నేనేం హంతకుడిని కాదు.. ఆ శిక్ష చాలా అన్యాయం.. క్రికెట్ ఆస్ట్రేలియాపై డేవిడ్ వార్నర్ ఫైర్!

నేను హంతకుడిని కాదు..

తనపై విధించిన జీవిత కాల కెప్టెన్సీ నిషేధాన్ని తొలగించాల్సిందిగా క్రికెట్ ఆస్ట్రేలియాను డేవిడ్ వార్నర్ ఇప్పటికే చాలా సార్లు కోరాడు. క్రికెట్ ఆస్ట్రేలియా మాత్రం ఈ విషయంలో చాలా జాప్యం చేస్తోంది. దాంతో డేవిడ్ వార్నర్, ఆసీస్ క్రికెట్ బోర్డు తీరుపై ఆవేదన వ్యక్తం చేశాడు. ఓ స్పోర్ట్స్ చానెల్‌కు ఇచ్చి ఇంటర్వ్యూలో.. 'నేను క్రిమినల్‌ను కాదు. ఏదో ఒక స్టేజీ దాటిన ప్రతీ ఒక్కరికీ అప్పీలు చేసుకునే అవకాశం ఉండాలి. కొంతకాలం పాటు బ్యాన్ వేస్తే తప్పు లేదు, కానీ జీవితకాలమంతా కెప్టెన్సీ చేయకూడదనడం చాలా కఠినం.. చాలా రోజులుగా బ్యాన్ ఎత్తివేస్తారని ఎదురుచూస్తున్నా.

దాన్ని సాకుగా చూపించి..

ఈ ఏడాది ఫ్రిబవరిలో నాపై నిషేధం ఎత్తివేస్తారని అనుకున్నా, కానీ అలా జరగలేదు. ఇది నాకూ, నా కుటుంబానికి, ఈ వివాదంలో ఇరుక్కున్న వారందరికీ చాలా కష్టంగా ఉంది. జరిగిపోయినదాన్ని ఇప్పుడు క్షుణ్ణంగా వివరించి చెప్పాల్సిన అవసరం లేదు. ఏం జరిగిందో మళ్లీ చెప్పాల్సిన పని లేదు. ఫించ్ రిటైర్ అయిన తర్వాత నాకు కెప్టెన్సీ దక్కుతుందని ఆశించా. నాపైన వేసిన కెప్టెన్సీ బ్యాన్‌ను ఎత్తివేస్తారని అనుకున్నా. కానీ అలా జరగలేదు. 2018లో నాలుగేళ్ల క్రితం జరిగినదాన్ని సాకుగా చూపించి, ఇప్పుడు కెప్టెన్సీకి అర్హుడు కాదని చెప్పడం అసహనానికి గురి చేస్తోంది.'అని వార్నర్ ఆవేదన వ్యక్తం చేశాడు.

ముగ్గురు సభ్యుల ప్యానెల్..

ఆరోన్ ఫించ్ వన్డేలకు రిటైర్మెంట్ ప్రకటించిన తర్వాత వార్నర్‌కే సారథ్య బాధ్యతలు దక్కుతాయని అంతా భావించారు. క్రికెట్ ఆస్ట్రేలియా మాత్రం

వార్నర్‌ని పక్కనబెట్టి ప్యాట్ కమ్మిన్స్‌కి వన్డే కెప్టెన్సీ అప్పగించింది. అయితే క్రికెట్ ఆస్ట్రేలియా వార్నర్‌పై ఉన్న నిషేధాన్ని ఎత్తివేసేందుకు ప్రయత్నిస్తున్నట్లు తెలుస్తోంది. వన్డే కెప్టెన్సీ బాధ్యతలు వార్నర్‌కే ఇవ్వాలని మాజీ క్రికెటర్లు సూచించిన నేపథ్యంలో సీఏ.. ఆ దిశగా అడుగులు వేస్తోంది. జీవిత కాల నిషేధంపై ముగ్గురు సభ్యుల ప్యానెల్‌కు వార్నర్ అప్పీల్ చేసుకునే అవకాశం కల్పిస్తూ సీఏ తాజాగా నిర్ణయం తీసుకుంది.