శార్దూల్ ఠాకూర్ సిక్స్‌కు బిత్తరపోయిన స్టోక్స్.. ఇదేం బ్యాట్ అంటూ చెకింగ్ (వీడియో)

అసలేం జరిగిందంటే..?

45వ ఓవర్ వేసిన బెన్ స్టోక్స్​ నాలుగో బంతిని ఔట్ సైడ్‌ అఫ్‌ స్టంప్‌ దిశగా వేసాడు. ఆ బంతిని శార్దూల్‌ ఫ్రంట్‌ ఫుట్‌కు వచ్చీ లాంగాఫ్ దిశగా భారీ సిక్స్‌ కొట్టాడు. ఈ సిక్స్‌కు ప్రతీ ఒక్కరూ ఫిదా అయ్యారు. తాను వేసిన మంచి లెంగ్త్ బాల్‌ను కూడా శార్ధూల్ సిక్సర్‌గా మలచడం చూసి అవాక్కయ్యాడు. అదే సమయంలో నాన్‌స్టైకింగ్‌ ఎండ్‌లోకి వచ్చిన శార్దూల్‌ ఠాకూర్ దగ్గరకు వెళ్లి మరీ బ్యాట్‌ను పరిశీలించాడు. ఆ సూపర్ సిక్స్‌ ఎలా సాధ్యమైందని నవ్వుతూ ప్రశ్నించిన స్టోక్స్‌.. బ్యాట్‌ను పట్టుకుని మరీ చెక్‌ చేశాడు.

ఈ మ్యాచ్‌లో భారత్‌ 11 సిక్స్‌లు కొట్టగా అందులో పంత్‌, హార్దిక్‌లు తలో నాలుగు సిక్స్‌లు కొట్టారు. మిగతా మూడు శార్దూల్‌ బ్యాట్‌ నుంచి వచ్చినవే.

చెలరేగిన పంత్, పాండ్యా

రిషభ్ పంత్(62 బంతుల్లో 5 ఫోర్లు, 4 సిక్స్‌లతో 78), హార్దిక్ పాండ్యా(44 బంతుల్లో 5 ఫోర్లు, 4 సిక్స్‌లతో 64), శిఖర్ ధావన్(56 బంతుల్లో 10 ఫోర్లతో 67) హాఫ్ సెంచరీలతో చెలరేగడంతో ఇంగ్లండ్ ముందు భారత్ 330 పరుగుల భారీ లక్ష్యాన్ని ఉంచింది. ఓపెనర్ల ధనాధన్ ఇన్నింగ్స్‌కు పంత్-పాండ్యా మెరుపులు తోడవడంతో భారత్ ఓ దశలో 350 పైగా పరుగులు చేస్తుందనిపించింది. కానీ ఇంగ్లండ్ బౌలర్లు వరుస విరామాల్లో వికెట్లు తీయడంతో భారత్ 48.2 ఓవర్లలో 329 పరుగులకు ఆలౌటైంది. ఇంగ్లండ్ బౌలర్లలో మార్క్ వుడ్ 3 వికెట్లు తీయగా.. ఆదిల్ రషీద్ రెండు వికెట్లు పడగొట్టాడు. ఇక లివింగ్‌స్టన్, మోయిన్ అలీ, బెన్ స్టోక్స్, సామ్ కరన్, టోప్లీ తలో వికెట్ తీశారు.

కష్టాల్లో ఇంగ్లండ్..

330 పరుగుల భారీ లక్ష్యంతో బరిలోకి దిగిన ఇంగ్లండ్ 168 పరుగులకే 6 వికెట్లు కోల్పోయి కష్టాల్లో పడింది. ఓపెనర్లు జాసన్ రాయ్(14), బెయిర్ స్టో(1)లను పెవిలియన్ చేర్చి భువనేశ్వర్ మంచి ఆరంభాన్ని అందివ్వగా.. క్రీజులో కుదురుకుంటున్న బెన్ స్టోక్స్‌ను నటరాజన్ ఔట్ చేశాడు. ఆ తర్వాత క్రీజులోకి వచ్చిన కెప్టెన్ జోస్ బట్లర్‌(15)ను శార్దూల్ వికెట్ల ముందు బోల్తాకొట్టించాడు. ఈ క్రమంలో లివింగ్‌స్టోన్(35), డేవిడ్ మలాన్(50) పోరాడారు. అయితే ఈ ఇద్దర్ని శార్దూల్ వరుస ఓవర్లలో పెవిలియన్ చేర్చి ఇంగ్లండ్‌ను కోలుకోలేని దెబ్బతీశాడు.