వికెట్‌కు నమోదైన 64 పరుగుల భాగస్వామ్యానికి తెరపడింది. అదే ఓవర్‌లో ఫ్రీహిట్‌ను భారీ సిక్సర్‌గా మలిచిన రాణా.. 12 రన్స్ పిడుకున్నాడు.

నిరాశపరిచిన రస్సెల్..

ఇక రబడా బౌలింగ్‌లో బౌండరీ కొట్టి టచ్‌లోకి వచ్చిన ఆండ్రీ రస్సెల్(13).. బాల్‌ వ్యవధిలో మరో భారీ సిక్సర్ కొట్టాడు. అదే ఊపులో మరో భారీ షాట్‌కు ప్రయత్నించి థర్డ్ మ్యాన్‌లో నోర్జ్‌కు చిక్కి పెవిలియన్ చేరాడు. ఇక ఢిల్లీ బౌలర్లు కట్టుదిట్టంగా బౌలింగ్ చేయడంతో పరుగుల వేగం తగ్గింది. స్టోయినిస్ వేసిన 12 ఓవర్ నాలుగో బంతిని ఆఫ్ కట్టర్‌గా బౌండరీ తరలించిన రాణా.. ఆ మరుసటి బంతి షార్ట్ మ్యాన్ దిశగా ఆడి సింగిల్‌తో హాఫ్ సెంచరీ పూర్తి చేసుకున్నాడు.

హర్దిక్ పటేల్ వేసిన మరుసటి ఓవర్‌లో భారీ సిక్సర్ కొట్టిన రాణా.. అదే జోరులో భారీ షాట్‌కు ప్రయత్నించి డీప్ మిడ్‌వికెట్‌లో క్యాచ్ ఔట్‌గా పెవిలియన్ చేరాడు. ఆ మరుసటి బంతికే దినేశ్ కార్తీక్(6) కూడా ఔటవ్వడంతో కేకేఆర్ 117 పరుగులకే సగం వికెట్లు కోల్పోయి కష్టాల్లో పడింది. ఆ వెంటనే కమిన్స్(5) కూడా ఔటవ్వడంతో కోల్‌కతా కష్టాలు రెట్టింపు అయ్యాయి.

చివర్లో చెలరేగిన మోర్గాన్.. త్రిపాఠి

ఈ క్లిష్ట పరిస్థితుల్లో క్రీజులోకి వచ్చిన మోర్గాన్, రాహుల్ త్రిపాఠి తొలుత నిదానంగా ఆడి ఆ తర్వాత గేరు మార్చారు. రబడా వేసిన 16 ఓవర్‌లో మోర్గాన్ 6,4‌తో 14 రన్స్ పిండుకోగా.. 17వ ఓవర్‌లో త్రిపాఠి మూడు సిక్స్‌లు, ఫోర్‌తో 24 రన్స్ రాబట్టి కేకేఆర్ శిభిరంలో ఆశలు రేకెత్తించారు. రబడా వేసిన 18 ఓవర్‌లో మోర్గాన్ హ్యాట్రిక్ సిక్స్‌లతో విరుచుకుపడ్డాడు. త్రిపాఠిని అంపైర్ ఔటివ్వగా.. రివ్యూకెళ్లి ఫలితం సాధించాడు.

ఆఖరి బంతిని బౌండరీకి తరలించడంతో కేకేఆర్ విజయానికి 12 బంతుల్లో 31 రన్స్ అవసరమయ్యాయి. నోర్జ్ వేసిన 19వ ఓవర్‌లో మోర్గాన్ బౌండరీ లైన్ వద్ద క్యాచ్ ఔట్‌గా వెనుదిరగడంతో ఏడో వికెట్‌కు నమోదైన 78 పరుగుల భాగస్వామ్యానికి తెరపడింది. ఈ ఓవర్‌లో 5 రన్సే రావడంతో కోల్‌కతా విజయానికి ఆఖరి ఓవర్‌లో 26 పరుగులు అవసరమయ్యాయి. తొలి బౌండరీ కొట్టిన త్రిపాఠి.. మరుసటి బంతికే బౌల్ట్ అవ్వడంతో ఢిల్లీ విజయం లాంఛనమైంది.