ఐపీఎల్ జరగకుంటే నా పరిస్థితి దారుణంగా ఉండేది.. ఆ డబ్బుతోనే నాన్నకు కోవిడ్ చికిత్స చేయిస్తున్నా: చేతన్ సకారియా

చాలా లక్కీ..

'నేను చాలా లక్కీ. రాజస్థాన్ రాయల్స్ తరఫున నాకు రావాల్సిన డబ్బు కొద్ది రోజుల క్రితమే అందింది. నేను వెంటనే ఆ డబ్బును ఇంటికి పంపించాను. ఈ కఠిన సమయంలో అది నా కుటుంబానికి ఎంతగానో ఉపయోగపడింది. 'అని పేర్కొన్నాడు. క్రికెట్ ఒక్కటే తనకు ఆదాయ మార్గామని ఈ యువ పేసర్ చెప్పుకొచ్చాడు. ఆ డబ్బులతోనే తన కుటుంబాన్ని పోషించడంతో పాటు తన తండ్రికి మెరుగైన చికిత్స అందించగలనని తెలిపాడు. ఐపీఎల్ 2021 సీజన్‌ తన జీవితాన్ని మార్చేసిందని, ఈ టోర్నీ జరగకపోయుంటే తన పరిస్థితి చాలా ఘోరంగా ఉండేదన్నాడు.

నా పరిస్థితి దయనీయం..

'చాలా మంది ఐపీఎల్‌ను ఆపేయాలని డిమాండ్ చేశారు. వారందరికి నేనొక్కటే చెప్పాలనుకుంటున్నా. నా కుటుంబంలో డబ్బులు సంపాదించేది నేనొక్కడినే. నా సంపాదనకు ఏకైక మార్గం ఐపీఎల్. ఈ లీగ్ నుంచి సంపాదించిన డబ్బుతోనే నేను నా తండ్రికి మెరుగైన చికిత్స అందించాను. నెలరోజుల పాటు ఈ టోర్నీ గనుక జరగకపోయుంటే నా పరిస్థితి చాలా దయనీయంగా ఉండేది. నేను చాలా పేద కుటుంబం నుంచి వచ్చాను. నా తండ్రి తన జీవితం మొత్తం టెంపో డ్రైవర్‌గా పనిచేశాడు. కాబట్టి నా జీవితమే ఐపీఎల్. అదే నా రాతను మార్చేది'అని సకారియా భావోద్వేగానికి గురయ్యాడు.

7 మ్యాచ్‌లు 7 వికెట్లు..

ఐపీఎల్ 2021 సీజన్‌లో మొత్తం ఏడు మ్యాచ్‌లు ఆడిన చేతన్ సకారియా.. ఏడు వికెట్లు తీశాడు. రెండు సార్లు మూడేసి వికెట్లు పడగొట్టాడు. పంజాబ్‌తో జరిగిన అరంగేట్ర మ్యాచ్‌లోనే (3/31) కేఎల్ రాహుల్, మయాంక్ అగర్వాల్, జై రిచర్డ్‌సన్‌లను పెవిలియన్ చేర్చాడు. ఆ మ్యాచ్‌లో నికోలస్ పూరన్‌ను సూపర్ క్యాచ్‌తో పెవిలియన్ చేర్చాడు.

ఇది ఈ సీజన్‌కే హైలైట్‌గా నిలిచింది. చెన్నై సూపర్ కింగ్స్ లెజెండ్స్ సురేశ్ రైనా, అంబటి రాయుడు, ఎంఎస్ ధోనీల వికెట్లు పడగొట్టాడు. సౌరాష్ట్ర తరఫున దేశవాళీ క్రికెట్ ఆడే సకారియా.. టీ20 క్రికెట్‌లో 16 మ్యాచ్‌లు ఆడి 28 వికెట్లు తీశాడు. ఎలాంటి పరిస్థితుల్లోనైనా ముఖంలో చిరునవ్వే ఉండే సకారియాకు మంచి భవిష్యత్తు ఉందని కామెంటేర్లు కొనియాడారు.