Chris Gayle Retirement: యూనివర్స్ బాస్ శకం ముగిసింది! అంతర్జాతీయ క్రికెట్‌కు గుడ్‌బై!

సన్ గ్లాసెస్‌తో బ్యాటింగ్..

ఆండ్రీ రస్సెల్‌, డ్వేన్ బ్రావో యూనివర్స్ బాస్‌ను హత్తుకోవడం.. ఆ తర్వాత తన గ్లోవ్స్‌పై సంతకం చేసి అభిమానులకు ఇవ్వడం టీవీ కెమెరాల్లో కనిపించింది. అంతేకాకుండా కెమెరా ముందుకు వచ్చి థాంక్యూ ఫ్యాన్స్‌ అంటూ గట్టిగా అరిచాడు. తన చేష్టలతో ఎలాంటి హంగు ఆర్భాటాలు లేకుండా ఆటకు గుడ్ బై చెప్పినట్లు క్రిస్ గేల్ హింట్ ఇచ్చాడు. ఈ మ్యాచ్ ముగిసిన తర్వాత గేల్ రిటైర్మెంట్‌పై క్లారిటీ రానుంది. ఈ మ్యాచ్‌లో గేల్ అద్భుత‌మైన స్టార్ట్ ఇచ్చాడు. విచిత్రంగా స‌న్‌గ్లాస్‌లు పెట్టుకుని గ్రౌండ్‌లోకి దిగిన గేల్‌.. రెండు భారీ సిక్స‌ర్ల‌తో ఆశ‌లు రేపాడు. ఇక విండీస్‌కు భారీ స్కోర్‌ను అందిస్తాడ‌నుకున్న స‌మ‌యంలో గేల్ 15 ర‌న్స్ చేసి బౌల్డ‌య్యాడు. ఇక క్రిస్ గేల్ అంతర్జాతీయ క్రికెట్‌కు గుడ్ బై చెప్పాడని అతనికి క్రికెట్ విశ్లేషకులు, మాజీ క్రికెటర్లు అభినందనలు తెలుపుతున్నారు.

గేల్ రికార్డ్స్ జిగేల్..

అంత‌ర్జాతీయ క్రికెట్‌లో ఇప్ప‌టి వ‌ర‌కు క్రిస్ గేల్ 19,593 ర‌న్స్ చేశాడు. వాటిల్లో 553 సిక్స‌ర్లు ఉన్నాయి. అన్ని ఫార్మాట్ల‌లో కలిపి అత్య‌ధిక సంఖ్య‌లో సిక్స‌ర్లు కొట్టిన ఏకైక క్రికెట‌ర్‌గా క్రిస్ గేల్ నిలిచాడు. వెస్టిండీస్ త‌ర‌పున గేల్ 75 ఇన్నింగ్స్‌లు ఆడాడు. దాంట్లో 1899 ర‌న్స్ చేశాడు. 14 హాఫ్ సెంచ‌రీలు, రెండు సెంచ‌రీలు ఉన్నాయి. అంత‌ర్జాతీయ టీ20ల్లో 123 సిక్సులు, 158 ఫోర్లు ఉన్నాయి. టీ20 ప్రపంచకప్‌ల్లో రెండు సెంచరీలు సాధించిన ఏకైక బ్యాట్స్‌మన్‌గా గేల్‌ చరిత్రలో నిలిచిపోయాడు. 2012, 2016 టీ20 ప్రపంచకప్‌లను విండీస్‌ గెలవడంలో గేల్‌ కీలకపాత్ర పోషించాడు. టి20 ప్రపంచకప్‌ల్లో అత్యధిక పరుగులు చేసిన జాబితాలో గేల్‌(35 మ్యాచ్‌ల్లో 950 పరుగులు) రెండో స్థానంలో కొనసాగుతున్నాడు.

డ్వేన్ బ్రావో సైతం..

ఇప్పటికే వన్డే, టెస్టు కెరీర్‌కు గుడ్‌బై చెప్పిన గేల్‌కు టీ20ల్లో ఘనమైన రికార్డు ఉంది. తన కెరీర్‌లో 452 టీ20 మ్యాచ్‌లాడిన గేల్‌ 145.4 స్ట్రైక్‌రేట్‌తో 14,321 పరుగులతో అగ్రస్థానంలో కొనసాగుతున్నాడు. అందులో 87 హాఫ్‌ సెంచరీలు.. 22 సెంచరీలు ఉన్నాయి. టీ20ల్లో వెయ్యికి పైగా సిక్స్‌లు కొట్టిన తొలి బ్యాటర్‌గా గేల్‌ చరిత్ర సృష్టించాడు. ఆసీస్‌తో మ్యాచ్‌లో ముందుగా బ్యాటింగ్ చేసిన విండీస్ నిర్ణీత 20 ఓవర్లలో 7 వికెట్లకు 157 రన్స్ చేసింది. కెప్టెన్ కీరన్ పొలార్డ్(44), ఆండ్రీ రస్సెల్(18 నాటౌట్), ఎవిన్ లూయిస్(29) రాణించారు. ఇప్పటికే డ్వేన్ బ్రావో సైతం అంతర్జాతీయ క్రికెట్‌కు గుడ్ బై చెప్పిన విషయం తెలిసిందే. ఆసీస్‌తో జరుగుతున్న ఈ మ్యాచే తన కెరీర్‌లో చివరిదిగా పేర్కొన్నాడు. దాంతో విండీస్ ఈ మ్యాచ్ గెలిచి తమ స్టార్ ఆటగాళ్లకు ఘన వీడ్కోలు పలకాలనుకుంటుంది.