IND vs USA: చరిత్ర సృష్టించిన అర్ష్‌దీప్ సింగ్..!

టీమిండియా యువ పేసర్ అర్ష్‌దీప్ సింగ్ చరిత్ర సృష్టించాడు. అంతర్జాతీయ టీ20ల్లో ఇన్నింగ్స్ ఫస్ట్‌బాల్‌కే వికెట్ తీసిన తొలి భారత బౌలర్‌గా చరిత్రకెక్కాడు. టీ20 ప్రపంచకప్ 2024లో భాగంగా అమెరికాతో బుధవారం జరిగిన మ్యాచ్‌లో అర్ష్‌దీప్ సింగ్(4/9) నాలుగు వికెట్లతో సత్తా చాటాడు.

అమెరికా ఇన్నింగ్స్ తొలి బంతికే ఓపెనర్ షయన్ జహంగీర్(0)ను వికెట్ల ముందు బోల్తాకొట్టించిన అర్ష్‌దీప్ సింగ్.. గోల్డెన్ డక్‌గా పెవిలియన్ చేర్చాడు. ఈ వికెట్‌తో అంతర్జాతీయ టీ20ల్లో ఇన్నింగ్స్ ఫస్ట్ బాల్‌కు వికెట్ తీసిన తొలి భారత బౌలర్‌గా గుర్తింపు పొందాడు. టీమిండియా టీ20ల్లోకి అరంగేట్రం చేసిన 18 ఏళ్ల తర్వాత 222వ మ్యాచ్‌లో అర్ష్‌దీప్ సింగ్ ఈ ఫీట్ అందుకోవడం గమనార్హం.

టీ20 క్రికెట్‌లో ఇలా ఇన్నింగ్స్ ఫస్ట్ బాల్‌కే వికెట్ తీయడం 71వ సారి. కానీ భారత్ బౌలర్ ఈ ఫీట్ సాధించడం మాత్రం ఇదే తొలిసారి. టీ20 ప్రపంచకప్ చరిత్రలో ఇన్నింగ్స్ ఫస్ట్ బాల్‌కు వికెట్ తీయడం ఇది ఐదోసారి.

2014 టీ20 ప్రపంచకప్‌లో బంగ్లాదేశ్ బౌలర్ మష్రఫే మోర్తజా తొలిసారి ఈ ఫీట్ సాధించాడు. అఫ్గాన్ బ్యాటర్ మహమ్మద్ షెహ్‌జాద్‌ను తొలి బంతికే ఔట్ చేశాడు. అదే టోర్నీ షాపూర్ జడ్రాన్ ఈ ఫీట్ నమోదు చేయగా.. 2021లో నమీబియా బౌలర్ రుబెన్ ఈ ఘనతను అందుకున్నాడు. తాజా టోర్నీలో నమీబియా బౌలర్ రుబెన్, భారత పేసర్ అర్ష్‌దీప్ సింగ్ ఈ ఫీట్ సాధించారు.

టీ20 ప్రపంచకప్ 2024లో అత్యుత్తమ బౌలింగ్ గణంకాలు నమోదు చేసిన భారత బౌలర్‌గా కూడా అర్ష్‌దీప్ సింగ్ రికార్డు నమోదు చేశాడు. ఈ క్రమంలో రవిచంద్రన్ అశ్విన్(4/11), హర్భజన్ సింగ్(4/12), ఆర్‌పీ సింగ్(4/13), జహీర్ ఖాన్(4/19), ప్రజ్ఙాన్ ఓజా(4/21)లను అర్ష్‌దీప్ సింగ్ అధిగమించాడు.

ఈ మ్యాచ్‌లో ముందుగా బ్యాటింగ్‌ చేసిన అమెరికా నిర్ణీత 20 ఓవర్లలో 8 వికెట్లకు 110 పరుగులు చేసింది. నితీష్ కుమార్(23 బంతుల్లో 2 ఫోర్లు, సిక్స్‌తో 27), స్టీవెన్ టేలర్(30 బంతుల్లో 2 సిక్స్‌లతో 24) టాప్ స్కోరర్లుగా నిలిచారు.

భారత బౌలర్లలో అర్ష్‌దీప్ సింగ్(4/9) నాలుగు వికెట్లు తీయగా.. హార్దిక్ పాండ్యా(2/14) రెండు వికెట్లు పడగొట్టాడు. అక్షర్ పటేల్(1/25)కు ఓ వికెట్ దక్కింది.