బాల్ ట్యాంపరింగ్ ఉదంతంపై మాటమార్చిన బెన్‌క్రాఫ్ట్.. మీడియాపై మండిపడ్డ ఆసీస్ బౌలర్లు!

సర్వత్రా విమర్శలు..

అయితే ఇటీవల ఓ ఇంటర్వ్యూలో న్యూల్యాండ్స్ ఘటన గురించి మాట్లాడిన బెన్‌క్రాఫ్ట్.. అప్పుడు టీమ్‌లో ఉన్న బౌలర్లకు ట్యాంపరింగ్ గురించి తెలుసని సంచలన వ్యాఖ్యలు చేశాడు. అతని కామెంట్స్ ఆస్ట్రేలియా క్రికెట్‌లో కలకలం రేపాయి. దాంతో ఈ ఉదంతంపై పై సమగ్ర విచారణ జరిపించడంలో క్రికెట్ ఆస్ట్రేలియా(సీఏ) విఫలమైందనే ఆరోపణలు వ్యక్తమవుతున్నాయి. మాజీ క్రికెటర్ ఆడమ్ గిల్‌క్రిస్ట్, డేవిడ్​ వార్నర్​ మేనేజర్​ జేమ్స్​ ఎర్​స్కైన్ కూడా ఈ వివాదంపై క్రికెట్ ఆస్ట్రేలియా సరైన రీతిలో దర్యాప్తు చేపట్టలేదని విమర్శించారు​. ఆటగాళ్లందరినీ విచారించకుండా ఆసీస్​ బోర్డు ఏకపక్ష నిర్ణయం తీసుకుందని అభిప్రాయపడ్డారు.

బెన్‌క్రాఫ్ట్ యూటర్న్..

దాంతో ఈ ఘటనపై రీఇన్వెస్టిగేషన్‌కు తాము సిద్దమంటూ క్రికెట్ ఆస్ట్రేలియా ప్రకటించింది. కానీ, ఆసీస్ మీడియా కథనాల ప్రకారం బెన్‌క్రాఫ్ట్ ఈ విషయంలో చెతులెత్తేశాడని తెలుస్తోంది.

తన దగ్గర ఎలాంటి సమాచారం లేదని తనను సంప్రదించిన సీఏ ఇంటిగ్రిటీ యూనిట్‌కు వివరణ ఇచ్చాడని సమాచారం. దీంతో సాండ్ పేపర్ గేట్‌పై రేగిన చిచ్చు చల్లారింది. కాగా, తన కామెంట్స్‌తో చిక్కుల్లో పడిన తమ టీమ్ బౌలర్లు కమిన్స్, హాజిల్ వుడ్, నాథన్ లయన్, స్టార్క్‌కు కూడా బెన్‌క్రాఫ్ట్ వివరణ ఇచ్చుకున్నాడు.

చిరాకుతో చెప్పిన సమాధానం..

దీనిపై బౌలర్లంతా ఉమ్మడిగా ఓ ప్రకటన విడుదల చేశారు. సాండ్ పేపర్ గేట్ గురించి ఇంటర్వ్యూలో ఊహించని ప్రశ్నలు ఎదురవ్వడంతో చిరాకుతో ఏదో సమాధానం చెప్పానని బెన్‌క్రాఫ్ట్ మాకు చెప్పాడని, కావాలని ఆ కామెంట్స్ చెయ్యలేదన్నాడు. న్యూలాండ్స్ టెస్ట్‌లో జరిగిన బాల్ ట్యాంపరింగ్ గురించి మాకు ముందుగా ఏమీ తెలియదనే విషయాన్ని మరోసారి స్పష్టం చేస్తున్నామని బౌలర్లు ఆ ప్రకటనలో స్పష్టం చేశారు. 'మా నిజాయితీ పట్ల మేము గర్వంగా ఉన్నాం. కానీ, ఇటీవల బాల్ ట్యాంపరింగ్ వివాదానికి సంబంధించి మమ్మల్ని తప్పుపట్టడం వల్ల కొంత బాధేసింది. మీడియాతో పాటు మాజీ ఆటగాళ్లు మమ్మల్ని ప్రశ్నించడం బాధాకరం. నాటి సంఘటనకు సంబంధించి ఏం జరిగిందో తెలియజేయాలని మాపై ఒత్తిడి చేస్తున్నారు. కానీ, అప్పుడు మైదానంలో ఏం జరిగిందో మాకేమీ తెలీదు" అని పేర్కొన్నారు.