Ashes 2021: గర్జించిన ‘లయన్’.. ఆస్ట్రేలియా శుభారంభం.. చిత్తుగా ఓడిన ఇంగ్లండ్!

కమిన్స్ దెబ్బకు..

అంతకు ముందు తొలి ఇన్నింగ్స్‌లో కెప్టెన్ ప్యాట్ కమిన్స్‌(5/38) ఐదు వికెట్లతో చెలరేగడంతో ఇంగ్లండ్‌ 147 పరుగులకే కుప్పకూలింది. జోస్ బట్లర్‌ (39), ఓలి పోప్‌ (35), హసీబ్‌ హమీద్‌ (25), క్రిస్ వోక్స్‌ (21) పరుగులు చేయడంతో ఇంగ్లండ్‌ ఈ మాత్రం స్కోరునైనా చేయగలిగింది. మిగతా బ్యాటర్లంతా దారుణంగా విఫలమయ్యారు. కమిన్స్‌కు తోడుగా హజెల్ వుడ్, మిచెల్ స్టార్క్ రెండేసి వికెట్లు తీయగా.. కామెరూన్ గ్రీన్ ఓ వికెట్ పడగొట్టాడు.

పటిష్ట స్థితిలో నిలిచినా..

అనంతరం తొలి ఇన్నింగ్స్‌ ప్రారంభించిన ఆస్ట్రేలియా 425 పరుగుల భారీ స్కోర్ చేసింది. ట్రావిస్‌ హెడ్‌ ధనాధన్ సెంచరీకి.. ఓపెనర్‌ డేవిడ్‌ వార్నర్ (176 బంతుల్లో 11 ఫోర్లు, 2 సిక్స్‌లతో 94), లబూషేన్(117 బంతుల్లో 6 ఫోర్లు, 2 సిక్స్‌లతో 74) రాణించారు. దాంతో ఆసీస్‌కు 297 పరుగుల భారీ ఆధిక్యం లభించింది. ఇంగ్లండ్ బౌలర్లలో మార్క్‌ వుడ్‌, రాబిన్సన్‌ తలో మూడు, క్రిస్‌ వోక్స్ రెండు, జాక్‌లీచ్‌, రూట్ తలో వికెట్‌ తీశారు. అనంతరం రెండో ఇన్నింగ్స్‌ ప్రారంభించిన ఇంగ్లండ్‌ మూడో రోజు ఆట ముగిసే సరికి 220/2 స్కోరుతో పటిష్ట స్థితిలో నిలిచింది.

గర్జించిన లయన్..

అయితే, నాలుగో రోజు నాథన్‌ లయన్(4/91) నాలుగు వికెట్లతో విజృంభించడంతో ఇంగ్లండ్‌ మరోసారి స్వల్ప స్కోర్‌కే కుప్పకూలింది. మరో 77 పరుగులు జోడించి 297 పరుగులకు ఆలౌటైంది. కెప్టెన్ జోరూట్(165 బంతుల్లో 10 ఫోర్లతో 89), డేవిడ్ మలాన్(195 బంతుల్లో 10 ఫోర్లతో 82) మినహా అంతా విఫలమయ్యారు. ఈ ఇద్దరూ మూడో వికెట్‌కు ఏకంగా 172 పరుగులు జోడించారు. ముందుగా మలన్‌ను లయన్ క్యాచ్ ఔట్‌ చేయగా.. జోరూట్‌కు కామెరూన్ గ్రీన్ కళ్లెం వేసాడు. కీపర్ క్యాచ్‌గా పెవిలియన్ చేర్చాడు. 6 పరుగుల వ్యవధిలోనే ఈ ఇద్దరు ఔటవ్వగా.. అనంతరం ఇంగ్లండ్ ఇన్నింగ్స్ పేకమేడలా కూలింది.