అందుకే వైభవ్ సూర్యవంశీ అరంగేట్రం ఆలస్యం: బీసీసీఐ

టీమిండియా టీనేజ్ సెన్సేషన్ వైభవ్ సూర్యవంశీ అంతర్జాతీయ అరంగేట్రం కోసం యావత్ క్రికెట్ ప్రపంచం ఆసక్తిగా ఎదురు చూస్తోంది. ప్రస్తుతం ఇంగ్లండ్ పర్యటనలో ఉన్న ఈ 15 ఏళ్ల విధ్వంసకర బ్యాటర్ కోసం క్రికెట్ ప్రపంచమే రెండుగా చీలిపోయింది. వెంటనే వైభవ్ సూర్యవంశీని తుది జట్టులోకి తీసుకోవాలని గవాస్కర్, రవి శాస్త్రి, ఏబీ డివిలియర్స్ వంటి దిగ్గజాలు డిమాండ్ చేస్తుంటే.. అశ్విన్, సబా కరీం, చతేశ్వర్ పుజారా వంటి మాజీ ఆటగాళ్లు మాత్రం అతన్ని బెంచ్‌పై కూర్చోబెట్టాలని సూచిస్తున్నారు.

బుడ్డోడి క్రేజ్.. బీసీసీఐపై నెటిజన్ల ఫైర్!

తద్వారా తుది జట్టులో అవకాశం రావడం ఎంత కష్టమో వైభవ్‌కు తెలియజేయాలని అభిప్రాయపడుతున్నారు. మరోవైపు టీమిండియా మేనేజ్‌మెంట్ సీనియర్ ఆటగాళ్లకు ప్రాధాన్యత ఇస్తూ వైభవ్‌ను బెంచ్‌కే పరిమితం చేస్తోంది. దాంతో వైభవ్ సూర్యవంశీ అరంగేట్ర వ్యవహారం సోషల్ మీడియా వేదికగా తీవ్ర చర్చనీయాంశమైంది. వరుసగా మూడు మ్యాచ్‌ల్లో వైభవ్ బెంచ్‌కే పరిమితం కావడంతో అభిమానుల్లో ఆసక్తి, అసహనం రెండూ పెరుగుతున్నాయి.

టీమ్‌మేనేజ్‌మెంట్‌కు అండగా బీసీసీఐ..

వైభవ్ సూర్యవంశీ అరంగేట్ర ఆలస్యం కావడంపై బీసీసీఐ వైస్ ప్రెసిడెంట్ రాజీవ్ శుక్లా స్పందించారు. టీమ్ మేనేజ్‌మెంట్ నిర్ణయాన్ని ఆయన సమర్థించారు. వైభవ్ సూర్యవంశీ ప్రతిభను చూసి జట్టులోకి ఎంపిక చేశారని, తుది జట్టులో ఆడించే విషయం పూర్తిగా టీమ్ మేనేజ్‌మెంట్‌దేనని స్పష్టం చేశారు. మేనేజ్‌మెంట్‌పై నమ్మకం ఉంచాలని, సోషల్ మీడియా వేదికగా వ్యక్తిగత విమర్శలకు దిగడం సరికాదని అభిప్రాయపడ్డారు.

ప్రస్తుతం టీమిండియా మేనేజ్‌మెంట్ సీనియర్, నిలకడైన ఆటగాళ్లకు ప్రాధాన్యత ఇస్తోంది. భారత్.. ఐసీసీ టీ20 ప్రపంచకప్ 2026 గెలవడంలో ఇషాన్ కిషన్, సంజూ శాంసన్, అభిషేక్ శర్మ కీలక పాత్ర పోషించారు. ఒకటి రెండు మ్యాచ్‌ల్లో విఫలమైనా వారికి అండగా ఉండాలని టీమ్ ఆలోచనగా కనిపిస్తోంది.

ప్రపంచకప్ విన్నర్ల కోసం..

ముఖ్యంగా టీమ్ సెటప్‌ను డిస్టర్బ్ చేయడానికి ఇష్టపడటం లేదు. ఐసీసీ ఛాంపియన్స్ ట్రోఫీ, ఆసియా కప్, ఐసీసీ టీ20 ప్రపంచకప్ విజయాలతో అదే కాంబినేషన్‌ను కొనసాగించాలనే పట్టుదలతో ఉంది. వైభవ్ ప్రతిభపై సందేహం లేకపోయినా.. సీనియర్లకు అండగా ఉండాలని టీమ్ మేనేజ్‌మెంట్ భావిస్తోంది.

వైభవ్‌ సూర్యవంశీని మరి అంతగా లేపకండి: కపిల్ దేవ్

అసిస్టెంట్ కోచ్ ర్యాన్ టెన్ డస్కాటే కూడా వైభవ్ అంతర్జాతీయ క్రికెట్‌కు సిద్ధంగా ఉన్నాడని చెప్పాడు. కానీ సంజూ శాంసన్ వంటి ఆటగాళ్ల పాత్రను అతను గుర్తు చేశాడు. నయా టీ20 కెప్టెన్ శ్రేయస్ అయ్యర్ కూడా ప్రపంచకప్ గెలిపించిన ఆటగాళ్లకు భరోసా ఇవ్వడం అవసరమని అభిప్రాయపడ్డాడు.

వైభవ్ సూర్యవంశీ అరంగేట్రం ఆలస్యం అవుతున్నా.. అది అతని ప్రతిభను తక్కువ చేయడం కాదని కొందరు మాజీ క్రికెటర్లు అభిప్రాయపడుతున్నారు. భారత జట్టులో పోటీ తీవ్రంగా ఉన్న సమయంలో మేనేజ్‌మెంట్ జాగ్రత్తగా అడుగులు వేస్తోందని చెబుతున్నారు. వైభవ్ అతని అవకాశం కోసం ఎదురు చూడాలని హితవు పలుకుతున్నారు.