Chris Gayle: అంతా తూచ్.. నేను రిటైర్మెంట్ తీసుకోలేదు! సరదా కోసమే అలా చేశా!

అబుదాబి: ఊహించనట్లుగానే వెస్టిండీస్ విధ్వంసకర బ్యాట్స్‌మన్, యూనివర్సల్ బాస్ క్రిస్ గేల్ ప్లేటు ఫిరాయించాడు. తాను రిటైర్మెంట్ తీసుకోలేదని, సరదా కోసమే ఆటకు వీడ్కోలు పలికినట్లు బిల్డప్ ఇచ్చానని స్పష్టం చేశాడు. టీ20 ప్రపంచకప్‌లో భాగంగా ఆస్ట్రేలియాతో జరిగిన తమ ఆఖరి లీగ్ మ్యాచ్‌లో గేల్.. ఆటకు వీడ్కోలు పలుకుతున్నట్లుగా ప్రవర్తించాడు. రిటైర్మెంట్ గురించి ఎక్కడా ప్రస్తావించిన యూనివర్స్ బాస్.. మ్యాచ్ ఆసాంతం ఇదే తన చివరి గేమ్ అన్నట్లు బిల్డప్ ఇచ్చాడు. గాగుల్స్‌తో బ్యాటింగ్‌కు వచ్చిన ఈ విండీస్ వీరుడు.. ఔటైన అనంతరం మైదానంలో అభిమానులందరికి అభివాదం చేశాడు. సహచర ఆటగాళ్ల నుంచి గౌరవందనం స్వీకరించాడు. గ్లోవ్స్‌, కెమెరాలపై సంతకం చేస్తూ హల్చల్ చేశాడు. ఆస్ట్రేలియా ఆటగాళ్లతో కలిసి చిందేశాడు.

దాంతో యూనివర్స్‌ల్ బాస్ కెరీర్‌కు వీడ్కోలు పలుకుతున్నాడని అంతా భావించారు. సోషల్ మీడియా వేదికగా అతని రికార్డులు గుర్తు చేసుకుంటూ అభిమానులు, విశ్లేషకులు అభినందనలు తెలిపారు. గేల్ శకం ముగిసిందని, తనదైన ఆటతో అలరించిన గేల్‌కు కృతజ్ఞతలంటూ కామెంట్ చేశారు. కానీ తాను ఆటకు వీడ్కోలు పలకలేదని, సరదా కోసమే ఇలా చేశానని చెప్పి గేల్ అందర్నీ ఫూల్ చేశాడు. మ్యాచ్ అనంతరం మాట్లాడుతూ.. తాను మరో అంతర్జాతీయ మ్యాచ్ ఆడతానని, సొంతగడ్డపై జమైకా వేదికగా ఘనంగా వీడ్కోలు అందుకుంటానని చెప్పాడు. వెస్టిండీస్ క్రికెట్ బోర్డు.. తన కోసం ఈ ఏర్పాట్లు చేస్తుందని ఆశిస్తున్నానని తన మనసులోని కోరికను బయటపెట్టాడు.

'నేను అంతర్జాతీయ క్రికెట్‌కు రిటైర్మెంట్ ప్రకటించలేదు. సరదా కోసమే అలా చేశాను. నాకు మరో ప్రపంచకప్ కూడా ఆడాలనుంది. కానీ నాకు ఆ అవకాశం ఇవ్వకపోవచ్చు. స్వదేశంలో సొంత అభిమానుల సమక్షంలో జమైకా వేదికగా మరో మ్యాచ్ ఆడి ఘనంగా వీడ్కోలు పలకాలనుకుంటున్నా. వెస్టిండీస్ క్రికెట్ బోర్డు నా కోసం ఈ ఏర్పాట్లు చేస్తుందని ఆశిస్తున్నా. నాకు మద్దతు తెలిపిన ప్రతీ ఒక్కరికి ధన్యవాదాలు'అని గేల్ తెలిపాడు.

ఈ మ్యాచ్‌లో సమష్టిగా రాణించిన ఆసీస్ 8 వికెట్లతో గెలుపొంది సెమీఫైనల్‌కు దూసుకెళ్లింది. టాస్ ఓడి ముందుగా బ్యాటింగ్ చేసిన వెస్టిండీస్ నిర్ణీత 20 ఓవర్లలో 7 వికెట్లకు 157 రన్స్ చేసింది. కెప్టెన్ కీరన్ పోలార్డ్(31 బంతుల్లో 4 ఫోర్లు, సిక్స్‌తో 44), ఎవిన్ లూయిస్(26 బంతుల్లో 5 ఫోర్లతో 29) రాణించగా.. చివర్లో ఆండ్రీ రస్సెల్(7 బంతుల్లో ఫోర్, 2 సిక్సర్లతో 18 నాటౌట్) కీలక పరుగులు చేశాడు. ఆస్ట్రేలియా బౌలర్లలో జోష్ హజెల్ వుడ్(4/39) నాలుగు వికెట్లతో విండీస్ పతనాన్ని శాసించగా.. ఆడమ్ జంపా, మిచెల్ స్టార్క్, ప్యాట్ కమిన్స్ తలో వికెట్ తీశారు. అనంతరం లక్ష్యచేధనకు దిగిన ఆస్ట్రేలియా 16.2 ఓవర్లలో 2 వికెట్లకు 161 రన్స్ చేసి 22 బంతులు మిగిలుండగానే విజయాన్నందుకున్నారు. డేవిడ్ వార్నర్(56 బంతుల్లో 8 ఫోర్లు, 4 సిక్స్‌లతో 89 నాటౌట్), మిచెల్ మార్ష్(32 బంతుల్లో 5 ఫోర్లు, 2 సిక్స్‌లతో 53) హాఫ్ సెంచరీలతో రాణించారు.