వింబుల్డన్‌లో సంచలనం: షరపోవా ఇలా తొలిసారి, ఫెదరర్ ముందుకు

షరపోవా ఇలా వెనుదిరగడం ఇదే తొలిసారి

షరపోవా.. గ్రాస్‌కోర్టు ఓ గ్రాండ్‌స్లామ్‌లో ఇలా ఆరంభంలోనే వెనుదిరగడం ఇదే తొలిసారి. ఇక, రెండో సీడ్‌ వొజ్నియాకి (డెన్మార్క్‌), మాజీ నంబర్‌వన్‌ అజరెంకా (బెలారస్‌), మాజీ రన్నరప్‌ రద్వాన్‌స్కా (పోలాండ్‌) రెండో రౌండ్‌లో ఇంటిముఖం పట్టారు. రెండోరౌండ్లో వోజ్నియా(డెన్మార్క్‌)కి 4-6, 6-1, 5-7తో రష్యా భామ మకరోవా చేతిలో ఓడింది.

రెండో రౌండ్‌లో అజరెంకా ఓటమి

ఇక, అజరెంకా 3-6, 3-6తో ఏడో సీడ్‌ ప్లిస్కోవా చేతిలో పరాజయం చవిచూసింది. రద్వాంస్కా 5-6, 4-6తో సఫరోవా చేతిలో ఓడింది. మరోవైపు ‘విలియమ్స్‌ సిస్టర్స్‌' సెరెనా, వీనస్‌ మూడో రౌండ్‌లోకి ప్రవేశించారు. రెండో రౌండ్‌లో సెరెనా 6-1, 6-4తో విక్టోరియా తొమోవా (బల్గేరియా)పై, వీనస్‌ 4-6, 6-0, 6-1తో అలెగ్జాండ్రా డల్గెరూ (రొమేనియా)పై విజయం సాధించారు.

మూడో రౌండ్‌లోకి రోజర్ ఫెదరర్

రికార్డుస్థాయిలో తొమ్మిదో వింబుల్డన్‌ సింగిల్స్‌ టైటిల్‌పై గురి పెట్టిన స్విస్ టెన్నిస్‌ దిగ్గజం రోజర్‌ ఫెదరర్‌ ఆ దిశగా మరో అడుగు ముందుకేశాడు. బుధవారం జరిగిన పురుషుల సింగిల్స్‌ రెండో రౌండ్‌లో డిఫెండింగ్‌ చాంపియన్‌ ఫెదరర్‌ 89 నిమిషాల పాటు సాగిన మ్యాచ్‌లో 6-4, 6-4, 6-1తో లుకాస్‌ లాకో (స్లొవేకియా)పై గెలిచాడు. ఈ మ్యాచ్‌లో ఫెదరర్‌ ఏకంగా 48 విన్నర్లు, 16 ఏస్‌లు సంధించి ప్రత్యర్థిని హడలెత్తించాడు.

స్ట్రఫ్‌‌పై ఇవో కార్లోవిచ్‌ విజయం

శుక్రవారం జరిగే మూడో రౌండ్‌లో జాన్‌ లెనార్డ్‌ స్ట్రఫ్‌ (జర్మనీ)తో ఫెదరర్ తలపడనున్నాడు. కాగా, ఇవో కార్లోవిచ్‌ (క్రొయేషియా)తో 3 గంటల 54 నిమిషాలపాటు జరిగిన రెండో రౌండ్‌ మ్యాచ్‌లో స్ట్రఫ్‌ 6-7 (3/7), 3-6, 7-6 (7/4), 7-6 (7/4), 13-11తో గెలుపొందాడు. ఈ మ్యాచ్‌లో కార్లోవిచ్‌ ఏకంగా 61 ఏస్‌లు సంధించడం విశేషం.

భారత ఆటగాడు పురవ్‌ రాజాకు నిరాశ

మిగతా మ్యాచ్‌ల్లో 13వ సీడ్‌ రోనిచ్‌ 7-6 (7-4), 7-6 (7-4), 7-6 (7-4)తో మిల్‌మన్‌పై నెగ్గాడు. మోన్‌ఫిల్స్‌, సామ్‌ క్వెరీ కూడా మూడో రౌండ్‌కు చేరారు. పురుషుల డబుల్స్‌లో భారత ఆటగాడు పురవ్‌ రాజాకు నిరాశ ఎదురైంది. డబుల్స్‌ తొలిరౌండ్లో పురవ్‌ రాజా-ఫాబ్రిస్‌ మార్టిన్‌ (ఫ్రాన్స్‌) జోడీ 2-4, 4-6, 7-6(5), 6-4, 9-11తో మీర్జా బాసిచ్‌-డుసాన్‌ లజోవిచ్‌ జంట చేతిలో పోరాడి ఓడింది.