అందువల్లే ఓటమి.. నిర్వాహకుల తీరుపై మండిపడ్డ పీవీ సింధు!

ఆసియా క్రీడలు 2026లో వరుస మ్యాచ్‌ల వల్ల తలెత్తిన గందరగోళ షెడ్యూల్‌పై భారత స్టార్ షట్లర్ పీవీ సింధు తీవ్ర అసంతృప్తి వ్యక్తం చేసింది. 24 గంటల వ్యవధిలోనే మూడు సింగిల్స్ మ్యాచ్‌లు ఆడాల్సి రావడంతో ఆటగాళ్లకు శారీరకంగా కోలుకోవడానికి తగినంత సమయం లభించలేదని ఆమె ఆవేదన వ్యక్తం చేసింది. సరైన నిర్వహణ లేకపోవడం వల్లే తాను క్వార్టర్ ఫైనల్లో చైనాకు చెందిన చెన్ యుఫెయ్ చేతిలో ఓటమి పాలవ్వాల్సి వచ్చిందని పరోక్షంగా పేర్కొంది.

IND vs WI: విండీస్‌తో తొలి వన్డే.. తుది జట్టులో యువ ఆటగాళ్లకు ఛాన్స్!

అర్ధరాత్రి మ్యాచ్‌లు.. కోలుకునేందుకు లేని సమయం
శనివారం మధ్యాహ్నం రెండో రౌండ్ మ్యాచ్ ఆడిన పీవీ సింధు.. అదే రోజు అర్ధరాత్రి దాటిన తర్వాత(తెల్లవారుజామున ఒంటి గంటకు) మూడో రౌండ్ మ్యాచ్‌ను పూర్తి చేసుకుంది. ఆ తర్వాత కొద్ది గంటల వ్యవధిలోనే అంటే ఆదివారం మధ్యాహ్నం 1.30 గంటలకు క్వార్టర్ ఫైనల్ మ్యాచ్ బరిలోకి దిగాల్సి వచ్చింది. కెరీర్లో ఏ ప్రధాన టోర్నీలోనూ ఇలాంటి షెడ్యూల్ చూడలేదని, ఎంత మానసికంగా సిద్ధపడినా శరీర సహకారం, రికవరీ లేకపోతే మ్యాచ్ ఆడటం అత్యంత కష్టమని పీవీ సింధు స్పష్టం చేసింది. సుదీర్ఘ ర్యాలీలు ఆడేటప్పుడు కాళ్లు సహకరించలేదని సింధు పేర్కొంది.

హాక్-ఐ సౌకర్యంపై ప్రశ్నలు
గందరగోళ షెడ్యూల్‌తో పాటు మ్యాచ్ సందర్భంగా సాంకేతిక లోపాలపై కూడా పీవీ సింధు విమర్శలు గుప్పించింది. క్వార్టర్ ఫైనల్లో కొన్ని లైన్ కాల్స్ విషయంలో సందేహాలు ఉన్నప్పటికీ.. నాలుగో కోర్టులో హాక్-ఐ లేదా రివ్యూ కెమెరాల సౌకర్యం లేకపోవడంతో సవాలు చేసే అవకాశం లేకుండా పోయిందని తెలిపింది. ఆసియా క్రీడల వంటి ప్రతిష్టాత్మక టోర్నీల్లో క్వార్టర్ ఫైనల్ మ్యాచ్‌లకు కూడా సాంకేతిక పరిజ్ఞానం అందుబాటులో లేకపోవడం తీవ్ర నిరాశకు గురిచేసిందని పీవీ సింధు పేర్కొంది.

'ఏం చేసినా నో ఛాన్స్': అరంగేట్రం వేళ నమన్ ధీర్‌కు బిగ్ షాక్!

చెన్ యుఫెయ్ చేతిలో పోరాడి ఓడిన పీవీ సింధు
రెండు సార్లు ఒలింపిక్ పతక విజేత అయిన పీవీ సింధు క్వార్టర్ ఫైనల్లో టోక్యో ఒలింపిక్ ఛాంపియన్ చైనాకు చెందిన చెన్ యుఫెయ్ చేతిలో 21-11, 18-21, 10-21 తేడాతో ఓటమి పాలైంది. తొలి గేమ్‌ను 21-11తో చాలా సులువుగా గెలుచుకున్న పీవీ సింధు, రెండో గేమ్‌లోనూ తీవ్రంగా పోరాడింది. అయితే నిర్ణయాత్మక మూడో గేమ్‌లో చెన్ యుఫెయ్ పూర్తి ఆధిక్యం ప్రదర్శించడంతో సింధు ఓటమిని అంగీకరించక తప్పలేదు. అంతకు ముందు శనివారం రోజునే రెండు మ్యాచ్‌లు ఆడిన సింధు, 24 గంటల వ్యవధిలో మూడో మ్యాచ్ ఆడటంతో తీవ్ర అలసటకు గురైంది.