కరోనా ఎఫెక్ట్.. బీసీసీఐ ఆఫీస్ బంద్.. ఉద్యోగులకు వర్క్ ఫ్రమ్ హోమ్

న్యూఢిల్లీ: ప్రపంచాన్ని వణికిస్తున్న కరోనా వైరస్ కారణంగా ఇప్పటికే స్కూళ్లు, ఆఫీసులు, మాల్స్, థియేటర్స్ అన్నీ తాత్కలికంగా మూతపడుతున్నాయి. ఇప్పటికే ఈ ప్రాణాంతక వైరస్‌తో బీసీసీఐ అల్లాడుతోంది. కొవిడ్-19 ముప్పుతో ఐపీఎల్ సహా దేశవాళీ క్రికెట్ మ్యాచ్‌లను వాయిదా వేసింది. సౌతాఫ్రికాతో జరగాల్సిన వన్డే సిరీస్‌ను రద్దు చేసింది. తాజాగా ముంబైలోని ప్రధాన కార్యాలయాన్ని సైతం మూసివేస్తోంది. ఉద్యోగులందరినీ మంగళవారం నుంచి వర్క ఫ్రమ్ హోమ్ చేయాలని సూచించింది. ఈ విషయాన్ని బోర్డులోని ఒక సీనియర్‌ అధికారి మీడియాకు తెలిపారు.

'కొవిడ్-19 వైరస్ కారణంగా వాంఖడే స్టేడియంలో బీసీసీఐ ప్రధాన కార్యాలయాన్ని మూసివేయనున్నారు. ఉద్యోగులందరికీ వర్క్ ఫ్రమ్ హోమ్ చేయాలని ఈ రోజే చెప్పారు.'అని సదరు అధికారి చెప్పుకొచ్చారు.

కరోనాను కట్టడి చేసేందుకు జనసమూహం లేకుండా చూడాలని బీసీసీఐ సహా అన్ని క్రీడా సమాఖ్యలకు కేంద్ర క్రీడాశాఖ ఆదేశించిన సంగతి తెలిసిందే. ఈ మేరకు ఏప్రిల్‌ 15 వరకు ఐపీఎల్‌ను బీసీసీఐ వాయిదా వేసింది. అంతర్జాతీయ, దేశవాళీ సిరీసులను రద్దు చేసింది. దేశంలోని ఇతర రాష్ట్రాల కన్నా ముంబైలో కొవిడ్‌ వ్యాప్తి ఎక్కువగా ఉండటం గమనార్హం. భారత్‌లో ఇప్పటి వరకు 114 కేసులు నమోదైన సంగతి తెలిసిందే.