Australia Open: జకోవిచ్ తగ్గేదేలే.. అల్కరాజ్‌పై సంచలన విజయం!

ప్రతిష్టాత్మక టెన్నిస్ గ్రాండ్‌స్లామ్ టోర్నీ ఆస్ట్రేలియా ఓపెన్‌లో సెర్బియా స్టార్ నోవాక్ జకోవిచ్ జోరు కొనసాగుతోంది. 25వ గ్రాండ్‌స్లామ్ టైటి‌ల్‌ను అందుకునేందుకు జకోవిచ్ మరో అడుగు ముందుకు వేసాడు. మంగళవారం జరిగిన పురుషుల సింగిల్స్ క్వార్టర్ ఫైనల్లో ఏడో సీడ్ జకోవిచ్ 4-6, 6-4, 6-3, 6-4 తేడాతో మూడో సీడ్, స్పెయిన్ స్టార్ కార్లోస్ అల్కరాజ్‌ను చిత్తు చేశాడు. ఈ విజయంతో సెమీఫైనల్‌‌కు దూసుకెళ్లాడు. 11వ ఆస్ట్రేలియా ఓపెన్ టైటిల్‌కు అడుగు దూరంలో నిలిచాడు.

మరోవైపు తొలి ఆస్ట్రేలియా ఓపెన్ టైటిల్ సాధించాలని భావించిన అల్కరాజ్‌కు మరోసారి నిరాశే ఎదురైంది. 3 గంటల 37 నిమిషాల పాటు సాగిన ఈ క్వార్టర్ ఫైనల్లో తనకు అలవాటైన రీతిలోనే జకోవిచ్.. తొలి సెట్‌ను కోల్పోయాడు. ఆ తర్వాత అసలు సిసలు ఆటతో అల్కరాజ్‌కు చుక్కలు చూపించాడు. వరుసగా మూడు సెట్లను గెలుచుకొని గేమ్‌ను సొంతం చేసుకున్నాడు.

ఈ మ్యాచ్‌లో నోవాక్ జకోవిచ్ 5 ఏస్‌లు, 33 విన్నర్లు కొట్టగా.. అల్కరాజ్ అనవసర తప్పిదాలతో మూల్యం చెల్లించుకున్నాడు. ప్రోఫెషనల్ టెన్నిస్‌లో జకోవిచ్, అల్కరాజ్ ఇప్పటి వరకు 8 సార్లు తలపడగా.. ఐదు సార్లు సెర్బియా స్టారే విజయం సాధించాడు. అల్కరాజ్ మాత్రం మూడు సార్లు గెలిచాడు.

సెమీఫైనల్లో జకోవిచ్ జర్మన్ ప్లేయర్, రెండో సీడ్ అలెగ్జండర్ జ్వెరెవ్‌తో తలపడనున్నాడు. శుక్రవారం ఈ సెమీఫైనల్ మ్యాచ్ జరగనుంది. గతేడాది జకోవిచ్ ఒక్క గ్రాండ్ స్లామ్ టైటిల్ కూడా గెలవలేదు. ఈ క్రమంలోనే తనకు అచ్చొచ్చిన ఆస్ట్రేలియా ఓపెన్ గెలిచి 25వ గ్రాండ్ స్లామ్ టైటిల్‌ను ఖాతాలో వేసుకోవాలనే లక్ష్యంతో ఉన్నాడు.