IND vs PAK: ఏం గుండెరా అది.. పాక్ బెస్ట్ బౌలర్‌కే చుక్కలా!

ఆసియా కప్ 2025 టోర్నీలో టీమిండియా స్టార్ ఓపెనర్ అభిషేక్ శర్మ దుమ్మురేపుతున్నాడు. ప్రత్యర్థితో పనిలేకుండా చెలరేగుతున్నాడు. వరల్డ్ నెంబర్ వన్ టీ20 బ్యాటర్ పవర్ ఏంటో చూపిస్తున్నాడు. దాయాదీ పాకిస్థాన్‌తో తొలి మ్యాచ్ ఆడుతున్నా.. హై ఓల్టేజ్ మ్యాచ్ అనే బెరుకు లేకుండా విధ్వంసం సృష్టించాడు. పాకిస్థాన్ టాప్ బౌలర్ అయిన షాహీన్ షా అఫ్రిదికే చుక్కలు చూపించాడు. ఎవరైతే నాకేంది? డోంట్ కేర్ అన్న రీతిలో చిన్నపాటి పరుగుల తుఫాను సృష్టించి వెనుదిరిగాడు.

అభిషేక్ శర్మ విధ్వంసకర బ్యాటింగ్‌కు నెటిజన్లు ఫిదా అయ్యారు. 'ఏం గుండెరా అది.. పాక్ బెస్ట్ బౌలర్‌కే చుక్కలా?'అని కొనియాడుతున్నారు. 128 పరుగుల స్వల్ప లక్ష్య ఛేదనలో శుభ్‌మన్ గిల్‌తో కలిసి ఓపెనర్‌గా బరిలోకి దిగిన అభిషేక్ శర్మ.. షాహీన్ షా అఫ్రిదీ వేసిన తొలి ఓవర్ తొలి బంతినే బౌండరీకి తరలించాడు. ఆ మరుసటి బంతినే లాంగాఫ్ దిశగా భారీ సిక్సర్ కొట్టి అఫ్రిది దిమ్మతిరిగే షాకిచ్చాడు.

షాహీన్ అఫ్రిది వేసిన మరుసటి ఓవర్‌లోనూ తొలి బంతినే బౌండరీకి తరలించిన అభిషేక్ శర్మ.. మూడో బంతిని మిడ్ వికెట్ దిశగా భారీ సిక్సర్ బాదాడు. ఈ షాట్‌కు షాహీన్ షా అఫ్రిది నోరెళ్లబెట్టాడు. సైమ్ అయుబ్ బౌలింగ్‌లోనూ వరుసగా రెండు బౌండరీలు బాదిన అభిషేక్ శర్మ.. మూడో బంతికి కూడా భారీ షాట్ ఆడబోయి క్యాచ్ ఔట్‌గా వెనుదిరిగాడు. దాంతో అభిషేక్ చిన్నపాటి తుఫానుకు బ్రేక్ పడగా.. షాహీన్ షా అఫ్రిది ఊపిరి పీల్చుకున్నాడు.

13 బంతులు మాత్రమే ఆడిన అభిషేక్ శర్మ 4 ఫోర్లు, 2 సిక్స్‌లతో 31 పరుగులు చేసి వెనుదిరిగాడు. అతని స్ట్రైక్‌రేట్ 238.46 కావడం గమనార్హం. మరో 10 బంతులు అభిషేక్ శర్మ ఆడి ఉంటే.. మ్యాచ్ 10 ఓవర్లలోనే ముగిసేది. యూఏఈతో జరిగిన తొలి మ్యాచ్‌లోనూ ఫస్ట్ బాల్‌నే అభిషేక్ శర్మ సిక్సర్ బాదాడు. దంచికొట్టడమే తన పని అని చాటి చెప్పాడు.

ఈ మ్యాచ్‌లో ముందుగా బ్యాటింగ్ చేసిన పాకిస్థాన్ నిర్ణీత 20 ఓవర్లలో 9 వికెట్లకు 127 పరుగులు చేసింది. షాహీన్ షా అఫ్రిది(16 బంతుల్లో 4 సిక్స్‌లతో 33 నాటౌట్) ఒక్కడే దూకుడుగా ఆడగా.. సాహిబ్జాదా ఫర్హాన్(44 బంతుల్లో ఫోర్, 3 సిక్స్‌లతో 40) ఆచితూచి ఆడాడు. భారత బౌలర్లలో కుల్దీప్ యాదవ్(3/18) మూడు వికెట్లు తీయగా.. అక్షర్ పటేల్(2/18), జస్‌ప్రీత్ బుమ్రా రెండేసి వికెట్లు పడగొట్టారు. హర్దిక్ పాండ్యా, జస్‌ప్రీత్ బుమ్రా, వరుణ్ చక్రవర్తీ చెరో వికెట్ తీసారు. ఈ ఇన్నింగ్స్‌లో ఏడు ఫోర్లు, ఏడు సిక్స్‌లు మాత్రమే నమోదవ్వడం గమనార్హం. ఓ దశలో పాక్ 100 పరుగులైనా చేస్తుందా? అనిపించింది. కానీ షాహిన్ షా అఫ్రిది దూకుడుగా ఆడి పాక్‌కు పోరాడే లక్ష్యాన్ని అందించాడు.