నట్టూ.. నీకు కెప్టెన్‌ అయినందుకు గర్విస్తున్నా: డేవిడ్ వార్నర్

వజ్తుకల్ నట్టూ..

'మొదట నట్టూకు ఇవే నా అభినందనలు (వజ్తుకల్ నట్టూ) .. నువ్వు నిజంగా జీనియస్‌. ఐపీఎల్‌లో నీతో కలిసి ఆడినప్పుడు నీ మీద ఏ ఫీలింగ్‌ అయితే ఉండేది దాన్ని నిలబెట్టుకున్నావు. మ్యాచ్‌ వరకు మాత్రమే మనద్దిరం ప్రత్యర్థులం.. ఆఫ్‌ ఫీల్డ్‌లో మాత్రం ఎప్పటికి మంచి స్నేహితులం అన్న విషయం గుర్తుపెట్టుకో. నీలాంటి ఆటగాడికి నేను కెప్టెన్‌గా ఉన్నందుకు గర్విస్తున్నా. నిజంగా నటరాజన్‌ మంచి నిజాయితీ ఉన్న వ్యక్తి.. వికెట్‌ తీయగానే తన గొప్పతనాన్ని ప్రదర్శించకుండా హుందాగా ఉండేందుకు ప్రయత్నిస్తాడు.

చాలా సంతోషంగా ఉంది..

ఎంతో ప్రతిభ ఉన్న నట్టూ ఐపీఎల్‌-2020 సీజన్‌లో అద్భుత ప్రదర్శన చేశాడు. ఆ తర్వాత భారత జట్టుతో కలిసి నెట్ బౌలర్‌గా వెళ్లాడు. తొలిసారిగా తండ్రయిన అతను.. తన కూతురుని చూడకుండా ఆస్ట్రేలియాలోనే ఉన్నాడు. మూడు ఫార్మాట్లలో అరంగేట్రం చేశాడు. గొప్ప ఘనత సాధించాడు.

నటరాజన్‌ విజయం పట్ల ఎంతో సంతోషంగా ఉంది. ఈ ఏడాది ఐపీఎల్‌లోనూ అతను సత్తా చాటుతాడని ఆశిస్తున్నా. ఏ పరిస్థితుల్లో ఎలా బౌలింగ్ చేయాలో నట్టూకి తెలుసు. గత సీజన్‌లో దాదాపు 80 యార్కర్లను కచ్చితత్వంతో విసిరాడు. అతను డెత్‌ ఓవర్లలో అసాధారణమైన తీరుతో బౌలింగ్ చేస్తాడు.

మరో బుమ్రాలా..

సహచర ఆటగాళ్ల గాయాలతో అనూహ్యంగా జట్టులోకి వచ్చిన నటరాజన్.. ఓ పర్యటనలో మూడు ఫార్మాట్లలో అరంగేట్రం చేసిన తొలి భారత ఆటగాడిగా చరిత్ర సృష్టించాడు. ఆస్ట్రేలియాతో జరిగిన చివరి వన్డే ద్వారా అంతర్జాతీయ క్రికెట్‌లో అడుగుపెట్టిన నటరాజన్‌ ఫస్ట్ మ్యాచ్‌లోనే రెండు వికెట్లు తీసి జట్టు విజయంలో కీలక పాత్ర పోషించాడు. ఆ తర్వాత జరిగిన టీ20 సిరీస్‌లో మూడు మ్యాచ్‌లాడి 6 వికెట్లతో సత్తా చాటాడు. అనంతరం టెస్టు సిరీస్‌లో తొలి మూడు మ్యాచ్‌ల్లో​ అవకాశం రాకున్నా .. చివరిదైన గబ్బా టెస్టులో ఆడి ఫస్ట్ ఇన్నింగ్స్‌లో కీలకమైన 3 వికెట్లు పడగొట్టాడు.

పూల వర్షం..

ఇక ఆస్ట్రేలియా పర్యటన ముగించుకుని గురువారం స్వదేశానికి తిరిగొచ్చిన నటరాజన్‌కు ఘన స్వాగతం లభించింది. అతని స్వస్థలం చిన్నప్పంపట్టిలో అభిమానులు పూల వర్షం కురిపించారు. రథంపై ఊరేగిస్తూ సంబరాలు చేసుకున్నారు. దీనిపై వార్నర్‌ మాట్లాడుతూ.. 'నట్టూకు లభించిన ఆ ఘన స్వాగతాన్ని చూశాను. ఎంతో ఆనందంగా ఉంది. అతను సాధించిన ఘనతకు ఇది మంచి స్వాగతం' అని తెలిపాడు. ఇక తదుపరి సీజన్ కోసం నట్టూను హైదరాబాద్ రిటైన్ చేసుకున్న విషయం తెలిసిందే.