టెన్షన్ తగ్గడానికి వరల్డ్‌కప్ ఫైనల్లో సిగరేట్ తాగిన బెన్ స్టోక్స్!

స్టోక్స్ కీలక పాత్ర..

ఇక ఇంగ్లండ్ విజయంలో ఆ జట్టు స్టార్ ఆల్‌రౌండర్ బెన్ స్టోక్స్ కీలక పాత్ర పోషించాడు. ముందుగా స్టార్ బ్యాట్స్‌మెన్ అంతా విఫలమైన వేళ 87 పరుగులతో అజేయంగా నిల్చొని మ్యాచ్‌ను టై చేశాడు. అనంతరం సూపర్ ఓవర్‌లో 8 పరుగులు చేసి జట్టుకు సూపర్ విక్టరీని అందించాడు. అయితే ఈ సూపర్ ఓవర్‌కు ముందు మైదానంలో నెలకొన్న నరాలు తెగేంత ఉత్కంఠను అధిగమించేందుకు స్టోక్స్ సిగరేట్ తాగినట్లు ‘మోర్గాన్ మెన్స్.. ది ఇన్ సైడ్ స్టోరీ ఆఫ్ ఇంగ్లండ్ వరల్డ్‌కప్ విన్నింగ్' పేరిట రచయితలు నిక్ హాల్ట్, స్టీమ్ జేమ్స్ రాసిన బుక్‌లో పేర్కొన్నారు.

స్థిత ప్రజ్ఞుడిగా ఉండటం కష్టం..

‘27000 మంది ప్రేక్షకులతో కిక్కిరిసిన మైదానం..టీవీ కెమెరాలు.. ఎన్నో ఏళ్ల కళ సాకారమయ్యే క్షణం.. కొండంత బలమైన ప్రత్యర్థి. ఫలితం తేలకుండా సూపర్ ఓవర్‌కు దారితీసిన క్షణం. ఈ పరిస్థితుల్లో స్థిత ప్రజ్ఞుడిగా ఉండటం ఎవరికైనా చాలా కష్టం. కానీ బెన్ స్టోక్స్ లార్డ్స్‌లో చాలా సార్లు ఆడాడు. ఈ మైదానం గురించి అతనికి అణవణువు తెలుసు. ఇక ఉద్విగ్న క్షణంలో ఇంగ్లండ్ కెప్టెన్ ఇయాన్ మోర్గాన్ డ్రెస్సింగ్ రూమ్‌లో తన వ్యూహాలను వివరిస్తూ సహచర ఆటగాళ్లలో టెన్షన్ తగ్గించేందుకు ప్రయత్నిస్తున్నప్పుడు స్టోక్స్ తనదైన దారిలో ఉత్కంఠతను తగ్గించుకున్నాడు.

ఒక్క దమ్ము పీల్చి..

అప్పటికే రెండు గంటల 27 నిమిషాల పాటు బ్యాటింగ్ చేయడంతో అతని ముఖం దుమ్ము, చెమటతో నిండిపోయింది. ఈ స్థితిలో అతను డ్రెస్సింగ్ రూమ్‌లో షెవర్ కింద తల పెట్టి ఫ్రెష్ అయ్యాడు. అనంతరం వెనక్కు వెళ్లి ఓ సిగరెట్ దమ్ము పీల్చి టెన్షన్ తగ్గించుకున్నాడు.'అని రచయితలు నిక్ హాల్ట్, స్టీవ్ జేమ్స్ బుక్‌లో ప్రస్తావించారు. ఇక 2003 ప్రపంచకప్‌లో పాకిస్థాన్‌తో జరిగిన సెమీఫైనల్ మ్యాచ్‌లో ఒత్తిడిని అధిగమించేందుకు సచిన్ టెండూల్కర్ కూడా ఐస్ క్రీమ్, అరటి పండు, మ్యూజిక్ విన్నట్లు తెలిపాడు.

మ్యాచ్ టై..

ఇక టాస్ గెలిచి బ్యాటింగ్‌కు దిగిన న్యూజిలాండ్ నిర్ణీత 50 ఓవర్లలో 8 వికెట్లు 241 పరుగలు చేసింది. హెన్రీ నికోలస్(55).. టామ్ లాథమ్(47) టాప్‌స్కోరర్లుగా నిలవగా.. ఇంగ్లండ్ బౌలర్లలో క్రిస్ వోక్స్, లియమ్ ప్లంకెట్ మూడేసి వికెట్లు పడగొట్టారు. అనంతరం ఛేజింగ్‌కు దిగిన ఇంగ్లండ్.. బెన్ స్టోక్స్(84 నాటౌట్) అజేయ పోరాటానికి జోస్ బట్లర్(59) సూపర్ ఇన్నింగ్స్ తోడవడంతో.. నిర్ణీత 50 ఓవర్లలో సరిగ్గా 241 పరుగులకే ఆలౌటైంది. దీంతో మ్యాచ్ టై అయి సూపర్ ఓవర్‌కు దారితీసింది. ఇక సూపర్ ఓవర్‌లో తొలుత బ్యాటింగ్ చేసిన ఇంగ్లండ్ 15 పరుగులు చేసింది. తర్వాత న్యూజిలాండ్ కూడా అదే 15 పరుగులు చేయడంతో బౌండరీల నిబంధన ఆధారంగా ఇంగ్లండ్ విజేతగా నిలిచింది.

బ్లాక్‌బస్టర్ మూవీని తలపించిన ఆ ఉద్విగ్న క్షణానికి అప్పుడే ఏడాది!