Asia Cup 2025 షెడ్యూల్‌లో మార్పు.. ఎందుకంటే?

ఆసియా కప్ 2025 షెడ్యూల్‌లో కీలక మార్పు జరిగింది. మ్యాచ్‌ల సమయాన్ని మారుస్తూ ఆసియా క్రికెట్ కౌన్సిల్(ఏసీసీ) నిర్ణయం తీసుకుంది. సెప్టెంబర్ 9 నుంచి యూఏఈ వేదికగా ఈ టోర్నీ ప్రారంభం కానుండగా.. 8 జట్లు బరిలోకి దిగుతున్నాయి. ఫైనల్‌తో సహా మొత్తం 18 మ్యాచ్‌లు జరగనున్నాయి. ఈ 18 మ్యాచ్‌ల టైమింగ్స్‌ను ఏసీసీ మార్చింది. రాత్రి 7.30 గంటలకు ప్రారంభం కావాల్సిన మ్యాచ్‌లు.. సవరించిన సమయం ప్రకారం 8 గంటలకు మొదలవుతాయి.

సాయంత్రం 4 గంటలకు మొదలయ్యే మ్యాచ్‌లు 5.30 గంటలకు ప్రారంభమవుతాయి. ప్రస్తుతం దుబాయ్‌లో విపరీతమైన ఎండలు కొడుతుండటంతో ఏసీసీ ఈ నిర్ణయం తీసుకుంది. ఉక్కపోత నుంచి ఆటగాళ్లను రక్షించేందుకే మ్యాచ్‌ సమయాలను మార్చినట్లు ఏసీసీ ప్రతినిధి ఒకరు మీడియాకు తెలిపారు.

సెప్టెంబర్ 9న అబుదాబి వేదికగా అఫ్గానిస్థాన్, హాంగ్ కాంగ్ మధ్య తొలి మ్యాచ్ జరగనుంది. సెప్టెంబర్ 10న యూఏఈతో జరిగే తొలి మ్యాచ్‌తో డిఫెండింగ్ ఛాంపియన్ భారత్ తమ క్యాంపైన్‌ను ప్రారంభించనుంది. సెప్టెంబర్ 14న చిరకాల ప్రత్యర్థి పాకిస్థాన్‌తో టీమిండియా తలపడనుంది. యూఏఈ, పాకిస్థాన్, ఓమన్‌లతో భారత్ గ్రూప్‌-ఏలో ఉండగా.. శ్రీలంక, బంగ్లాదేశ్, అఫ్గానిస్థాన్, హాంగ్ కాంగ్ గ్రూప్‌ బీలో ఉన్నాయి. భారత్, పాక్ మెరుగైన ప్రదర్శన చేసి ఫైనల్ చేరితే మూడు సార్లు తలపడనున్నాయి.