Chris Gayle ఇప్పుడు 'యూనివర్స్‌ బాస్‌' కాదు.. కారణం ఇదే!

అందుకే ‘ది బాస్'

ఐసీసీ అభ్యంతరం తెలపడంతోనే యూనివర్స్ బాస్‌ను ది బాస్‌గా మార్చుకున్నానని గేల్ తెలిపాడు. 'నా బ్యాట్‌పై 'ది బాస్‌' అని మాత్రమే ఉంది. ఎందుకంటే నేను యూనివర్స్‌ బాస్‌ అని పిలుచుకోవడం ఐసీసీకి ఇష్టం లేదు. అందుకే దాన్ని కుదించి ది బాస్‌గా పెట్టుకున్నా. నేనే బాస్‌. యూనివర్స్‌ బాస్‌పై ఐసీసీకి కాపీరైట్స్‌ ఉన్నాయి. నేను ముందే చేసుకోవాల్సి ఉంది. ఎందుకంటే సాంకేతికంగా క్రికెట్‌లో ఐసీసీయే బాస్‌. వాళ్లతో నేను పనిచేయను. ఐసీసీతో సంబంధం లేదు. బ్యాటింగ్‌లో నేనే బాస్‌.'అని గేల్ బదులిచ్చాడు.

నంబర్స్ వద్దు..

'ఇక నంబర్స్ నేను అస్సలు పట్టించుకోను. మైదానంలో ఇప్పటికీ క్రిస్ గేల్‌ను చూడటానికి మీరంతా ఇష్టపడాలి. క్రిస్ గేల్ అనేవాడు క్రికెట్‌లో సాధ్యమైనంత ఎక్కువ రోజులు ఉంటాడని ఆశిద్దాం. యూనివర్స్ బాస్‌ను గౌరవిస్తూ ఆటను ఆస్వాదించండి. సరదాగా ఆటను ఆస్వాదించే అవకాశం అతనికి ఇవ్వండి.'అని గేల్ చెప్పుకొచ్చాడు. ఆస్ట్రేలియాతో జరిగిన మూడో టీ20లో గేల్ సిక్సర్ల వర్షం కురిపించాడు. 38 బంతుల్లో 4 ఫోర్లు, 7 సిక్సర్లతో 67 పరుగులు చేసి జట్టు విజయంలో కీలక పాత్ర పోషించాడు.

ఒకే ఒక్కడు..

ఈ మ్యాచ్‌లో ఆడమ్ జంపా వేసిన 9వ ఓవర్‌లో భారీ సిక్సర్ బాదిన గేల్.. 14 వేల పరుగుల మైలురాయి అందుకున్నాడు. తద్వారా టీ20 క్రికెట్ చరిత్రలోనే ఈ ఘనత సాధించిన తొలి క్రికెటర్‌గా గుర్తింపు పొందాడు. ప్రపంచవ్యాప్తంగా జరిగే టీ20 లీగ్స్ బరిలోకి దిగే యూనివర్స్ బాస్ 431 టీ20 మ్యాచ్‌ల్లో ఈ ఫీట్ సాధించాడు.

ఈ జాబితాలో గేల్ ఎవరికీ అందనంత ఎత్తులో నిలిచాడు. అతనికి దరిదాపుల్లో కూడా మరే ఆటగాడు లేడు. గేల్ సాధించిన ఘనత చరిత్రలో నిలిచిపోవడం ఖాయం. గేల్ తర్వాత మరో విండీస్ వీరుడు కీరన్ పోలార్డ్ 545 మ్యాచ్‌ల్లో 10836 రన్స్ చేశాడు. షోయబ్ మాలిక్(10,741), డేవిడ్ వార్నర్(10,017), విరాట్ కోహ్లీ (9,235)లు ఉన్నారు.

సిరీస్ విండీస్ కైవసం..

ఈ మ్యాచ్‌లో టాస్ గెలిచి తొలుత బ్యాటింగ్ చేసిన ఆస్ట్రేలియా నిర్ణీత 20 ఓవర్లలో 6 వికెట్లకు 141 పరుగులు చేసింది. కెప్టెన్ అరోన్ ఫించ్ (31 బంతుల్లో 2ఫోర్లతో 30), హెన్రిక్స్ ( 29 బంతుల్లో 2 సిక్స్‌లతో 33) టాప్ స్కోరర్లుగా నిలవగా మిగతా బ్యాట్స్‌మెన్ విఫలమయ్యారు. 142 పరుగుల లక్ష్యాన్ని విండీస్ 14.5 ఓవర్లలో 4 వికెట్లకు 142 పరుగులు చేసి సునాయస విజయాన్నందుకుంది. క్రిస్ గేల్(38 బంతుల్లో 4 ఫోర్లు, 7 సిక్సర్లతో 67), నికోలస్ పూరన్ (32) టాప్ స్కోరర్లుగా నిలిచారు. ఈ ఫలితంతో విండీస్ మరో రెండు మ్యాచ్‌లు మిగిలుండగానే 3-0తో సిరీస్ కైవసం చేసుకుంది.