Australia Playing XI: ఇండోర్ టెస్ట్‌లో ఇండియాను ఓడించే ఆసీస్ టీమ్ ఇదే!

కెప్టెన్‌గా స్టీవ్ స్మిత్..

ఇండోర్ వికెట్ కాస్త బౌన్సీగా ఉండటంతో పాటు పేస్‌కు అనుకూలిస్తుందనే నేపథ్యంలో ఈ మ్యాచ్‌‌లో గెలిచి తీరాలనే పట్టుదలతో సిద్దమవుతోంది.

అయితే ఈ మ్యాచ్‌కు ముందు ఆస్ట్రేలియాను గాయాల బెడదతో పాటు అనూహ్య పరిస్థితు ఇబ్బంది పెడుతున్నాయి. డేవిడ్ వార్నర్, జోష్ హజెల్ వుడ్ గాయాలతో సిరీస్ మొత్తానికి దూరం కాగా.. కెప్టెన్ ప్యాట్ కమిన్స్ అత్యవసర పరిస్థితులతో స్వదేశం పయనమయ్యాడు. అతను చివరి రెండు టెస్ట్‌లతో పాటు వన్డే సిరీస్ ఆడటంపై కూడా సందేహాలు నెలకొన్నాయి. ఈ ముగ్గురు దూరమైనా.. మిచెల్ స్టార్క్, కామెరూన్ గ్రీన్ గాయాల నుంచి కోలుకొని జట్టులోకి వచ్చారు. ప్యాట్ కమిన్స్ గైర్హాజరీలో స్టీవ్ స్మిత్ జట్టును నడిపించనున్నాడు.

కామెరూన్ గ్రీన్, స్టార్క్ రెడీ..

తొలి రెండు టెస్ట్‌లకు బరిలోకి దిగిన ఆటగాళ్లు అందుబాటులో లేకపోవడం.. కొత్తగా ఇద్దరు ఆటగాళ్లు జట్టులోకి రావడంతో తుది జట్టు ఎంపిక స్మిత్‌కు తలనొప్పిగా మారింది. ఇద్దరు పేసర్లతో వెళ్లాలా? లేక ముగ్గురు స్పిన్నర్లతో బరిలోకి దిగాలా? అనేది తేల్చుకోలేకపోతున్నాడు. అయితే బ్యాటింగ్ ఆల్‌రౌండర్ కామెరూన్ గ్రీన్ అందుబాటులోకి రావడం స్మిత్‌కు కలిసిరానుంది. గ్రీన్ బ్యాటింగ్‌తో పాటు బౌలింగ్‌లో సత్తా చాటగలిగితే ఆసీస్‌కు తిరుగుండదు. టీమ్ కాంబినేషన్ కూడా సెట్ అవుతోంది. కమిన్స్ స్థానంలో పేసర్‌గా మిచెల్ స్టార్క్ ఆడనుండగా.. మ్యాట్ రేన్ షా స్థానంలో గ్రీన్ తుది జట్టులోకి రానున్నాడు.

వార్నర్ స్థానంలో ట్రావిస్ హెడ్..

డేవిడ్ వార్నర్ గైర్హాజరీలో ట్రావిస్ హెడ్.. ఉస్మాన్ ఖవాజాతో కలిసి ఓపెనింగ్ చేయనున్నాడు. ఈ ఇద్దరూ రెండో టెస్ట్‌లో పర్వాలేదనిపించినా.. భారీ ఇన్నింగ్స్‌లు ఆడలేకపోయారు. ఫస్ట్ డౌన్‌లో మార్నస్ లబుషేన్, నాలుగో స్థానంలో కెప్టెన్ స్టీవ్ స్మిత్ ఆడనున్నారు. ఈ ఇద్దరూ ఇప్పటి వరకు చెప్పుకోదగ్గ ఇన్నింగ్స్ ఒక్కటి కూడా ఆడలేదు. ఐదో స్థానంలో కామెరూన్ గ్రీన్ బరిలోకి దిగనుండగా... మ్యాట్ రేన్‌షా బెంచ్‌కే పరిమితం కానున్నాడు. ఆరో స్థానంలో పీటర్ హ్యాండ్‌స్కోంబ్, ఏడో స్థానంలో కీపర్ అలెక్స్ క్యారీ బ్యాటింగ్ చేయనున్నారు.

స్టార్క్ సారథ్యంలో బౌలింగ్ విభాగం..

మిచెల్ స్టార్క్‌తో కలిసి నాథన్ లయన్, టాడ్ ముర్ఫీ, మాథ్యూ కుహ్నెమన్ బౌలింగ్ బాధ్యతలు పంచుకునే అవకాశం ఉంది. ఈ నలుగురికి ఆల్‌రౌండర్లు హ్యాండ్‌స్కోంబ్, కామెరూన్ గ్రీన్ సహాయం అందివ్వనున్నారు. ఇండోర్ పిచ్ చూసిన తర్వాత ధానికి తగ్గట్లు టీమ్ కాంబినేషన్‌పై తుది నిర్ణయం తీసుకోనున్నారు. వికెట్ బౌన్సీగా ఉండటంతో పాటు పేస్‌కు అనుకూలిస్తే ఎక్స్‌ట్రా పేసర్ జట్టులోకి రానున్నాడు. లాన్స్ మొర్రీస్ అరంగేట్ర చేసే చాన్స్ ఉంది. ఎక్స్‌ట్రా బ్యాటర్‌‌తో ఆడాలనుకుంటే మ్యాట్ రేన్‌షా తన స్థానాన్ని నిలబెట్టుకుంటాడు.

ఆసీస్ తుది జట్టు(అంచనా)

ఉస్మాన్ ఖవాజా, ట్రావిస్ హెడ్, మార్నస్ లబుషేన్, స్టీవ్ స్మిత్(కెప్టెన్), కామెరూన్ గ్రీన్, పీటర్ హ్యాండ్‌స్కోంబ్, అలెక్స్ క్యారీ, మిచెల్ స్టార్క్, నాథన్ లయన్, టాడ్ ముర్ఫీ, మాథ్యూ కుహ్నెమన్/లాన్స్ మొర్రీస్