ఆ క్యాచ్ వదిలేయడం మా కొంపముంచింది: అఫ్గానిస్థాన్ కెప్టెన్

Hashmatullah Shahidi, AFG vs AUS: గ్లేన్ మ్యాక్స్‌వెల్ ఇచ్చిన సునాయస క్యాచ్‌ను నేలపాలు చేయడం తమ ఓటమిని శాసించిందని అఫ్గానిస్థాన్ కెప్టెన్ హష్మతుల్లా షాహిది తెలిపాడు. వన్డే ప్రపంచకప్ 2023లో భాగంగా ఆస్ట్రేలియాతో మంగళవారం జరిగిన మ్యాచ్‌లో అఫ్గానిస్థాన్ 3 వికెట్ల తేడాతో ఓటమిపాలైంది. ఓ దశలో విజయానికి చేరువగా వచ్చిన అఫ్గాన్.. మ్యాక్స్‌వెల్ విధ్వంసకర డబుల్ సెంచరీతో ఓటమికి తల వంచింది.

ఈ మ్యాచ్ అనంతరం తమ ఓటమిపై స్పందించిన హష్మతుల్లా షాహిది.. ఈ పరాజయం తీవ్ర నిరాశకు గురి చేసిందన్నాడు.మ్యాక్స్‌వెల్ ఒక్కడే తమ ఓటమిని శాసించాడని తెలిపాడు. 'ఈ పరాజయం తీవ్రంగా నిరాశపరిచింది. క్రికెట్ చాలా ఫన్నీ గేమ్. ఈ ఓటమిని ఏ మాత్రం జీర్ణించుకోలేకపోతున్నాం. సునాయసంగా గెలవాల్సిన మ్యాచ్‌లో ఓటమిపాలయ్యాం.

మా బౌలర్లు అద్భుతంగా ప్రారంభించారు. కానీ మ్యాక్స్‌వెల్ ఇచ్చిన క్యాచ్‌ను నేలపాలు చేయడం తీవ్ర నష్టం చేసింది. ఈ అవకాశంతో మ్యాక్సీ చెలరేగాడు. అతన్ని ఔట్ చేసేందుకు మా బౌలర్లు సాయశక్తులా ప్రయత్నించారు. కానీ అతను ఏ మాత్రం అవకాశం ఇవ్వలేదు. మా జట్టు ప్రదర్శన పట్ల గర్వపడుతున్నాను. ఈ మ్యాచ్ ఇలా ఓడిపోతామని అస్సలు ఊహించలేదు. క్రికెట్‌లో ఇవన్నీ సహజమే.

సౌతాఫ్రికాతో మ్యాచ్‌లో మరింత బలంగా బరిలోకి దిగుతాం. విజయం కోసం సాయశక్తులా ప్రయత్నిస్తాం. ఇబ్రహీమ్ జడ్రాన్ సెంచరీ అందుకోవడం గర్వంగా ఉంది.'అని హష్మతుల్లా షాహిది చెప్పుకొచ్చాడు.

ఈ మ్యాచ్‌లో ముందుగా బ్యాటింగ్ చేసిన అఫ్గాన్.. నిర్ణీత 50 ఓవర్లలో 5 వికెట్లకు 291 పరుగులు చేసింది. ఇబ్రహీమ్ జడ్రాన్(143 బంతుల్లో 8 ఫోర్లు, 3 సిక్స్‌లతో 129 నాటౌట్) రికార్డు సెంచరీతో రాణించాడు. అనంతరం లక్ష్యచేధనకు దిగిన ఆస్ట్రేలియా 46.5 ఓవర్లలో 7 వికెట్లకు 293 పరుగులు చేసి గెలుపొందింది. మ్యాక్సెవెల్(128 బంతుల్లో 21 ఫోర్లు 10 సిక్సర్లతో 201 నాటౌట్) విధ్వంసకర డబుల్ సెంచరీతో చెలరేగాడు.

91 పరుగులకే 7 వికెట్లు కోల్పోయి కష్టాల్లో పడిన జట్టును కమిన్స్‌తో కలిసి మ్యాక్సీ ఆదుకున్నాడు. 8వ వికెట్‌కు అజేయంగా 202 పరుగులు జోడించి సంచలన విజయాన్ని అందించాడు.