టెన్నిస్ కోర్టులో క్రికెట్‌ ఆడిన ఫెదరర్‌కు ఐసీసీ నంబర్‌వన్ ర్యాంకు (వీడియో)

టెన్నిస్ బంతితో క్రికెట్‌ తరహా ఢిఫెన్స్‌

రికార్డుస్థాయిలో తొమ్మిదో వింబుల్డన్‌ టైటిల్‌పై గురి పెట్టిన స్విస్‌ మాస్టర్‌ రోజర్‌ ఫెదరర్‌ సోమవారం ప్రిక్వార్టర్స్‌లో భాగంగా మన్నారినో(ఫ్రాన్స్‌)తో తలపడ్డాడు. ఈ మ్యాచ్‌లో ఫెదరర్ టెన్నిస్ బంతితో క్రికెట్‌ తరహా ఢిఫెన్స్‌ షాట్‌ ఆడాడు. దీంతో మ్యాచ్‌ చూస్తున్న వాళ్లంతా ఆశ్చర్యపోయారు. ఇందుకు సంబంధించిన ఫొటోలు, వీడియోలు సోషల్ మీడియాలో వైరల్‌గా మారాయి.

సోషల్ మీడియాలో వీడియో వైరల్

వింబుల్డన్‌ నిర్వాహకులు రోజర్ ఫెదరర్‌ ఆడిన షాట్‌కు సంబంధించిన వీడియోను ట్విటర్‌ ద్వారా పంచుకుని రేటింగ్‌ ఇవ్వాల్సిందిగా ఐసీసీని కోరింది. ఇందుకు స్పందించిన ఐసీసీ టెస్టుల్లో నంబర్‌వన్‌ బ్యాట్స్‌మెన్‌ ర్యాంకును ఇచ్చినట్లు తెలిపింది. దీనిపై టెన్నిస్‌ అభిమానులు సోషల్ మీడియాలో తెగ కామెంట్లు చేస్తున్నారు.

వింబుల్డన్: క్వార్టర్ ఫైనల్‌కు చేరిన ఫెదరర్

ఇక, ఈ మ్యాచ్‌లో డిఫెండింగ్‌ చాంపియన్‌ ఫెదరర్ 6-0, 7-5, 6-4తో ఫ్రాన్స్‌ క్రీడాకారుడు అడ్రియన్‌ మనారినోపై వరుససెట్లలో విజయం సాధించాడు. తొలిసెట్‌లో ప్రత్యర్థికి ఒక్క గేమ్‌కు కూడా అవకాశమివ్వని ఫెదరర్.. ఆ సెట్‌ను కేవలం 16 నిమిషాల్లోనే ముగించి సత్తా చాటాడు. ఎనిమిదిసార్లు వింబుల్డన్‌ విజేత అయిన 36 ఏళ్ల ఫెడరర్‌కిది వరుసగా 32వ సెట్‌ విజయం.

వరుసగా 20వసారి వింబుల్డన్‌ టోర్నీలో

వరుసగా 20వసారి వింబుల్డన్‌ టోర్నీలో ఆడుతున్న ఫెదరర్‌ 16వసారి క్వార్టర్‌ ఫైనల్‌కు చేరాడు. మొత్తంగా ఫెదరర్ తన కెరీర్‌లో 53వసారి గ్రాండ్‌స్లామ్‌ క్వార్టర్‌ ఫైనల్లోకి అడుగుపెట్టాడు. బుధవారం జరిగే క్వార్టర్‌ ఫైనల్లో అండర్సన్‌తో ఫెడరర్‌ తలపడనున్నాడు.