క్రిస్ గేల్ సూపర్ డైవ్.. ఓరి నీ ఏషాలో అనుకుంటూ పడి పడి నవ్విన రస్సెల్! (వీడియో)

అసలేం జరిగిందంటే..?

కేకేఆర్ ఇన్నింగ్స్ సందర్భంగా క్రిస్ జోర్డాన్ వేసిన 8వ ఓవర్‌లో ఫుల్లర్ డెలివరీని రాహుల్ త్రిపాఠి మిడ్ వికెట్ మీదుగా ఫ్లిక్ షాట్ ఆడాడు. అయితే ఆ బంతిని ఫార్వార్డ్‌లో ఫీల్డింగ్ చేస్తున్న క్రిస్ గేల్ సూపర్ డైవ్‌తో అడ్డుకున్నాడు. గేల్ డైవ్ చేయకుంటే అది ఖచ్చితంగా బౌండరీ వెళ్లేది. ఇక గేల్ సూపర్ ఫీల్డింగ్ పంజాబ్ ఆటగాళ్లంతా ప్రశంసించగా.. డగౌట్‌లో కూర్చున్న రస్సెల్ ముసి ముసి నవ్వుకున్నాడు. అతన్ని టీవీ కెమరాలు ఫోకస్ చేయడంతో ఈ విషయం వెలుగు చూసింది. ఈ వీడియోపై ఫ్యాన్స్ ఫన్నీ కామెంట్ చేస్తున్నాడు. గేల్ తిప్పలు చూసి రస్సెల్‌కు నవ్వాగలేదని ఒకరంటే.. ఓరి నీ ఏషాలో అని అనుకున్నట్లున్నాడని మరొకరు కామెంట్ చేశారు.

త్రిపాఠికి గుండెపోటు తెప్పించాడు..

ఇక ఇదే కాకుండా సూపర్ త్రోతో రాహుల్ త్రిపాఠికి గుండెపోటు తెప్పించాడు. అతని ధాటికి దాదాపు ఔటని భావించిన త్రిపాఠి చివరి క్షణంలో డైవ్ చేయడంతో ఔటయ్యే ప్రమాదం నుంచి తప్పించుకున్నాడు. ఆ తర్వాత కూడా గేల్ మైదానంలో తన ఫీల్డింగ్ విన్యాసాలతో ఆకట్టుకున్నాడు. 41 ఏళ్ల వయసులో కూడా యువ ఆటగాళ్లకు ఏ మాత్రం తీసిపోకుండా బ్యాటింగ్, ఫీల్డింగ్‌లో రాణిస్తున్న గేల్‌పై కామెంటేటర్లు ప్రశంసల జల్లు కురిపించారు. అందుకే అతను యూనివర్స్ బాస్ అంటూ కొనియాడారు.

కేకేఆర్‌కు ఉపశమన విజయం..

ఈ మ్యాచ్‌లో కేకేఆర్ 5 వికెట్ల తేడాతో గెలుపొంది తమ పరాజయాల పరంపరకు బ్రేక్ వేసింది. తొలుత బ్యాటింగ్ చేసిన పంజాబ్‌ కింగ్స్‌ 20 ఓవర్లలో 9 వికెట్లు నష్టపోయి 123 పరుగులు చేసింది. మయాంక్‌ అగర్వాల్‌ (34 బంతుల్లో 31; 1 ఫోర్, 2 సిక్స్‌లు) ఫర్వాలేదనిపించగా... చివర్లో క్రిస్‌ జోర్డాన్‌ (18 బంతుల్లో 30; 1 ఫోర్, 3 సిక్స్‌లు) దూకుడుగా ఆడాడు. ప్రసిధ్‌ కృష్ణ (3/ 30), సునీల్‌ నరైన్‌ (2/22), కమిన్స్‌ (2/31) ప్రత్యర్థి భారీ స్కోరు చేయకుండా కళ్లెం వేశారు. అనంతరం ఛేదనలో కోల్‌కతా 16.4 ఓవర్లలో 5 వికెట్లు కోల్పోయి 126 పరుగులు చేసి గెలుపొందింది. మోర్గాన్‌ (40 బంతుల్లో 47 నాటౌట్‌; 4 ఫోర్లు , 2 సిక్స్‌లు), రాహుల్‌ త్రిపాఠి (32 బంతుల్లో 41; 7 ఫోర్లు) జట్టు విజయంలో కీలక పాత్ర పోషించారు.